Read Yupik 2 Peter 3 Bible Online

2 Peter 3 - Yupik bible

2 Peter 3

¹Wani-wa una igautma aipiritii, elpecen̄un kenkekmaa, tamarkegni-llu segg'angcangnaqellruamci.

²Umyuaqesqelluki prophet-aat ellualriit qanrutkellrit tekitarkat, Atanrem-llu Anirturilriim alerquutii apostle-aatgun.

³Ciumek nallunrilkiciu man'a, caunrilkilriit tekitarkaungameng ernerni nangneqlirni caunrilkillermegteggun, maliggluku aglumakiyararteng,

⁴qanerluteng-llu, “Nauwa-mi akqutngulria tekitenqigtellerkaa? Ciuliaput tuqurraanratnek cat tamarmeng elucimegcetun ayuqut ellam piurteqarraallranek ayagluteng.”

⁵Man'a pitsaqutmek nallunguaramegteggu Agayutem qanellrakun qiliit piuruciat ak'a tamaani, nuna-llu quyurcimallruuq merkun mermenani,

⁶tamana-llu nuna ataam mer'em naligluku qainganelnguut piunrillrui.

⁷Tau͡gaam qiliit nuna-llu ekuamaarkat watua qanellrakun uitacimaut erneq engelkarrluku qanercetaarumallerkaat, qanrucunailnguut-llu piunrillerkaat.

⁸Tau͡gaam, kenkumalriani, nallunriciu man'a Atanemten̄i erneq atauciq allrakucetun tiissitsaatun pitauq, allrakut-llu tiissitsaat ernertun ataucitun ayuqluteng.

⁹Atanrem akqutni pinricen̄arngaitaa, yuut ilaita pinricen̄arnayuk'langraatgu, tau͡gaam elpeci pitekluci pataganrituq, yuk picurlaasqumanrilamiu, tau͡gaam tamalkuita umyualinqigtesqelluki.

¹⁰Tau͡gaam Atanrem Erenra tekiciiquq teglessaalriatun, qiliit-llu tem'irrluteng piunrirciqut, qiliim-llu aklui kenrem urugciiqai, nuna-llu qainganelnguut-llu ekuamaciqut.

¹¹Tua-i-llu makut tamarmeng urugcimaarkaukata, qaillun ayuqelriamek agayumaciqseci ellualriarungnaqluci,

¹²utaqaluku nerinikluku-llu Agayutem Erenran tekitellerkaa, qiliit ekuallerkaat qamlluki, qiliim-llu akluin kenerkun urugtellerkaat.

¹³Tau͡gaam akqillruciatun nutaranek neryuniurciqukut qilagnek nunamek-llu ellualriit uitavigkaatnek.

¹⁴Taumek, kenkekmaa, tamakut neryuniurutekngavciki elliinetengnaqkici, menuunaci canganarqutaunaci, uitanqegciluci-llu.

¹⁵Atanrem nerinisngialliqenrilucia anirtuutekarci; ilamta kenkek'ngamta Paul-aam elpecen̄un igallruciatun cikiumacimitun elisngamek.

¹⁶Ciungani-llu igalaucirmitun. Tamakut igat ilait taringellerkaat qacignarqenrituq, yuut-llu nallumalriit caqtaaryulriit-llu iqlutun taringyularait picurlallerkameggnun, pilaucirmegcetun allaungraata qaneryarat.

¹⁷Taumek elpeci, kenkumalriani, man'a ciunguluku nallunrilavciu, murilkici alarcetenritnauraiceci assiitellriit yuut, pektayiitnaurtuci-llu.

¹⁸Tau͡gaam pikanirci naklekutiikun nallunrillrakun-llu Atanemta, Anirturtemta-llu Jesus Christ-am. Ellii ucurnarili watua maa-i akwanun-llu, Amen.