Read Yupik 1 Peter 3 Bible Online

1 Peter 3 - Yupik bible

1 Peter 3

¹Tuaten-llu elpeci nulirrulriani, uivcen̄un maligtaquurauci, ellaita qaneryaraq ukveqenrilngermegteggu; qaneryaraunrilengraan nuliameng ayuquciatgun unakumanaurtut,

²tangerqunegteggu menuunaci qigcigyugluci-llu ayuqucirci.

³Qaivciuggun kenegnarcarpek'naci, nuyaci tangnircartelluki, suulutaamek-llu aturluci, aturaqegtaarnek-llu.

⁴Tau͡gaam iluvciuggun tangvaumanrilngurkun ircaqurpeciuggun piunrirarkaunrilngurmek kenegnarcarluci, ellmikutuuluci qinuunaci-llu anernerpeciuggun. Tamana Agayutem tangerqiini assiqapigtuq.

⁵Watnallruut imumi arnat ellualriit Agayutmek cacetuqutekilriit kenegnarcarluteng uimeggnun maligtaquuraulluteng,

⁶niisngallruciatun Sarah Abraham-aamek, atanermek tuqlurluku. Elliin panikaaci elluarrluci pikuvci civuuranrilkuvci-llu.

⁷Tuaten-llu uingulriani, nuliaci aipaqkiciki umyualegtun nuliaminek takaqilriatun, mulnganarquciat umyuaqluku, tuarpiaq-llu paitarkangqellgutekluki unguvamek Agayutem cikiutiinek naklekutekun, piicauteci tumairamanritnaurtut.

⁸Nutaan-llu, tamarpeci, umyuallgutkici takumcukulluci atunem, anelgutkelriatun kenkulluci, takumcutarluci ellmikutuuluci-llu.

⁹Assiitellria-llu akinauqsaunaku assiitellgutiinek wall'u qanerrluk qanerrluullgutiinek, tau͡gaam atawaqaasqiaqluci pici; kelgumiivci atawaqaasqun paitaqerkauluku.

¹⁰“Wani-wa yuk elluiluni nunaniryugluni-llu yuuyukuni alungutni assiilngircetenrilliu, qerrluugni-llu qanerrlugmek qallaceteksaunakek.

¹¹Assiilnguq tunulluku assilriamek calikili, uitanqegcillerkaq-llu yuarluku maliggluku-llu.

¹²Wani-wa Agayutem tangvalarai angniutekluki ellualriit, ciutek-llu ikirngauk kaigataitnun, tau͡gaam assiilnguliulriit Atanrem ulularai.”

¹³Kia-mi aknirciiqaci cumiggluci assilriamek calikuvci?

¹⁴Tuaten-llu nangcimayaaqeng'e'rpeci elluangnaquciq pitekluku atawaqertuci, alikenriciki-llu alingnarliulriit, umyuarrlugcarpek'naci-llu.

¹⁵Tau͡gaam ircaqurpeciuggun Ataneq Agayun kenciknarivkarciu, yuum-llu apeskaci neryuniurutevcen̄ek, kiucirkaitevkenaci kiularciki qigcigyugluci-llu.

¹⁶Tau͡gaam umyuarniurutaunaci, assiilngurnek calilriacetun picilingraiceci, kiaruciitnaurtut iqluurutkesteci, elluarrluci pillerci Christ-ami pitekluku.

¹⁷Tua-i Agayutem pisquciatun elluangnaqucirci pitekluku nangcimallerci assinruuq, nangcimallerkami elluanrilucirci pitekluku.

¹⁸Tua-i Christ-aq cali assiilnguut pitekluki nangteqellruami ataucirqumek taqluni, ellualria elluanrilngurnun, Agayutmun ullautnaluta, kemegkun tuqucimaluni, tau͡gaam Anernerkun unguircecimaluni,

¹⁹tamaaggun cali anernernun ayallernun itengqalrianun ayallruuq qalarucarturluki.

²⁰Taukut niicunritellret, Agayutem takumcukutii utaqalgillrani Noah-m nalliini, angyillran taktaciatun, merkun-llu piunrirluteng, pingayunelgen tau͡gaam yuut anirtuumaluteng mermek.

²¹Tuaten-llu maa-i anglluryarakun anirtuumauci, qaivci iqaitellerkaa umyuaqevkenaku, tau͡gaam umyuarniurutaitellerkarci Agayutmun pitekluku, Jesus Christ-am unguillrakun,

²²qilagmun ayallrem, Agayutem-llu tallirpiani uitaluni, an'gilat atanrulriit-llu pinilget-llu ataniumaluki.