Read Yupik 1 John 5 Bible Online

1 John 5 - Yupik bible

1 John 5

¹Kia imum ukvekekuniu Jesus-aaq Christ-aucia Agayutkun yuurtuq, kia-llu imum Aataulria kenkekuniu, Qetunraa-llu kenekciqaa.

²Mat'ukun nallunritukut Agayutem irniarinek kenkicimten̄ek, kenkekumteggu Agayun niisngaluki-llu alerquutai.

³Maa-inguuq kenkellra Agayutem, alerquutai aturluki. Caperrnarqenritut-llu alerquutai.

⁴Taumek Agayutkun yuurtellriim nuna cirlakaa, waniwauguq-llu nunam cirlakestii, ukverput.

⁵Kituuga tauna nunam cirlakestii? Taunguuq Jesus-aam ukveqestii, Agayutmun Qetunraqucianek.

⁶Wani-wa tauna merkun augkun-llu tekitelleq, Jesus Christ-aq, merkun kiingan pivkenani, tau͡gaam merkun augkun-llu.

⁷Anerneq-llu nallunairilriaruuq, tua-i Anerneq piciungami.

⁸Pingayuugut nallunairilriit: Anerneq, meq, auk-llu, ukut-llu pingayun pillgutkut.

⁹Ciuniuqumteggu yuut nallunairutiit, Agayutem nallunairutii angenruuq, maa-i man'a Agayutem nallunairutii, Qetunrani nallunairutkellruaku.

¹⁰Kina imna ukvequni Agayutem Qetunraanun nallunairutengqertuq ellmini. Kia-llu Agayun ukveqenrilkuniu iqlungalriarurtaa, ukveqenrilamiu Agayutem nallunairutii Qetunraa pitekluku.

¹¹Maa-i-llu Agayutem nallunairutii, unguvamek nangyuilngurmek cikiumacimten̄ek, tamana unguva Qetunraantuq.

¹²Qetunram pikestii unguvamek pingqertuq, pikenricestii-llu unguvamek piituq.

¹³Makunek igarvikamci Agayutem Qetunraan atranun ukvelriani, nallunritesqelluci unguvangqerrucirpecen̄ek nangyuilngurmek.

¹⁴Elliini civuuratailamta canek kaigakumta elliin pisqutkekiinek, niicimallerkarput nalirrukenritarput.

¹⁵Tua-i-llu nallunrilkumteggu niicimalaucirput kaigatemten̄ek, tuaten-llu nallunritarput kaigatvut elliinek ak'a unakumaricianek.

¹⁶Yuum ilani tangvakuniu assiilngirtelluku tuquarkautngunrilngurmek, kaigaciiqaa, Agayutem-llu unguvamek cikirciqaa tuquarkautngunrilngurmek assiilngilleq. Assiilngurtangqertuq tuquarkautngulriamek; qanenritua tuatnalria piicautelaasqelluku.

¹⁷Tamarmeng elluanrilnguut assiilnguugut, tau͡gaam assiilngurtangqertuq tuquarkautngunrilngurmek.

¹⁸Nallunritukut kina imna Agayutkun yuurtellria assiilngirturngaituq, tau͡gaam Agayutem Qetunraan tegumiaqaa, assiilngurmun agturcetevkenaku.

¹⁹Nallunritukut Agayutmun yuk'ucimten̄ek, ellarpak-llu tamarmi assiilnguum piniantuq.

²⁰Nallunritukut Agayutem Qetunraan tekitellrucianek, elliin-llu ayuqucingevkaraakut nallunrirtelluku piciulria; wangkuta-llu elliinetukut piciulriami Qetunraani Jesus Christ-ami. Ellii piciulriaruuq Agayun, unguvauluni-llu nangyuilnguq.

²¹Irniayaamaa, negurciki agayutnguat.