Read Yupik 2 Peter 2 Bible Online

2 Peter 2 - Yupik bible

2 Peter 2

¹Tau͡gaam piciunrilngurnek-llu prophet-aartangqellruuq. Tuaten-llu akunlevcen̄i piciunrilngurnek ayuqucirtuilriartangqerciquq qaneryaram narurtaartainek, akiliucestesseng Ataneq piunrilkelluku, tuaten picurlagmun tekiutarkauluteng.

²Amlleret-llu maligtaquciqait akusrarutekillratgun; tamakut pitekluki piciulria piciliutekumaciquq.

³Ayarillermegteggun teguiciqaiceci iqluurluci. Taukut qanercetaallerkaat piunrillerkaat-llu ak'a ciuqvanek taqumauq.

⁴Agayutem takumcukillrunriluciatun assiilngillernek an'gilanek, tau͡gaam eggluki nangteqnarqellriamun petmigmun tan'gercetellriamun qanercetaarumallerkaata engeliinun;

⁵nunam-llu yui ciuqliit uitatellrunriluciatun, ulerpagmun piunrirtelluki assiilnguut, Noah tau͡gaam elluam ayuqucirtuutekestii uitalluku, ilai-llu malrunelgen.

⁶Ekuallruciatun nunarpiit Sodom-aarmiut Gomorrah-rmiut-llu piunrirtelluki cuqyutngusqelluki-llu assiilngiumaarkanun.

⁷Anirtullruciatun-llu Lot-aaq ellualria, tamakut acuniatulit arenqialliqutekngaki,

⁸(tua-i ellualriaruami tamakut niiskengani tangvak'ngani-llu assiilnguut erenret tamaitni arenqialliqutek'laryaaqngaki.)

⁹Tuaten Agayutem ellualriit anirturyugngai naspaamallratnek, elluanrilnguut-llu anucimirqecetaaryugngaluki qanercetaarumallerkaata engeliinun,

¹⁰arcaqerluki kemgem aglumataikun caarrluulriit qanrucunailnguut-llu. Uluryata'aqsaitut ciumuarluteng-llu, caperqevkenaku-llu kenciknarqellriit aripaciteklerkaat.

¹¹Tau͡gken an'gilat, piunrung'e'rmeng pinikun piunarqucikun-llu caunrilkeksaitelarait Atanrem ciuqerrani.

¹²Ukut tau͡gaam, yuut ungungssitun umyugailngurtun, tegumaarkatun nalacimaarkatun, ayuqut caunrilkilaameng canek taringumanrilkemeggnek, taumek ellaicetun-llu piunrirciqut,

¹³nangcimaluteng assiilnguteng pitekluki. Kemgem aglumatai atungnaq'larait erenrungraan; apquciulriatun ayuqut kilinrulriatun-llu akusrarcaraq apquciqngamegteggu qaqiciluteng akunlevcen̄i.

¹⁴Iingita aglumakiyaraq kiingan tangerqengaqaat, taqesciiganaku-llu assiilnguq. Iqlutmun-llu unayaq'larait asvaitenrilnguut; ayarinermek elitnaurumaut ircaqumegteggun, aniqlaatem yukngateng.

¹⁵Elluam tumyaraa unilluku pellaangameng; Balaam-aatun ayuqut Beor-am qetunraatun, aki pitekluku assiilngilriatun,

¹⁶kinguani tau͡gaam anucimiqluni assiilngillerminek, ugingavian ciulviim qanyuilnguum, yuum eriniikun inerqullinia tauna, usviicaaqellranek ellangartelluku.

¹⁷Elakatun-llu cali ayuqut imailngurtun, taitugtun-llu anuqem ayagceskiitun. Taukut nunakangqertut camani aciqvani tan'germi.

¹⁸Ucuryaggluteng kemgem aglumataikun unayaq'larait iqlumek anirtuumanrralriit.

¹⁹Akqait teguarunrillerkaatnek, amta-llu ellait teguaruluteng assiilngurmun; nauwa yuk cirlakestem̄inun teguarurtelartuq.

²⁰Wani-wa nunam caarrluurutai qimallrungraitki nallunrillrakun Atanrem Anirturtemta Jesus Christ-am, tamakunun ilarqutenqigtaqameng cirliqluteng-llu, kinguqliq piciat ciuqlirmi arcaqanrurtelartuq.

²¹Tua-i atawauyartuq ellaitnun nallunrircecimanrilkuni elluam tumyaraa, nallunriumayaaqerraarluki-llu tunutenrilkatki alerquutet ellmeggnun tunumalriit.

²²Nall'arrluku qanruyun: Qimugtem miryani nerenqigtelaraa, sitiinkaaq-llu erungermi marayami akagualartuq.