Read Yupik Judges 10 Bible Online

Judges 10 - Yupik bible

Judges 10

¹Abimelech-aam tuqullran kinguakun Tola, Puah-m qetunraa, Dodo-m tutgarii, tekituq Israel-aaq aviucarturluku. Kingunerluni kinguvellgutkellriarinek Issachar-am uitaaqluni Shamir-aami pengulilriami nuniini Ephraim-aam.

²Ciuliqagtekellrua Israel-aam allrakuni yuinaq pingayunek cipluku (23). Yuunrirluni-llu tungmagcimaluni-llu Shamir-aami.

³Kinguakun-llu Tola-m piurtuq Jair-aq Gilead-aamek. Taum ciuliqagtaa Israel-aaq allrakuni yuinaq malrugnek cipluku (22).

⁴Qetunrangqellruuq-llu yuinaq qulmek cipluku (30) ayagaqluteng yuinaq qulmek cipluku (30) ciulvagteggun. Nunarpauterluteng yuinaq qulmek cipluku (30) Gilead-aami, cali aterpagcimaluteng nunacuarautainek Jair-am.

⁵Jair-aq-llu yuunrirtuq, tungmagcimaluni-llu Kamon-ami.

⁶Ataam cali Israelite-at assiilngirtut ATANERMUN kevgiurluki-llu Baal-at Ashtartes-aat-llu, Syria-m-llu agayutai, Sidon-am, Moab-am, Ammon-aat, Philistia-m-llu. Cakaaraat ATANEQ elliinun-llu agayunanrirluteng.

⁷Taumek ATANREM qenrutengkai Israelite-at, Philistine-anun-llu, Ammonite-aanun-llu cirlakevkarluki.

⁸Allrakuni akimiaq pingayunek cipluku (18) calirpagcetait nanglluki-llu Israelite-at uitalriit Amorite-at nuniitni calaralirnerani Jordan-aam Kuigan Gilead-aami.

⁹Kiituan-llu Ammonite-at qeraraat Jordan-aaq anguyagyarturluki kinguvellgutkellriartai Judah-m, Benjamin-aam, Ephraim-aam-llu. Israel-aaq angtuamek cakviurluni.

¹⁰Tua-i Israelite-at qayagaut ATANERMUN qanerluteng-llu, “Assiilngillruukut elpenun, cakaallruamteggen, Agayutemtaa, agayuvikaqluki-llu Baal-at.”

¹¹ATANREM-llu waten kiugai: “Egypt-aarmiut, Amorite-at, Ammonite-at, Philistine-at,

¹²Sidonian-aat, Amalekite-at, Maonite-at-llu caknaavkallruiceci, elpeci-llu qayagallruuci wangnun. Anirtullrunritamci-qaa ellaitnek?

¹³Tau͡gaam elpeci cakaallruavcia agayuvikluki-llu allat agayutet; taumek wiinga aviutenqiggngaitamci.

¹⁴Ayagluci qayagaci agayutnun cucukellerpecen̄un. Ellaitnun aviutevkarci arenqiallugutmun tekiskuvci.”

¹⁵Tau͡gaam Israel-aam yui qanertut ATANERMUN, “Wangkuta assiilngillruukut. Piyullerpegun pikut, tau͡gaam kaigavikamteggen, anirturkut uumi ernermi.”

¹⁶Tua-llu au͡g'arait ilakumanrilnguut agayutnguarit agayuvikluku-llu ATANEQ; umyuarrlugcaranguq-llu Israel-aam cakviullra pitekluku.

¹⁷Tua-llu Ammonite-at uptut anguyallerkameggnun, pelateka'arluteng-llu Gilead-aami. Israel-aam-llu yui quyurtut, pelateka'arluteng-llu Mizpah-mi Gilead-aami.

¹⁸Tuani yui ciuliqagtai-llu Israelite-am kinguveqellriari, ellmeggnun apyutut, “Kia ciuliqagciiqau anguyak Ammonite-anun? Kina imna pilria ciuliqagten͞gurciiquq Gilead-aam yuinun.”