Read Yupik Judges 13 Bible Online

Judges 13 - Yupik bible

Judges 13

¹Israelite-at ataam assiilnginqigtut ATANERMUN, elliin-llu Philistine-anun atanirturcetai allrakuni yuinaagni malrugni (40).

²Angucetangqellruuq-llu aterluni Manoah-mek nunacuariinek Zorah-m. Ilakluku kinguvellgutkellriarin Dan-am. Nulirra qingayuunani irniangesciigani.

³ATANREM-llu an'gilaan alairvikaa arnaq qanerluni-llu, “Irniangesciigatellruuten, tau͡gaam ak'anivkenak qingarciquten qetunrangluten-llu.

⁴Murilkenqegcaarqina wine-amek tuknilriamek-llu merkamek meq'e'ryaqunak, nereksaunak-llu inerquusngalriamek,

⁵qetunrarpet yuurtellran kinguani, nuyai kepqeryaqunaki, waniwa ernermek yuurtellerminek ayagluni allakaumaciquq tan'gaurluq Agayutmun nazirite-auluni. Elliin ayagnirciiqaa aviucimallerkaat Israel-aat, Philistine-anek.”

⁶Arnam-llu ullagluku qanrutaa uini, “Agayutem kevgaa taillruuq wangnun, tangellra-llu alingnartauq kegginaatun an'gilaan Agayutem. Aptellrunritaqa naken pillrucianek, qanrutenritaanga-llu at'minek.

⁷Tau͡gaam qanrutaanga qingarciqnilua qetunrangciqnilua-llu. Qanrullua-llu mer'esqevkenii wine-amek wall'u tuknilriamek merkamek, wall'u inerquusngalriamek neresqevkenii, tua-i-wa-gguq tan'gaurluq allakaumaciqngan Agayutmun nazirite-auluni unguvallran taktaciatun.”

⁸Tua-llu Manoah piicagtuq ATANERMUN, “ATANEQ, kevgaa Agayutem ayagcetellren ataam taivkarru wangkugnun qanrutellunuk-llu qaillun pillerkamegnek tan'gaurluq yuureskan.”

⁹Agayun-llu piuq Manoah-m apelcillratun, an'gilaa-llu ataam taiguq arnamun naucetaarvigmi aqumgainanrani. Uingan Manoah-m aipirpek'naku,

¹⁰tua-i egmian aqvaqurluni ullagaa qanrulluku-llu, “Atam tangerqerru, angun tailleq wangnun amatiigni alainqigtuq wangnun.”

¹¹Manoah-llu nangertuq maliggluku-llu nuliani. Ullagluku angun aptaa, “Elpet-qaa taunguuten angun qalartelleq nuliamnun?” “Aa-ang,” kiuguq.

¹²Manoah-llu qanertuq, “Kitaki, qanelten piciureskata, qaillun tan'gaurluq piarkauga? Qaillun ayuqluni yuuciqa?”

¹³An'gilaa-llu ATANREM kiuguq, “Nuliarpet pinritevkenani atuqiliki tamalkuita elliinun qanellrenka.”

¹⁴Ner'arkaunrituq wine-arkat nauviatnek kingunelegmek; mer'arkaunrituq wine-amek wall'u tuknilriamek merkamek, wall'u nerluni inerquusngalriamek. Tamalkuita alerquutellrenka elliinun maligtaquarkaugai.

¹⁵Nalluluku ATANERMUN an'gilaqucia, Manoah-m qanrutaa, “Uitaqaqaa ayagpek'nak. Keniuteqernaamegten piyagarmek qusngirngalnguyagarmek.”

¹⁶Tau͡gaam an'gilaq qanertuq, “Uitakuma, nerngaitua neqevtegnek. Tau͡gaam keniryukuvgu, ekuavkaqiu elliitnguluku ATANERMUN.”

¹⁷Manoah qanertuq, “Qanruskuk aterpenek, qanelten piciureskata nanrarniaramegten?”

¹⁸An'gilaq aptuq, “Ciin atqa nallunriryugcetgu? Atruuq irr'inaqluni.”

¹⁹Tua-i Manoah tegutuq piyagarmek qusngirngalnguyagarmek mukaarkamek-llu, elliitekluki-llu teggalqumi ekuavigmi ATANERMUN calilalriamun irr'inarqellrianek.

²⁰Keneq-llu mayullrani qulmun ekuavigmek, Manoah-nkuk nuliani-llu tangrraak ATANREM an'gilaa mayullrani qiliim tungiinun kenrem akuliikun. Manoah-m taringartaa tauna angun ATANERMUN an'gilaqucianek, elkek-llu nuliani-llu nunamun put'uk. Tangenqigtenritaak-llu an'gilaq.

²¹An'gilaa-llu ATANREM alainqigtenrituq Manoah-mun nulirranun-llu. Tua-llu Manoah-m nallunriraa an'gilaqucianek ATANERMUN.

²²Manoah-llu qanertuq nuliaminun, “Ilumun tuquarkaurtukuk, tangellruamegnegu Agayun!”

²³Tau͡gaam nulirra kiuguq, “ATANREM tuqucullrukunikuk, ciuniullruyanritai elliitepuk; tamalkuitnek-llu makunek nasvicallrunritaakuk, wall'u waten makunek qanrucarpek'nanuk.”

²⁴Arnaq-llu irniuq qetunrangluni acirluku-llu Samson-aamek. Mikelnguq angliuq ATANREM-llu atawaqercecimaa.

²⁵ATANREM pinian pinirivkaraa, Zorah-nkuk Estaol-aaq-llu akunliigni Pelatekarviani Dan-am uitallrani.