Read Yupik James 5 Bible Online

James 5 - Yupik bible

James 5

¹Atam, ukuut tukuulriani, qiaci qalervagluci-llu nangteqlerkarci pitekluku.

²Tukuuteci aruarkaugut aturaci-llu parut nerluki.

³Suulutaaruceci kavirliq-llu manialiut, qallellrat-llu elpecen̄un nallunairutnguciquq, kemegci-llu kenercetun nangciiqaa. Quyurcillruuci tukuutnek makuni ernerni nangneqlirni atu'urkarpecen̄ek.

⁴Tangerrluku, calistevci akinguteksallrit teglegaqelci qayagaut, quyurcillret-llu erinait Agayutem, quyungqarugalriit Atanrata, ciutegkenun tekitut.

⁵Nunami angnirluci akusrarrluci-llu yuullruuci, tuqurqiyaramcetun nerervagluci.

⁶Assiilkellruarci ellualria tuqulluku-llu; elliin-llu inglukenritaaci.

⁷Taumek, ilamaa, nerinisngialliqsaqunaci, Atanrem tekitellerkaanun. Tangerrluku, nauceciiyurta-llu nerinit'laryaaquq nauceciillmi naugillerkaatnek, tau͡gaam atanqalgilartuq ellalliutellerkaatnek.

⁸Tuaten elpeci-llu nerinisngialliqsaqunaci. Caceturici Atanrem tekitellerkaa mallgian.

⁹Atunem qanemyuugaucaqunaci, ilamaa, qanercetaarumayuartuci; tangerrluku, qanercetaarta amiigem ciuqerrani nangengqauq.

¹⁰Anelgutmaa, cuqyutkiciki Prophet-aat, nangcimallrat ilalcillrat-llu, (Atanrem atrakun qallatelallrat).

¹¹Tangerrluku, pektayiilnguq atawak'lararput. Niitelartuci-llu Job-am ilalciucia Atanermun-llu tuaten pivkaucia. Ataneq kusgurtalriaruuq takumcutarluni-llu.

¹²Arcaqerluku murilkarkarci anelgutmaa: Ukvernarcariyaqunaci qilagmun, wall'u nunamun wall'u allanun. Tau͡gaam angllerci qangaallerci-llu canek ilayaqunaciu, qanercetaarumayuartuci.

¹³Ilasi-qaa arenqiallugtuq? Piicakili, angniquni-llu nanrautnek atuqili.

¹⁴Ilasi-qaa naulluuguq? Agayuviliurten̄ek pitekliqili, piicautelluni-llu mingugtelluni-llu uqumek Atanrem atrakun.

¹⁵Ukverem-llu piicautiin anirturciqaa naulluulria, Atanrem-llu canrirceciiqaa; assiilngillrukuni-llu au͡g'aricimaciquq.

¹⁶Assiilnguci atunem apervikuatekiciki, atunem-llu piicaulluci, canrircecimanaurtuci. Ellualriim ilungluni piicallra amllernek unangelartuq.

¹⁷Elijah wangkucicetun yuucingqerrsaaquq. Piicallrani ellalliisqevkenaku ellalliqsaitellruuq allrakuni pingayuni iraluni-llu arvinlegni.

¹⁸Piicanqigcan-llu ellallunguq nuna-llu naugiluni naunranek.

¹⁹Ilamaa, ilasi picurlakan yuum-llu umyualinqigceskaku,

²⁰nallunriciu umyualinqigcecestii picurlallranek anirturiarkaucianek tarnermek tuquyallranek, assiilnguut-llu amlleret patuluki.