Read Yupik Judges 12 Bible Online

Judges 12 - Yupik bible

Judges 12

¹Ephraim-aam anguyagtai uptut anguyallerkameggnun; qeraraat-llu Jordan-aam Kuiga Zaphon-aamun qanerluteng-llu Jephthah-mun, “Ciin qerallrusit anguyagyarturluki Ammonite-at unayaqevkenata? Enen ekuavkarciqaput tapqulluten.”

²Tau͡gaam Jephthah-m qanrutai, “Wiinga yuunka-llu Ammonite-at-llu cakneq kiutaagutellruukut. Qayagaullruyaaqamken, elpet tau͡gaam aviutengnaqellrunritarpenga ellaitnek.”

³Tangrramku piqatanrilucin, unguvaka qevvluku, qerallruunga anguyagyarturluki, ATANREM-llu cirlakevkarai wangnun. Ciin-mi tua-i taisit, anguyagyarturlua-qaa?

⁴Tua-llu Jephthah-m quyurtai tamalkuita anguyagtai Gilead-aam, callugluki-llu Ephraim-aam anguyagtai cirlakluki-llu. (Ephraim-aarmiut qanellruluteng, “Elpeci Gilead-aarmiuni Ephraim-aami Manasseh-mi-llu, cakaarilriaruuci Ephraim-aamek!”)

⁵Ephraim-aarmiut tua-i anagturcetenritengnaqluki, Gilead-aarmiut teguit qeraryarai Jordan-aam. Ephraim-aarmiut iliit qerassaalria apelcirqan qeraryugluni, Gilead-aarmiut aptelalliniit, Ephraimite-auguten-qaa? Qanraqan, “Qang'a,”

⁶pilalliniat waten qanresqelluku “Shibboleth,” tauna-llu qanerluni, “Sibboleth,” assirluku aperciigalamiu. Teguluku tua-i tuqutelalliniat qeraryarat iliitni Jordan-aam Kuigani. Taum-llu nalliini tiissitsaat yuinaak malruk malrugnek cipluku (42,000) Ephraim-aarmiut tuqutaullruut.

⁷Jephthah-m ciuliqagtellrua Israel-aaq allrakuni arvinlegni. Tua-i-llu tuquluni tungmagcimaluni-llu Gilead-aami.

⁸Kinguakun Jephtham-am, Ibzan-aam Bethlehem-aarmium ciuliqagtaa Israel-aaq.

⁹Qetunrangqellruuq yuinaq qulmek cipluku (30), panigluni-llu yuinaq qulmek cipluku (30). Uingevkallrui panini tungayakenrilkaitnek tailluni-llu nasaurlurnek yuinaq qulmek cipluku (30) tungayakenrilkaitnek qetunrarmi nulirkaitnek. Ibzan-aam ciuliqagtaa Israel-aaq allrakuni malrunlegni,

¹⁰tua-i-llu yuunrirluni tungmagcimaluni-llu Bethlehem-aami.

¹¹Kinguakun Ibzan-aam, Elon-aam Zebulun-aarmium ciuliqagtaa Israel-aaq allrakuni qulni.

¹²Yuunrirtuq-llu tungmagcimaluni-llu Aijalon-aami nunautiini Zebulun-aam.

¹³Kinguakun Elon-aam, Abdon-aam Hillel-aam qetunraan Pirathon-aarmium ciuliqagtaa Israel-aaq.

¹⁴Qetunrangqellruuq yuinaagnek malrugnek (40) tutgararluni-llu yuinaq qulmek cipluku (30), taukut-llu ayalartut yuinaat pingayun qulmek cipluku (70) ciulvagteggun. Abdon-aam Israel-aaq ciuliqagtaa allrakuni pingayunlegni,

¹⁵tua-i-llu yuunrirluni tungmagcimaluni-llu Pirathon-aami nunautiini Ephraim-aam pengulilriami nuniitni Amalekite-at.