Read Yupik 1 Peter 2 Bible Online

1 Peter 2 - Yupik bible

1 Peter 2

¹Taumek, pegciu tamalkuan umyuarrliquciyaraq, tamalkuan-llu usvituyarcaraq, malrugnek-llu umyugiuciyaraq, ciknayaraq-llu, tamalkuita-llu qanerrlugyarat.

²Mikelnguyagartun milegmek piyulriatun, tuaten elpeci meqsulriatun qaneryaraq pikiciu, tamaaggun angliniartuci anirtuumallerkarpecen̄un.

³Uillrukuvciu Atanrem naklekicia.

⁴Elliinun ullaulluci, tuarpiaq teggalqumun unguvalriamun, yugni cakaarumalriamun, tau͡gaam Agayutem nakmikellranun assiqapigtellriamun.

⁵Ellii tusnganeqluku, elpeci cali teggalqutun unguvalriatun enelimauci anernellarmek, agayulirten͞gusqelluci ellualriaruluci, ekuagisqelluci cikiutnek anernellarnek Agayutmun akurtuyunarqelrianek Jesus Christ-akun.

⁶Tuaten igausngiin qaneryarani, “Tangerrluku, Zion-aami elkarciunga kangiritkamek teggalqumek, cucunarqelriamek, assiqapigtellriamek. Elliinun-llu ukvelria qacuvallagngaituq.”

⁷Taumek elpecen̄un, ukvelriani, piksuuminarquq, tau͡gaam niisnganrilngurnun teggalquq tauna enelilriit qessakekiit, watua kangiritkaurtuq enem tusnganrani,

⁸paallautnguarkauluni teggalquq, qiuq-llu cangayuutnguluni qaneryarami cangayutekestainun niisnganritlermegteggun tuaten picirkiumacimegcetun.

⁹Tau͡gaam elpeci cucukumauci yuullgutkelriani, agayulirten͞guluci, qigcignaqluci, angayuqauvillgutkelriani ellualriani, yugni nakmikek'ngaini, nasvaasqelluku ucurnarqucia kelegtellerpeci tan'germek tanqigmun irr'inarqelriamun.

¹⁰Mat'um ciungani yuunricaaquci, tau͡gaam maa-i Agayutem yukaaci, takumcukumallrunricaaquci, tau͡gaam maa-i takumcukumaluci.

¹¹Yugnikekmaa, eguaquramci allanrulriani pektaulriani-llu, neguraluku kemgem aglumayullra inglukilria tarnerpecen̄ek.

¹²Qanlallerci piciuvkarluku agayumanrilngurni, qanerrluutekengraiceci tangerrnauraat caliaqegtaarci, nanrarnauraat-llu Agayun Ernermi elpengcaumallermeggni.

¹³Niisngaciu tamiin picirkiun Ataneq pitekluku, atanvagnun,

¹⁴wall'u atanerruanun atanviim cingellrinun, qanrucunailnguut anucimirqecetaarutkaatnun assilriit-llu nanrallerkaatnun.

¹⁵Waten ayuquq pisqutii Agayutem, tuaten elluarrluci pikuvci nepairiciquci qanerrluutaitnek usviilnguut.

¹⁶Umyugiulriatun piluci, assiilngurmun-llu umyugiurpek'naci, tau͡gaam Agayutem kevgaicetun.

¹⁷Takaqluki tamalkuita yuut. Kenekluki ilakutellriit. Qigcikluku Agayun. Takaqluku angayuqaq.

¹⁸Pisten͞gulriani, niisngaciki ataneci, assilriit naklegtalriit kiingita pivkenaki, tau͡gaam naklegtanrilengraata-llu.

¹⁹Tua-i man'a quyateknarquq yuk umyuaqegtaarani Agayutem tungiinun pitekluku ilalciquni, pinarqenrilnge'rmi nangcimaluni.

²⁰Picurlauteci pitekluki nangtaukuvci ilalciuluci, camek ucurnarqutengqerciqseci? Tau͡gken elluarrluci pillerci pitekluku nangtaukuvci ilalciuluci, tamana Agayutmi akurtuyunarquq.

²¹Tamana-llu pitekluku kelgumauci; tua-i-wa Christ-am nangtequtekellruakut maryarrluta; taumek ellii tumaikun maligciu.

²²Ellii assiilngillrunrituq, taumek piciunrilnguq qanrantellrunrituq.

²³Caunrilkumange'rmi akinrituq, nangcimanger'mi akinaunrituq, tau͡gaam ellminek tun'uq cuqcistem̄un ellualriamun.

²⁴Elliin tungaunani assiilnguput quukatallrui tememikun kelistam qaingani, wangkuta assiilngurmun tuqullrulriani elluamun yuusqelluta; qiuqnerikun canrircecimauci.

²⁵Tua-i elpeci qusngitun avtellruuci, tau͡gaam watua utertuci tarnerpeci qusngiliurtiinun, qaunqestiinun-llu.