Read Yupik 1 John 4 Bible Online

1 John 4 - Yupik bible

1 John 4

¹Kenkumalriani, tamalkuita anerneret ukveqenriciki, tau͡gaam yuvrirciki anerneret Agayutmek kingunengqerruciat, amllerrata prophet-aat piciunrilnguut ellarpagmun ayalriit.

²Maaggun nallunritarci Anernera Agayutem: tamarmeng anerneret Jesus Christ-am nallunairtai, kemegkun tekitellrucianek, Agayutmek kingunengqertut.

³Tamarmeng-llu anerneret Jesus-aam mecirautekestai, Agayutmek pinritut. Maa-i man'a Antichrist-am anernera niitellerci tekitarkauniluku, maa-i-llu ak'a nunami tekisngauq.

⁴Irniayaamaa, Agayutem pikaaci cirlakngavciki tamakut; elpecen̄elnguq pininruuq taumi nunamelngurmi.

⁵Ellait nunamiutaugut, nunamiutarnek-llu qanlartut, nunamiut-llu niisngalarait.

⁶Wangkuta Agayutem pikaakut. Agayutem nallunritestiin niisngalaraakut. Maaggun nallunritarput piciulria Anerneq, piciunrilnguq-llu.

⁷Kenkumalriani, kenkutelta, kenka Agayutmek pian; kina imna kenkilria Agayutkun yuurtuq, Agayun-llu nalluvkenaku.

⁸Kenkinrilnguum Agayun nallua, Agayun keneknguan.

⁹Mat'ukun Agayutem kenkii wangkutni alairtuq, Qetunrani Agayutem ellarpagmun ayagcetellruaku, elliikun yuusqelluta.

¹⁰Waniwauguq kenkiyaram ayuqucia; wangkuta Agayun kenkellrunricaaqerput, tau͡gaam elliin kenekngamikut Qetunrani-llu tekitelluku assiilngumta patumatkaat.

¹¹Kenkumalriani, Agayutem tuaten kenekngakut, wangkuta-llu cali kenkutarkaugukut.

¹²Agayun yuum tangeqsaitaa. Kenkuskumta, Agayun wangkutnetaurciquq, kenkii-llu wangkutni qaqicimauq.

¹³Maaggun nallunrirciqukut elliinetauraucimten̄ek, ellii-llu wangkutnetauraucianek, Anerneminek cikiakut.

¹⁴Wangkuta-llu tangellruaput nallunairiluta-llu, Aatam ayagcetellranek Qetunraminek ellamiut Anirturtekaatnek.

¹⁵Kia imum Jesus-aaq apertuakuniu Agayutmun Qetunraqucia, elliini Agayun uitaurtuq, ellii-llu Agayutmetaurluni.

¹⁶Wangkuta-llu nallunritarput ukveqluku-llu Agayutem kenkii wangkutnun. Agayun kenkutnguuq, kina-llu imna kenekmetauralria Agayutmetaurtuq, Agayun-llu elliinetaurluni.

¹⁷Maaggun kenka wangkutni qaqicimauq, civuurasqevkenata Ernermi qanercetaarvigmi, elliitun uitiimta ellami mat'umi.

¹⁸Kenka alingmek piituq, tau͡gaam kenkem qaqimalriim alinga anevkalaraa, alinga nangtaumek ilangqerran; alingelria kenekmikun qaqicimanrituq.

¹⁹Wangkuta kenkarput, elliin ciumek kenekngakut.

²⁰Kina imna qanquni, “Agayun kenkaqa,” tau͡gken anelgutni uumikluku, iqlungalriaruuq; wani-wa anelgutni kenkenrilkuniu tangellni, qaillun piluni Agayun kenekciqau tangenrilken̄i?

²¹Mat'umek-llu alerquumaukut elliinek: Agayutmek kenkilriim anelgutni-llu kenkarkaugaa.