Read Yupik Judges 11 Bible Online

Judges 11 - Yupik bible

Judges 11

¹Jephthah, Gilead-aarmiu alingunani anguyagta, qetunraqellrua akissum. Atii Gilead-aaq

²allanek cali qetunrarluni nuliamikun, angliameng-llu, ayagcetaat Jephthah enemeggnek. Qanrulluku, “Elpet paitangengaituten atamten̄ek; allam arnam qetunraqaaten.”

³Jephthah-llu qimagtuq anelgutminek Tob-armiungurrluni-llu. Tuani cautngunrilngurnek angutnek ilalinguq, taukut-llu maligquralaraat natmun ayallra tamalkuan.

⁴Piinanermeggni atatakuan Ammonite-at anguyagtut Israel-aanun.

⁵Waten piata, ciuliqagtai Gilead-aam ayagtut ut'rucarturluku Jephthah Tob-am nuniinek.

⁶Qanertut elliinun, “Tailuten ciuliqagcarturkut, Ammonite-at anguyagniaput.”

⁷Tau͡gaam Jephthah kiuguq, “Elpeci eq'ukellruavcia cakneq ayagcetellruavcia atama eniinek? Ciin waniwa wangnun taiceci arenqiallugtellerpecen̄i?”

⁸Qanertut-llu Jephthah-mun, “Wani-wa caugamteggen maligcesqelluta anguyagluki-llu Ammonite-at ciuliqagcesqelluki-llu Gilead-aam yui tamalkuita.”

⁹Jephthah-m qanrutai, “Ut'ruskuvcia anguyaasqelluki Ammonite-at ATANREM-llu cirlakivkaqanga, ciuliqagteksaguciiqavcia.”

¹⁰Taukut kiugut, “Umyuallguciramteggen. ATANEQ nallunricestekarput.”

¹¹Tua-i Jephthah-m maligtai ciuliqagtai Gilead-aam, yuut-llu ataniurteksagutaat ciuliqagteksagulluku-llu. Jephthah-m-llu qanrutkai tamalkuita pisqumallni Mizpah-mi ATANREM takuani.

¹²Tua-llu Jephthah kevganek ayagceciuq angayuqratnun Ammon-aarmiut qanresqelluki, “Camek qanekluarautengqercit wangkutnun? Ciin nunaput anguyagyarturciu?”

¹³Angayuqrata Ammon-aarmiut kiugai Jephthah-m kevgai, “Israelite-at anllermeggni Egypt-aamek, nunautaillruatnga Arnon-aam Kuiganek ayagluku Jabbok-aam Kuiganun Jordan-aam-llu Kuiganun. Taumek wani-wa utercetnarqan nepailngurkun.”

¹⁴Jephthah-llu ataam kevganek ayagceciuq Ammon-aarmiut angayuqratnun

¹⁵waten kiuluku: “Piciunrituq Israel-aamun tegullruniluku Moab-am nunii, wall'u Ammon-aarmiut nuniit.

¹⁶Waten pillruuq: Israelite-at unitellermeggni Egypt-aaq, ayallruut yuilqukun mertailngurkun nunakun Kangiqutaanun Aqaba-m tekilluteng-llu Kadesh-aamun.

¹⁷Tua-llu ayagcecillruut kevganek Edom-aam angayuqranun apelcirnaluteng nunii tumekluku kituryugluteng. Tau͡gaam Edom-aam angayuqran pisqumallrunritai. Cali-llu aptaat Moab-am angayuqra, tau͡gaam elliin-llu nunamikun ayaasqumanritai. Tua-i Israelite-at uitallruut Kadesh-aami.

¹⁸Tua-llu egilraullruut qau͡gyarrlainarkun yuilqukun, uivluku Edom-aam nunii Moab-am-llu nunii tekisvimeggnun calaralirnera Moab-am, akilirnerani Arnon-aam Kuigan. Tuani qavartartut, tau͡gaam qeranritaat Arnon-aaq cuqiin engelekngaku Moab-am.

¹⁹Tua-llu Israelite-at ayagcecillruut qanerten̄ek Sihon-aamun, Amorite-amun angayuqranun Heshbon-aam, apelcirluku tumekluku nunii kituryugluteng nakmiin nunameggnun.

²⁰Tau͡gaam Sihon-aam tuatnasqumanritaa Israel-aaq. Quyurtai-llu tamalkuita anguyagten̄i, pelateka'arluteng-llu Johaz-ami, anguyagluki-llu Israel-aat.

²¹Tau͡gaam ATANREM, Agayutiita Israel-aat, Israelite-anun cirlakevkarai Sihon-ankut anguyagtai-llu.

²²Piksagutellruat-llu tamalkuan nuniit Amorite-at Arnon-aamek ungalalirnermi Jabbok-aamun negeqvalirnermi mertailngurmek-llu yuilqumek keggaknelirnermi Jordan-aamun calaralirnermun.

²³Cuna-wa ATANRULLRULRIA, ayagcecestellrat Amorite-at yun'i pitekluki, Israelite-at.

²⁴Elpet-qaa utermun tegungnaqeqataran? Pikurarru Chemosh-aam agayutvet cikiutellra elpenun. Wangkuta tau͡gaam pikciqaput tamalkuita ATANREM, tegullri pitekluta.

²⁵Tua-i-qaa elpet umyuartequten assinruyukluten Balak-aami Zippor-aam qetunraani, angayuqrani Moab-am? Israel-aaq unayaqeqaqsaitaa akiuresqelluni, Anguyagyartuqsaitaakut-qaa?

²⁶Allrakuni yuinarni akimiarni (300) Israel-aam yirturallruak Heshbon-aankuk Aroer-aaq-llu, nunacuaraat-llu avatiinelnguut, tamalkuita-llu nunarpiit Arnon Kuigem cen̄iinelnguut. Ciin ak'a teguksaiciki tamatum nalliini?

²⁷Qang'a, wiinga picurlagmek piksaitamken. Elpet alartuten anguyallerpegun wiinga. ATANEQ cuqcisten͞guuq. Ernerpak cucuklirciquq aipaagnek Israelite-at wall'u Ammonite-at.”

²⁸Tau͡gaam Ammonite-at angayuqrata pamatekenritaa qanrucartuumallni Jephthah-mek kingunelegmek.

²⁹Tua-llu anernera ATANREM tut'uq Jephthah-mun. Tumekluku-llu Gilead-aaq Manasseh-llu ayagtuq uterrluni-llu Mizpah-mun Gilead-aamelngurmun kiturluni-llu Ammon-aamun.

³⁰Jephthah-m-llu akqaa ATANEQ: “Cirlakevkaquvki Ammonite-at,

³¹ekuagiciqua elliitekluku ciumek anluni enemnek pairrsaagtemnek, ut'reskuma cirlakillemnek. Elliitekciqaqa yuk tauna elpenun ekuagilua.”

³²Tua-i Jephthah-m qeraraa kuik callugyarturluki Ammonite-at, ATANREM-llu cirlakivkaraa.

³³Anguyagai tamalkuita Aroer-aamek ayagluni Minnith-aam nuniinun, quyurmeng nunarpiit yuinauluteng (20), yaaqsingraan-llu tekilluku Abel Keramun-aaq. Amlleqapiaraat tuqucimaut, Israel-aam-llu cirlakai Ammonite-at.

³⁴Jephthah utercan kingunerminun Mizpah-mun, pania an'uq pairrsaagluku kallakutangqerrluni yurarluni-llu. Tauna elliin kiingan yukaa.

³⁵Tangrramiu, aturani allgurai angniitem ugaani qanerluni-llu, “Arenqiapaa, panimaa! Ircaquqa navguran! Ciin elpengua nangteqnamek taicesteka? Piciulriamek akqutmek ATANERMUN taqutellruunga, angitesciiganaku-llu!”

³⁶Arnaq qanertuq, “Akqillrukuvet ATANERMUN, aturru qaillun wangnun piciqnillren, ATANREM akinaurutmek cikillruaten inglukestevnun, Ammonite-anun.”

³⁷Tau͡gaam atani apelciraa, “Uumek ataucimek pivkarnga. Kiimetevkarnga iralugni malrugni, yugnikek'nganka malikluki ayaganiartua ingrini angniilutekluku tuqullerkaqa angutmun agtuumavkenii.”

³⁸Qanrutaa-llu ayaasqelluku ayagtelluku-llu iralugni malrugni. Arnaq-llu yugnikek'ngani-llu mayurtut ingrinun angniilutekluku-llu tuquarkaurcan kassuupailegmi irniarunani-llu.

³⁹Iraluk malruk kinguagni utertuq ataminun. Piuq-llu akqillermitun ATANERMUN, tuquuq-llu angutmek agtuumavailegmi. Man'a ayagneqaa piciryaram Israel-aami

⁴⁰arnait Israel-aat ayalararkaurrluteng allamiaquaqan ernerni cetamani angniilutekluku qiateksarturluku pania Jephthah-m Gilead-aarmium.