Read Yupik Judges 14 Bible Online

Judges 14 - Yupik bible

Judges 14

¹Erenrit iliitni Samson-aaq atrartuq Timnah-mun, tuani-llu tangertuq ayagyuamek Philistine-amek arnamek.

²Utercami-llu angayuqaagni qanrutak, “Philistine-amek arnamek pitangqertuq Timnah-mi tangllemnek. Aqvat'gu wii piteklua; kassuucugaqa.”

³Tau͡gaam atiin aaniin-llu aptaak, “Ciin tua-i taukunun ayagluten agayumanrilngurnun Philistine-anun nulirkassaakatarcit? Kitumek-qaa nalaqucugnganrituten nakmiin tungayamten̄ek, yuullgutemten̄ek?” Tau͡gaam Samson-aam qanrutaa atani, “Taumek arnamek aqvacicesqumaunga elpenun. Assikaqa.”

⁴Angayuqaagken nallullruak ATANERMUN ciuliqagucia Samson-aaq waten pisqelluku, waniwa ATANEQ yuarami pillerkamek inglulirnaluki Philistine-at. Taum nalliini Philistine-at Israel-aaq ataniullruat.

⁵Tua-i Samson-aaq atrartuq angayuqaagni-llu Timnah-mun. Ayallermeggni wine-at naucetaarviat tumekluku, niituq uirranilriamek yugtutulimek taqnerurteksailngurmek.

⁶Alqunaq ATANREM pinian Samson-aaq pinirivkaraa, allguraa-llu yugtutuli unatmikun, qusngirngalnguyagartun pitarrluku. Tau͡gaam angayuqaagni qanrutenritak tuaten pillerminek.

⁷Tua-llu atrarluni qanellgutkaa neviarcar, elliin-llu assikaa.

⁸Erenrit amllenrilnguut kinguatgun Samson-aam ullagluku kassuucarturaa. Ayainanermini tumyaraq unilluku paqtaa tuqutellni yugtutuli, alangaartuq-llu taum temiin iluani tangllermini 'vegtarnek neqkautiitnek-llu.

⁹Elliin-llu cipegtaa evegtaat neqiit unatminun ayagtuq-llu tuaken nerluni. Ullagak-llu aatani aanani-llu tuaken-llu cikirlukek. Elkenka-llu neraak, tau͡gaam qanrutenritak tegullruniluku evegtaat neqiit yugtutulim temiinek.

¹⁰Atii tua-i atrartuq arnam eniinun, Samson-aaq-llu nerevkariuq tuani. Tuaten yun'erraat piciryaraqngatgu.

¹¹Philistine-at-llu tangrramegteggu, ayagceciut yuinaq qulmek cipluku (30) ilakainek.

¹²Samson-aaq-llu qanertuq ellaitnun, “Qanrutqernaamci taringesciigatnarqellriamek. Qanrucugngakuvcia caucianek nerevkaritem erenrin malrunlegen iluatni, cikirarkaugamci yuinaq qulmek cipluku (30) aturaqegtaarnek yuinaq-llu qulmek cipluku (30) cimiritkavcen̄ek aturaqegtaarnek

¹³tau͡gaam qanrucesciigalkuvcia caucianek, elpeci cikirciqerpecia yuinaq qulmek cipluku (30) aturaqegtaarnek, yuinaq-llu qulmek cipluku cimiritkamnek aturaqegtaarnek.” “Qanruskut apyutevnek,” ellait qanertut “Niitnaurput.”

¹⁴Samson-aaq-llu qanertuq, “Nertulimek an'uq neqkaq. Pinilriamek-llu an'uq neqnirqellria.” Ellaita-llu ernerni pingayuni cauciitaat kiutii.

¹⁵Erenrit-llu cetamiitni qanertut Samson-aam nulirranun, “Qarusgu uin usvituyarulluku qanrutnauraakut caucianek taringesciigatnarqellria. Pinrilkuvet ekuavkarciqaput atavet enii tapeqluten. Elpetek-qaa maavet kelellruavkut uayarnaluta?”

¹⁶Tua-i Samson-aam nulirran aluviliurluni ullagaa qanerluni-llu, “Kenkenritarpenga! Eq'ukarpenga! Qanrutellruaten yugnikek'nganka apyutmek wiinga tau͡gken qanrutevkenii caucianek.” Ellii-llu qanertuq nuliaminun, “Atam qanruteksailkegka-llu ataka aanaka-llu. Ciin tua-i elpet qanrucarciken?”

¹⁷Qiatekaa-llu tamana ernerni malrunlegni nerevkaritem taktaciatun. Tau͡gaam erenret malrunelgatni qanrutaa taringesciigatnarqellriim caucianek, cakneq apqaurumiini. Tua-i-llu arnam qanrulluki Philistine-at.

¹⁸Tua-llu erenret malrunelgatni, Samson-aaq qavarviminun pivailgan, angutet tuaken nunarpagnek qanrutaat, “Ca neqnirqenruyarta yuilqurmiutarmi paatakaami? Ca pininruyarta yugtutulimi?” Ellii-llu qanertuq ellaitnun, “Itumcillrunrilkuvci nunamek kuluvauteka aturluku, apyutma kiutii nallunrillruyanritaci.”

¹⁹Alkunaq-llu pinian ATANREM pinirivkaraa, atrarluni-llu Ashkelon-aamun, tuani tuquciuq yuinaq qulmek cipluku (30) angutnek uayarluki-llu akluitnek tunai aturaqegtaaraat taukunun taringesciigatnarqellriim kiustellrinun. Tuaten pirraarluni, utertuq kingunerminun, qenerrluni cakneq tamatumek picirluni,

²⁰nulirra-llu tunumallrulliniluni kassuutellragni elliin caniani nangengqallermun.