Read Yupik 1 John 2 Bible Online

1 John 2 - Yupik bible

1 John 2

¹Irniayaamaa, makunek elpecen̄un igartua assiilngiisqevkenaci, assiilngilriartangqerqan tua-i ililirturtevvut Atametuq, wani-wa Jesus Christ-aq Ellualria tauna.

²Ellii-llu assiilngumta patumatkaat, tau͡gaam wangkuta kiimta pivkenata, ellarpagmiut tamalkurmeng cali assiilnguita.

³Alerquutai-llu atuqumteki tuaggun nallunrirciqukut elliinek nallunrilucimten̄ek.

⁴Nallunritniluku qanelria alerquutai-llu aturpek'naki pilria, tauna iqlungalriaruuq, piciulria-llu ilumikenritaa taum.

⁵Tau͡gaam kina imna qaneryaraan aturtii, taumi Agayutem kenkii ilumun qaqicimauq; tuaggun nallunritukut elliinelucimten̄ek.

⁶Elliinetaurniluni qanelria tuaten piyuagarkauguq ellii piyuallruciatun.

⁷Kenkumalriani, alerquutmek nutaramek igarvikenritamci, tau͡gaam alerquutmek ak'allarmek piqarraamek piklerpecen̄ek igarvikamci. Alerquun ak'allaq waniwauguq qaneryaraq piqarraamek niitellerci.

⁸Tuamta-llu alerquutmek nutaramek igarvikamci, elliini elpecen̄i-llu piciulriamek, tan'geq nangengiinaan, tanqik-llu piciulria pisngaluni.

⁹Tanqigmetniluni qanelria, ilani-llu uumikluku, tauna cali tan'germetuq.

¹⁰Ilaminek kenkilria tanqigmetaurtuq, cangayuutmek-llu elliinetellriartaituq.

¹¹Tau͡gaam ilaminek uumikilria, tan'germetuq, tan'germi-llu piyuaguq natetmurucirkani-llu nalluluku, tua-i tan'gerem cikmircecani.

¹²Irniayaamaa, igarvikamci assiilngurpecen̄ek au͡g'aricimiivci elliin atra pitekluku.

¹³Ataulriani igarvikamci, piqarraamek uitalria nallunrilavciu; ayagyualriani igarvikamci, assiitellria cirlakngavciu, mikelnguulriani igarvikamci, Aata nallunrilavciu.

¹⁴Ataulriani, igarvikellruamci, piqarraamek uitalria nallunrilavciu, ayagyualriani, igarvikellruamci piniavci, Agayutem-llu qaneryaraa elpecen̄etauraan, assilria-llu cirlakngavciu.

¹⁵Ellarpak ellarpiim-llu pii kenkenriciki. Ellarpiim kenkestii Aatam kenkiinek piituq ircaqumini.

¹⁶Wani-wa ellarpagmelnguut tamarmeng kemegmun aglumanarqelriit, iignun-llu aglumanarqelriit, pirpaksarat-llu unguvam mat'um pii, Aatamek pinritut, tau͡gaam ellarpagmek.

¹⁷Ellarpak-llu nangciquq, aglumanartuumarmi, tau͡gaam Agayutem pisqutiin aturtii nangyuilngurmek uitaarkauguq.

¹⁸Irniamaa, pillerkaq nangenruuq; niitelaucirpecetun Antichrist-aq tekitarkaucianek, maa-i Antichrist-at tekicimariut amllerluteng; tamaaggun nallunritarput pillerkam nangenrucianek.

¹⁹Wangkutnek avtellruut, ilakenrilamceteng; ilakellrukumceteng avcanritut; tau͡gaam avtut, wangkutnun ilakenrilucirteng nasvagluku.

²⁰Tau͡gaam elpeci Tanqilriakun minguumalriaruuci, nallumavkenaci-llu.

²¹Igarvikamci, piciunrem nallullra pitkevkenaku, tau͡gaam nallunrilavciu, nalluvkenaku-llu iqluyaraq piciunermek pinrilucia.

²²Kina tauna iqlungalriarua Jesus Christ-am mecirautekestii? Taunguuq Antichrist-aq, Aatam mecirautekestii Qetunram-llu.

²³Qetunram mecirautekestiin Aata-llu pikenritaa. Tau͡gaam Qetunram ukveqestiin Aata-llu pikaa.

²⁴Piqarraamek niitellerci elpecen̄etaurli. Piqarraamek-llu niitellerci elpecen̄etaurqan, elpeci-llu Qetunramtaurciquci Aatamtaurluci-llu.

²⁵Maa-inguuq-llu akqutkellra wangkutnun, unguva nangyuilnguq.

²⁶Makunek igaramci iqlutmurutengnaqesteci pitekluku.

²⁷Tau͡gaam elliinek minguumallerci elpecen̄etaurtuq, yugmek-llu ayuqucirturnarqevkenaci; minguumatiikun ayuqucirtuumiivci canek tamaitnek, piciungami-llu iqluurutnguvkenani-llu; ayuqucirtuuciatun-llu, elliinetaurci.

²⁸Irniayaamaa, elliinetaurci, civuuranritnaurtukut alaiqan, ciuqerrani-llu kiaresngiatenritnaurtukut tekitellerkaani.

²⁹Nallunrilkuvciu elluarucia, tuaten-llu ellualria yuk nallunriciiqerci elliikun yuurucia.