Read Yupik 1 John 3 Bible Online

1 John 3 - Yupik bible

1 John 3

¹Tangerrluku Aatam kenkeqapigucia wangkutnek, Agayutem irniarinek aprumaarkauluta, taunguamta. Taumek ukvenrilnguut nalluitkut, ellii nalluamegteggu.

²Kenkumalriani, watua Agayutem irniaqaakut, cali-llu alaiqsaituq qaillun ellillerkarput, tau͡gaam nallunritarput man'a: alaiqan ayuqarkauluku, ayuquciakun tangvagarkaungamteggu.

³Kina imna tamatumek neryuniulria caarrluirciquq elliitun caarrluilngurtun.

⁴Kina imna assiilngilria alerquutnek narurcilriaruuq, assiilnguq narurciyaraungan.

⁵Nallunritarci ellii tekitellruuq assiilngurnek au͡g'ariyarturluni elliini-llu assiilngurtaunani.

⁶Elliinetauralria assiilngirngaituq; assiilngurtulim-llu tangeqsaitaa Agayun nallunriqsaunaku-llu.

⁷Irniayaamaa, alarcecaqunaci yugmun. Elluam aturtii ellualriaruuq, ellii elluaruciatun.

⁸Assiilnguum aturtii tuunrangayiim yukaa. Tua-i tuunrangayak nutem assiilngilriaruan. Tamana pitekluku Agayutem Qetunraa tekitellruuq tuunrangayiim caliari piunrirnaluki.

⁹Agayutmek yuurtellria assiilngirngaituq, Agayutem ayuqucianek ayuqucingqerrami, assiilngirciiganani-llu Agayutmek yuurcami.

¹⁰Maaggun Agayutem irniari elitaqsunarqut, tuunrangayiim-llu irniari elluam atunritestii ilaminek-llu kenkinrilnguq, Agayutmek pinrituq.

¹¹Maa-i man'a piqarraamek niitellerci qanruyun kenkutesqelluta,

¹²Cain-atun-llu ayuqesqevkenata elluanrilngurtun anelgutminek-llu tuqucilriatun. Ciin-llu tuqutellruagu? Tua-i-wa caliani assiilata, anelgutiin-llu caliari elluarluteng.

¹³Alangaanrici, ilamaa, uumikekaceci nunamiut.

¹⁴Nallunritukut wangkuta pelluumaricimten̄ek tuqumek unguvamun, ilaput kenekngamteki. Kenkinrilnguq tuqumetaurtuq cali.

¹⁵Ilaminek uumikilria tuqucilriaruuq; nallunrituci-llu tuqucilria unguvamek nangyuilngurmek piituq.

¹⁶Maaggun kenkii taringumaarput unguvaminek pegcillrakun wangkuta pitekluta; taumek wangkuta-llu unguvamten̄ek pegciyunarqukut ilaput pitekluku.

¹⁷Tau͡gaam yuk nunamiutarnek nuryugcinrilkuni ilani-llu piilnguq tangeng'e'rmiu, kusguanrilkuniu qaillun-mi Agayutem kenkii elliineciiqa?

¹⁸Irniayaamaa, kenkinritelta qanerkun alungutkun-llu, tau͡gaam caliamteggun piciulriakun-llu.

¹⁹Maaggun nallunrirciqukut piciunermi uitacimten̄ek, caceturqaurumaluta-llu elliin ciuqerrani,

²⁰ircaqumteggun-llu picetaarumakumta, Agayun piunruuq ircaqumten̄i, ca-llu tamalkuan nallunritaa.

²¹Kenkumalriani, ircaqumteggun picetaarumanrilkumta, civuurataiciiqukut Agayutem ciuqerrani.

²²Kaigatemten̄ek-llu elliinek akurtulartukut, alerquutai atuamteki pisqumataikun-llu ilukegcivkaamteggu.

²³Maa-inguuq-llu alerquutii, ukveresqelluta elliin Qetunrami Jesus Christ-am atranun, atunem-llu kenkutesqelluta tuaten alerqullruciatun.

²⁴Alerquutain aturtait elliinetaurtut, ellii-llu ellaitnelluni. Maaggun-llu nallunritukut wangkutni uitacianek Anernerkun elliin cikiutekellrakun.