Read Yupik Judges 15 Bible Online

Judges 15 - Yupik bible

Judges 15

¹Atatakuan, mukaarkanek quyurciyaram nalliini, Samson-aam sen̄irtaa nuliani piyagarmek qusngirngalngurmek payuggluku. Qanertuq-llu taum atiinun, “Iteryugtua nuliama qavarvianun.” Tau͡gaam nulirran atiin itresqumanritaa.

²Qanrulluku-llu Samson-aaq, “Ilumun umyuarteqellruunga elpenun cakneq eq'uksukluku, taumek cikiutekellrukeka yugnikekevnun. Tau͡gaam kinguqlia kenegnanruuq, piukuvgu nuliqsagusgu.”

³Samson-aaq qanertuq, “Maa-i avalitngungaitua Philistine-anun, camek pillemnek.”

⁴Tua-i ayagtuq tegukengluni-llu akimiarnek yuinarnek (300) kaviarnek. Malruuqaqluki, pamyuit qillerqaarluki elliiguq kumarutnek qillernernun.

⁵Kumarcimariamiki-llu kumarutet, kaviaret ayagcetai Philistine-at mukaarkanek nauceciiviitnun. Waten piluni ekuavkarai quyurcimalriit kiingita pivkenaki, naumalriit-llu mukaarkat quyurcimaksailnguut ekuavkarai. Olive-aat-llu napait cali ekuavkarluki.

⁶Philistine-at apcameng kitumun man'a pillrucianek, nallunriraat Samson-aamun pillrucia tua-i-wa cakian, angutem Timnah-rmium, nulirra tunlliniaku yugnikek'ngaanun Samson-aam. Philistine-at tua-i mayurtut, ekuavkarluku-llu tuqutaat tauna arnaq atiin-llu enii cali ekuavkarluku.

⁷Samson-aam qanrutai, “Waten ayuqelliniuci! Akqiunga taqngaitua-llu tamarpeci akinaurnatkamnun!”

⁸Curugai-llu aaqevkenani tuqulluki-llu amlleret. Ayagtuq-llu uitaluni-llu qerranqumun pen̄amelngurmun Etam-aami.

⁹Philistine-at-llu mayurluteng pelateka'artut Judah-mi, curugluku-llu nunarrii Lehi-am.

¹⁰Judah-m-llu yuin aptait, “Ciin curukarcecikut?” Ellait-llu qanertut, “Taigukut teguyarturluku Samson-aaq, elliin pillran ayuqiinek pinaluku.”

¹¹Tua-i ukut pingayun tiissitsaat (3,000) angutet atrartut qerranqumun pen̄amelngurmun Etam-aami qanerluteng-llu Samson-aamun, “Nalluan-qaa Philistine-at atanirturten͞guciit wangkutnun? Ciin waten pisikut?” Ellii kiuguq, “Ellaita pillruciacetun, wiinga-llu tuaten pillruanka.”

¹²Qanrutaat, “Wangkuta taigukut qillerqessarturluten, tunenaluten Philistine-anun.” Samson-aaq qanertuq, “Akqicia elpeci tuqusngaitnilua.”

¹³“Aa-ang,” ellait qanertut, “kiingan qillerciiqamteggen tunluten-llu Philistine-anun; tuqusngaitamteggen.” Tua-i qillertaat malrugnek nutaragnek ilavkugnek, mayuulluku-llu teggalqumek.

¹⁴Tekican-llu Lehi-amun, Philistine-at pairrsaagaat aqvaqurluteng, qayagpagaluku. Alqunaq ATANREM pinian piniriqercetaa, ilavkuut-llu talligmini unatmini-llu kevkarqai elegumalriatun pelacinagtun pitarrluki.

¹⁵Tua-llu nalaqutuq nutaragnek agluqugkenek ciulviim tuqunerram. Tegulukek-llu taukuk saskuklukek tuquciuq tiissitsaanek (1,000) angutnek.

¹⁶Taumek Samson-aaq aturtuq, “Ciulviim agluqugken'gun tuquciunga tiissitsaanek angutnek; Ciulviim agluqugken'gun quyurtanka qalliryaggluki.”

¹⁷Taum kinguakun, egtak agluquk. Waten mat'um pivillra atengqertuq “Ramath Lehi.”

¹⁸Samson-aaq-llu cakneq meqsuum tekitaa, taumek qayagauq ATANERMUN qanerluni-llu, “Cikillruavnga uumek angtuamek aviutmek; tua-llu-qaa wani-wa tuquqatartua quliglua, teguaqumalua-llu ukutgun agayumanrilngurteggun Philistine-atgun.”

¹⁹Agayutem-llu ikirtaa qerratalria nunami tuani Lehi-ami, tuaken-llu meq an'uq. Samson-aaq-llu mertuq ayuqucia-llu ataam assiriluni. Tauna-llu ulevlaq atengqertuq Hakkore-amek; tuantuq cali Lehi-ami.

²⁰Samson-aam ciuliqagtaa Israel-aaq allrakuni yuinarni (20) Philistine-at ataniullratgu nuna.