Read Yupik Judges 16 Bible Online

Judges 16 - Yupik bible

Judges 16

¹Erenret iliitni Samson-aaq ayagtuq Philistine-at nunarpiitnun Gaza-mun, tuani-llu tangertuq akissumek, inartellgutekluku-llu.

²Gaza-rmiut-llu nallunriraat Samson-aam tuanlucia, tua-i avatairaat nuna Samson-aaq-llu utaqaluku unugpak nunarpiim casguani. Nepailcaartut unugpak, umyuarteqluteng, “Utaqanaurput erqaarallerkaa, nutaan tuqutniarput.”

³Tau͡gaam Samson-aaq inangqauq unuum qukarnatkaanun. Tua-i-llu maktuq tegua-llu nunarpiim casgua amugluku-llu ikirtuqaa, naparyak, kelucaa-llu tapqulluki, tua-i tamalkuan. Qugluki-llu ayaulluki yaaqvanun kangranun pengum Hebron-aamun caumalriim.

⁴Uum kinguakun, Samson-aam kenegyagutaa arnaq Delilah-mek at'lek, Kuignaiyuani Sorek-aam uitalria.

⁵Talliman Philistine-at angayuqat ullagaat Delilah qanerluteng-llu, “Qarusgu Samson-aaq usvituyarulluku qanrutevkarluten-llu ciin pinissiyaagucianek qaillun-llu wangkutnun cirlaksugngallerkarput, qillerqessugngallerkarput, pekviirulluku. Ataucitaarluta-llu cikirciqamteggen tiissitsaaq yuinarnek tallimanek cipluku (1,100) qerrirlinek.”

⁶Tua-i Delilah qanertuq Samson-aamun, “Qanrutqernga camun waten pitaluten pinircecucirpenek. Kia-llu qillerrluten pekviiryukuniten qaillun piartaten?”

⁷Samson-aaq kiuguq, “Qillreskatnga malrunlegnek nutaranek urluvrem qelutainek kinerciumaksailngurnek, piniaciiqua, allatun yugtun ayuqlua.”

⁸Tua-i Philistine-at angayuqrita taitaat Delilah malrunlegnek nutaranek urluvrem qelutainek kinerciumaksailngurnek, elliin-llu qillertaa taukunek.

⁹Tuani angutnek utaqalriartangqertuq enem iluqliani, Delilah-llu qayagpagtuq, “Samson-aaq! Philistine-at tikitaatgen!” Tau͡gaam kevkartai urluvrem qelutai pelacinak kep'artelauciatun kenrem agturaqani. Tua-i qanrutkumanrilnguq piniucian naken picia nallunriumanrituq.

¹⁰Delilah-m qanrutaa Samson-aaq, “Atam elpet, anglanitekekevnga, piciunrilngurmek-llu qanrullua. Qanrutqernga kitak qaillun kitumun qillerqessugngacin.”

¹¹Qanrutaa, “Qillreskatnga nutaranek ilavkugnek atuumaksailngurnek, piniaruciiqua allatun yugtun ayuqlua.”

¹²Tua-i Delilah nutaranek ilavkugnek piuq qillerrluku-llu. Qayagpagtuq-llu, “Samson-aaq! Philistine-at taigut!” Angutet-llu utaqaluteng enem iluqliani uitallruut. Tau͡gaam Samson-aam kevkarqai ilavkuut talligminek yualukatun.

¹³Delilah qanertuq Samson-aamun, “Cali anglanitekarpenga piciunrilngurmek-llu qanrullua. Qanrusnga qaillun kitumun qillerqessugngacin.” Samson-aaq-llu qanertuq elliinun, “Piirrikuvki malrunelgurrluki nuyanka 'lumarrissuutekun, cagnilluku-llu nuqcissuutmek, piniaruciiqua ayuqlua-llu allatun yugtun.”

¹⁴Delilah-m tua-i qavangcarluku qavaqercetaa, tegulluni-llu malrunelgurrluki nuyainek piirrii 'lumarrissuutekun. Cagniqaarluku-llu nuqcissuutmek qayagpagtuq, “Samson-aaq! Philistine-at taigut!” Tau͡gaam tupagtuq qavaminek, nuyani-llu amugluki 'lumarrissuutmek.

¹⁵Tua-i arnaq qanertuq elliinun, “Ciin qanlarcit keneknilua, tamana piciunrilengraan? Anglanitekellrurtarpenga pingayurqunek, cali-llu tua-i qanruteksaunii camun piningqercecucirpenek.”

¹⁶Apqaurturaraa-llu unuaquaqan. Mernuyagutqapiaraamiu tamatumek piurallra

¹⁷qanrucaqliraa piciulriamek. “Nuyanka kepumaqayuitut,” qanertuq, “Cikiutekumallruunga Agayutmun nazirite-aulua yuurqaanemnek. Nuyanka kepumakata, pinima uniciiqaanga, piniaruciiqua-llu allatun yugtun ayuqlua.”

¹⁸Delilah-m-llu taringamiu qanruyucini piciulriamek, ayagceciuq qanrucarturtelluki atanerruarit Philistine-at qanerluni, “Taiqerci ataucirqumek. Qanrutaanga piciulriamek.” Tua-llu taigut akit-llu malikluki.

¹⁹Delilah-m-llu qavaqercetaa Samson-aaq ciisqugmi qaingagni taisqiluni-llu angutmek, tauna-llu keputuq Samson-aam malrunelguringalrianek nuyainek. Tua-llu arnam cakneq nangteqevkaraa, pinian unicaku.

²⁰Qayagpagtuq-llu, “Samson-aaq! Philistine-at taigut!” Tupiimi-llu umyuartequq, “Petuirlua anagciqua, ciungani pilallemtun.” Nalluluku ATANERMUN unitellrucini.

²¹Philistine-at-llu teguat, iik-llu qagerrlukek. Atrautaat-llu Gaza-mun, qillerrluku-llu punernernek kalivnernek, calivkarluku-llu miilissuutmi miilivkarluku itercivigmi.

²²Tau͡gaam nuyai naunqigtut.

²³Tua-llu atanerruarit Philistine-at quyurtellruut angnirnaluteng angtuamek-llu elliinaluteng ekuagarkamek Dagon-aamun agayutmeggnun. Aturpagtut, “Agayutemta cikiraakut cirlakutmek inglumten̄un Samson-aamun!”

²⁴Angniameng quyurrluteng, qanertut, “Taivkarciu Samson-aaq, anglanivkarnauraakut.” Anucatgu Samson-aaq itercivigmek, anglanitekaat nangertelluku-llu akunliignun naparyak. Yuut tangrramegteggu, aturpagtut nanrautmek agayutmeggnun: “Agayutemta cikiraakut cirlakutmek inglumten̄un, navgurtellranun nunamta amlleret-llu ilamta tuqurqestellratnun!”

²⁶Samson-aaq-llu qanertuq tan'gaurlurmun tass'uqestem̄inun, “Agturcetqerkek naparyak enem tusnganrek. Tulurviksugagka.”

²⁷Tuani ena muirumallruuq angutnek arnanek-llu. Tamalkurmeng-llu atanerruarit Philistine-at tuantellruut, enem-llu qaingani tayima pingayun tiissitsaat (3,000) uitallruut angutet arnat-llu, tangvalriit Samson-aamek anglanitekluku.

²⁸Tua-llu Samson-aaq piicagtuq, “Artuqailnguq ATANEQ, neq'akia; Agayun, kaigavikamken, taiteqerr'u piniqa nangnermek watua, ataucikun akinaurnaunka Philistine-at iigma qagertellrak pitekluku.”

²⁹Samson-aam-llu teguak qukaqliik naparyak enem nayumiqastek. Inglugtun unatni ellii naparyagnun, cinglukek tuaten

³⁰qayagpagtuq, “Tuqullguteklaki Philistine-at!” Pinini tamalkuan aturluku cing'uq, enem-llu imutai tamalkuita talliman angayuqat tamalkuita-llu yuut tuanelnguut. Samson-aaq tuani tuquciuq amllenritnek tuqucilallmi unguvallermini.

³¹Tua-llu anelgutai tamarmeng-llu ilai atrartut temii aqvaluku. Ut'rutaat-llu tungmaggluku-llu, akuliigni Zorah-nkuk Eshtaol-aq-llu, qunguanun Manoah-m elliin atiin. Ciuliqagtekellrua Israel-aam allrakuni yuinarni (20).