Read Yupik James 3 Bible Online

James 3 - Yupik bible

James 3

¹Ilamaa, amllerni ayuqucirturten͞gukaunrituci; nallunrituci ayuqucirturilria tukninranek qanercetaarumaciqngan.

²Amllellriatgun picurlagalaamta. Tau͡gaam yuk qanllermikun picurlaksailkuni, tauna ellualriaruuq, temni-llu tamalkuan tegumiaqsugngaluku.

³Tangerrluku horse-aat sugg'elicilaraput maligtaqusqelluta, tuaten-llu temtuumaita caqiatelaraput.

⁴Tangerrluku-llu angyarpiit angqapigtengraata, anuqerpiim-llu ayautelangraateng caqiacimalartut alulacuayaarkun alulartem piyullratun.

⁵Tuaten-llu tememta ilakuinrii alungun mikqapigcaaquq, tau͡gaam qanllermikun tukniuq. Tangerrluku kenquinraam ekevkarilaucia.

⁶Alungun-llu kenruuq picurlautnguqapiggluni. Tuaten alungutem tememta iliin caarrluurtelaraa temvut tamalkuan ekuavkarluku-llu yuucim 'gilertellra, nangciviim kenranek.

⁷Yuilqum ungungssii yaqulget-llu, ciissit-llu imarpigmiutaat-llu, elitnaurluteng yuk niisngalaraat.

⁸Alungun tau͡gaam yuum ataniumasciigataa, inerciigalnguungan tuqunarqelriamek-llu muirumaluni.

⁹Tuaggun Agayun Atavut atawaqercet'lararput, tuaggun-llu cali aniqlaalaraput yuut Agayun ayuqluku piurcimalriit.

¹⁰Qanermek ataucimek atawaqaasqun anlartuq aniqlaan-llu. Ilamaa, tuaten piyunaitelaryaaqukut.

¹¹Ulevlaq-qaa ancilartuq atunem assilriamek mermek cungarninarqelriamek-llu?

¹²Ilamaa, figs-aanek-qaa naugituli naugiciquq olive-aanek, wine-aq-llu figs-aanek? Tuaten-llu-wa taryuq meq'egtaarmek taqutesciigatuq.

¹³Yuk umyuartukuni, elisngaluni-llu, ayuqucini nasvagliu qanlallermikun assilriakun, ellmikutuuluni.

¹⁴Tau͡gaam ircaqurpegun ciknayaramek inglukutmek-llu qemangqaangqerquvet, ucuryaguteksaqunaku piciunrilan tamana.

¹⁵Waten ayuqelria usvi pakmaken kingunengqenrilan, tau͡gaam nunamiutauguq, kemegtauluni-llu, anernerrlugtauluni-llu.

¹⁶Tua-i nani ciknayarartangqerqan inglukucetarluni-llu, aakulagnarquq nepaitnarqevkenani-llu.

¹⁷Tau͡gaam elisnga pakemkumiutaq caarrluituq uitanqegcinaqluni, pillagavkenani, maligauraulluni, takumcutarluni, assilrialiluni, caqtaarpek'nani, malrugnek-llu umyuangqerpek'nani.

¹⁸Uitanqegcivkarilriim nauceciillra, uitanqegcitmek naugiciquq elluamek.