Read Yupik Judges 17 Bible Online

Judges 17 - Yupik bible

Judges 17

¹Angucetangqellruuq aterluni Micah-mek, uitaaqluni pengulilriami nuniini Ephraim-aam.

²Aanani qanrutaa, “Kia teguillraten tiissitsaaq yuinarnek tallimanek cipluku (1,100) qerrirlinek, aniqlaallruan tauna teglengalria. Niitellruamken tuatnallerpeni. Atam, waniwa wii akit nunaqliqanka. Wang'ullruuq taukut tegustellrat.” Aanii-llu qanertuq, “ATANREM atawaqertelliten, qetunramaa.”

³Tunai-llu utertelluki aanaminun, aanii-llu qanertuq, “Aniqlaan tucetnavkenaku qetunramnun, wiinga wangnek umyuaqa tamalkirrluku cikiutekanka qerrirlit akit ATANERMUN. Atuuniartut agayutnguamun muragmek pilimalriamun qalliliumaluni qerrirlimek. Taumek wani-wa utercetanka qerrirlit elpenun.”

⁴Tua-i-llu utertelluki akit aanaminun. Aanii tegutuq yuinarnek qulnek (200) qerrirlinek, tunluki-llu caviliurtem̄un, tauna-llu agayutngualiuq, murauluku qallirrluku-llu qerrirlimek. Elliat-llu Micah-m eniinun.

⁵Una angun Micah nakmiin elliin piminek ciktaarvingqellruuq. Pilillruuq-llu agayutnguanek as'arcen̄a'armek-llu, apertuiguq-llu qetunrami iliitnek agayulirteknaluku.

⁶Tamatum nalliini atanertaitellruuq Israel-aami; yuut-llu tamarmeng elluakekmegteggun yuuluteng.

⁷Taum nalliini ayagyuartangqellruuq Levite-amek uitaaqluni nunarrarmi Bethlehem-aami Judah-mi.

⁸Ayagtuq Bethlehem-aamek yuaryarturluni uitavigkaminek allami nunami. Ayainanermini tekituq Micah-m eniinun pengulilriamun Ephraim-aam nuniinun.

⁹Micah-m aptaa, “Naken tekicit?” Ellii-llu kiuguq, “Levite-augua Bethlehem-aamek Judah-mi, Kiartua nani uitavigkamnek.”

¹⁰Micah qanertuq, “Uitallgucirnga. Alerquasteknaamken agayulirten͞guneqluten-llu, cikilarniamken qulnek qerrirlinek allrakumi, aturanek, neqkarpenek-llu.”

¹¹Ayagyuaq Levite-aq maligutuq uitallgucirnaluku qetunraqellriatun-llu elliini ayuqliriuq.

¹²Micah-m cucukaa agayulirteksugluku, Micah-m-llu eniini uitalangluni.

¹³Micah-llu qanertuq, “Nutaan Levite-amek agayulirtengama, ATANREM cat wangnun assiriciqai.”