Read Yupik 2 Peter 1 Bible Online

2 Peter 1 - Yupik bible

2 Peter 1

¹Wii, Simon Peter, Jesus Christ-am pistiini, apostle-aarani-llu, ukvellgutemten̄un pitatekluta, Agayutem elluaruciakun, Anirturtemta-llu Jesus Christ-am.

²Naklekun uitanqegcin-llu amllerili elpecen̄un nallunrillrakun Agayutem, Jesus-aam-llu Atanemta.

³Agayutem pinian cikiakut unguvam atu'urkainek elluarucimek-llu, nallunrillrakun kelegtemta ucurnarquciminun assiuciminun-llu.

⁴Tamaaggun akqellruakut piksuuminarqellrianek, angqapigtellrianek, qimagyunarivkarluku piunrillerkaq aglumacikun, Christ-atun-llu ayuqlirisqelluta.

⁵Tamana pitekluku pingnaqkici ukverci ilaluku assinermek, assineq-llu elisngamek,

⁶elisngacirci-llu pitalqenermek, pitalqeneq-llu pektayiitnermek, pektayiitnaq-llu elluarucimek,

⁷elluaruciq-llu ilakuyutmek, ilakuyun-llu kenekmek.

⁸Tamakut elpecen̄elkata tukniluteng-llu, piniatessngaitaiceci atsaitessngaunaci-llu nallunrillrakun Atanemta Jesus Christ-am.

⁹Tamakunek piilnguq cikmiumauq, yaaqvaq tangerciiganaku assiilnguminek-llu au͡g'aricimallni nalluyagulluku.

¹⁰Taumek nallunaingnaqiciu kelgumacirci cucukumacirci-llu; tuaten pikuvci paallagngaituci.

¹¹Itervigkangqerrniartuci Atanemta, Anirturtemta-llu Jesus Christ-am angayuqauvianun nangyuilngurmun.

¹²Taumek egmian neq'angevkararkaugamken makunek, nallunricaaqeng'e'rpeki asvairumaluten-llu ukverkun.

¹³Temtuumallemni tuaten qarutnarqamken neq'akumallerkarpenek.

¹⁴Temka man'a unitarkaungamku akanuivkenii Atanemta Jesus Christ-am nasvitellruciatun.

¹⁵Taumek piyunartacimtun, neq'akumavkaryuganka makut, ayaumaringe'rma neq'akumallerkaitnun.

¹⁶Umyuigamten̄ek quliranek pillrunritamci qanruteklemten̄i Atanrem Jesus Christ-am pinia tekiyucia-llu, tau͡gaam iimteggun tangvallemten̄ek Atanvaucianek.

¹⁷Takarnamek ucurnamek-llu Agayutmek Aatamek pingumarillrani erinatangellruuq ucurnam pianek, “Wani-wa una Qetunraqa kenkek'ngaqa, ilukegcitkaqa.”

¹⁸Tamana erina qilagmek pilria niitarput ilakellemten̄i ingrimi.

¹⁹Tuani prophet-aat qanlallrat piciurtevsiartuq. Taumek murilkekiciu qanellrat kenurratun tan'germi tanqilriatun errnatkaanun, unuakum agyii alairnatkaani ircaqurpecen̄i.

²⁰Nallunrilkiciu man'a ciumek, prophet-aat qanellrit yugmun elliin pinimikun taikaniumangailuciat.

²¹Wani-wa prophet-aat qanellrit yuum umyuigaqenritai, ellualriit yuut Agayutem piinek qanlartut Anernerkun Tanqilriakun.