Read Yupik 1 Peter 4 Bible Online

1 Peter 4 - Yupik bible

1 Peter 4

¹Taumek Christ-aq kemegkun nangteqellruan, elpeci-llu tuaten umyuangqerqici; tua-i kina imna kememikun nangteqkuni assiilnginermek taq'uq.

²Yuk unguvami taktaciatun yuut aglumallritgun yuugarkauvkenani, tau͡gaam Agayutem pisqumallrakun.

³Imumi atulalci taqnariaci agayumanrilnguut aturyukait, acunianeq, aglumakiyaraq, taangiqsaraq, akusrarcaraq, nerervagyaraq, agayutngualiyaraq-llu.

⁴Alangaarutkaiceci ilalinrilavciki akusrartellratni; cangaksugaiceci-llu.

⁵Tau͡gaam unguvalriit tuqumalriit-llu cuqcistekaata ciuqerrani qanercetaarumaarkaugut.

⁶Tamana pitekluku Gospel-aaq qalarutkumauq tuqumalrianun, yugtun kemegkun cuqcimange'rmeng Anernerkun unguvasqelluki Agayucetun.

⁷Cat tamarmeng iquklitlerkaat canimellirtuq, taumek umyuangqerqici pegg'arluci-llu piicallerkarpecen̄un.

⁸Arcaqerluci kenkuskici, kenkakun assiilngurugaat patumaarkaungata.

⁹Allaneryunqeggluci pikici qunuyuunaci.

¹⁰Ciuniullrucirpecetun Agayutem cikiutiinek, tuaten-llu cikiqengici ilavcen̄un, Agayutem naklekutain ayuqenrilnguut qaunqestiicetun.

¹¹Qalarucilria Agayutem nasvallrinek qalarrli, kevgiulria Agayutmek cikiumatacimitun pinimek kevgiuqili; cat tamaitgun Agayun ucurnarisqelluku Jesus Christ-akun; tauna-llu nanraumakili atanrukili-llu akwarpak akwanun. Amen.

¹²Kenkumalriani, cangayunrici nangteqnarqelriim kenertun tekiararuskaci, naspaamaluci, allayugmek pimayukluci.

¹³Tau͡gaam Christ-aq nangteqellgutkekuvciu quyakici; tuaten-llu ucurnarillerkaani ilakluku angnirpagniartuci.

¹⁴Christ-am atra pitekluku nangcimakuvci atawaqerciquci, tua-i Agayutem Anerneran tusngavikngaci, ucurnarqucian-llu.

¹⁵Tau͡gaam ilasi niicimanrilli nangcimaniluku tuqucillni pitekluku, wall'u teglellni, wall'u assiilngillni, wall'u neplircecillni.

¹⁶Tau͡gaam ilasi nangcimakuni Christ-am atra pitekluku, tamana kasngunarqenrituq, tau͡gaam ucurnarivkarciqaa Agayun, tuaggun atrakun.

¹⁷Wani-wa qanercetaarun tut'eqatartuq Agayutem yuinun ciumek. Tua-i-llu wangkuta ciumek qanercetaarumakumta, qaillun-mi imkut qaneryaram narurtestai picirkiumaciqat?

¹⁸Cali-llu “Ellualriit pegnem anirtuumaarkaukuneng, qaillun-mi Agayutailnguut assiilnguut-llu pimaciqat?”

¹⁹Taumek Agayutem pisquciatun nangtaulriit elluaq atungnaqerkaugaat, unguvaseng-llu tegumiaqevkararkaugaat piurcetmeggnun piciulriamun.