Read Yupik Judges 18 Bible Online

Judges 18 - Yupik bible

Judges 18

¹Tamatum nalliini atanertaitellruuq Israel-aami. Taum nalliini kinguvellgutkellriartai Dan-am nunamek yuallruut ellaita piksagulluku tamaavet nunalinaluteng ellait nunautengeksailameng nakmiin pikameggnek kinguvellgutkellriarini Israel-aam.

²Taumek Dan-am yui cucuklirtut tallimanek elluatuulrianek angutnek tamalkuitnek ilakellriit kinguvellgutkellriit ilangaqtaarluki ayagtelluki-llu Zorah-mek Estaol-aamek-llu kingunelget alerqurluki yuvriisqelluku nuna nalluatni. Tekicameng-llu pengulilriamun nuniinun Ephraim-aam, eniini Micah-m uitaut.

³Tuanelnginanermeggni, elitaqaat qanlauciakun Levite-aq ayagyuaq, tua-i ullagluku aptaat, “Calisit maani? Kia maavet taitellruaten?”

⁴Agayulirten͞guneq kiuguq, “Micah-llu pillerkiurangqertukuk taqellranek umyuallguteklua, akililaraanga kevgiuresqelluni agayulirten͞gunrulua elliinun.”

⁵Qanertut-llu elliinun, “Apteqerr'u kitak Agayun ayakatallerput piluaqerarkaucianek.”

⁶Agayulirten͞gunrem-llu kiugai, “Camek umyuarniurnarqenritaaci. Ayallerkarci ATANREM tegumiaqaa.”

⁷Tua-i talliman angutet ayagtut nunarrarmun-llu Laish-aamun tekilluteng. Tangrraat-llu qaillun yuut tuani uitaciat aarniurpek'nateng Sidon-aarmiucetun. Qinuilnguuluteng nepailnguuluteng yuut, camek-llu ilameggnun qanleravkenateng; nuuqitevkenateng. Yaaqsikiitni Sidon-iarmiut uitaluteng allanun-llu yugnun ilagautevkenateng.

⁸Angutet taukut talliman utercata Zorah-mun Estaol-aamun-llu, yuut aptait camek nalaquyuciitnek.

⁹“Kitaki,” kiugut, “Curugnauput Laish-aaq. Tangellruarput nuna, assipiartuq. Cavkenani maani uitaurpek'naci; kiiki! Iterluku teguyarturciu!

¹⁰Tuavet tekiskuvci, tangerciqaci yuut camun pinayukluteng neryuniurpek'nateng. Nunarpauguq; ca tamarmi yuum piyugarkaa tamaanlluni, Agayutem-llu tunellrua elpecen̄un.”

¹¹Tua-i tiissitsaam avga yuinarnek tallimanek cipluku (600) anguyagtet kinguveqellriartainek Dan-am ayagtut Zorah-mek Eshtaol-amek-llu, upingaluteng anguyallerkameggnun.

¹²Mayurtut-llu pelateka'arluteng-llu calaralirnerani Kiriath Jearim-aam Judah-mi. Taumek nuna tauna cali maa-i aterpagtelaqiit Qavartarvianek Dan-am.

¹³Ayagtut-llu tuaken tekilluteng-llu Micah-m eniinun pengulilriami nuniini Ephraim-aam.

¹⁴Tua-llu talliman angutet ayallret paqtaarluku nunii aassaqluteng Laish-aam qanertut piullgutmeggnun, “Nallunritarci-qaa ukut enet iliitni muragamek agayutnguartangqerrucia qallircimaluni qerrirlimek? Allanek-llu agayutnguartarluni as'arcen̄a'artarluni-llu. Qaillun tua-i piqatarceta?”

¹⁵Tua-i ag'ut Micah-m eniinun, yun'erraraam Levite-am uitavianun, apluku-llu Levite-aq qaillun ayuqucianek.

¹⁶Imkut-llu tiissitsaam avga yuinarnek tallimanek cipluku (600) Dan-am anguyagtai, upingaluteng, nangerngaut ikirtuqami.

¹⁷Talliman aassaqluteng yuvririlriit enemun ciunirluteng itertut teguluku-llu agayutnguaq qalliliumalria qerrirlimek, allat-llu agayutnguat, as'carcena'ar-llu, agayulirten͞guneq iteryaramelnginanrani ilagarluki tiissitsaam avga yuinarnek tallimanek cipluku (600) angutet caskulget anguyagcuutnek.

¹⁸Angutet-llu itellratni Micah-m eniinun teguluki-llu qigcignarqellriit agayulirten͞gunrem aptai, “Caceci?”

¹⁹Piat-llu, “Nepaiten. Camek qanqeryaqunak. Maligeskut agayulirten͞guneqniamteggen alerquastekluten-llu. Agayulirten͞guyuumiituten-qaa tamalkuitnun Israel-aam kinguveqellriarinun ataucim angutem ilainun kiingan pivkenak?”

²⁰Mat'um agayulirten͞guneq angninga'arcetaa, tua-i tegui qigcignarqellriit cat maliggluki-llu.

²¹Kingutmun-llu cauluteng ayagtut, irniateng, katngateng, akluteng-llu ciuqliqluki.

²²Yaaqsigiqerluki enemek Micah-m qayagaurai elaqlini anguyaasqelluki. Anguit-llu Dan-am yui

²³qayagpagluki-llu. Dan-am yui kingutmun caugut apluku-llu Micah, “Qaillun pisit? Ciin yugyagpakarcit?”

²⁴Micah-llu kiuguq, “Ciin waten apcit, ‘Qaillun pisit?’ Elpeci tang tegukeci agayulirten͞guneqa agayutet-llu piliallrenka, ayagluci-llu. Camek unisvikcecia?”

²⁵Dan-am yuin qanrutaat, “Camek qanenqigcaqunak ukut anguyagtet qenqerrluki curuusqumanrilkuvet. Elpet tamalkuita-llu ilaten tuqucugngait.”

²⁶Tua-i-llu Dan-am yui ayagluteng. Micah-m tangrrai ellmini pininrurpauciat, tua-i tuigtuq uterrluni-llu eneminun.

²⁷Dan-am yuin tegurraarluku agayulirten͞guneq Micah-m-llu piliallri, ayagtut curugluku-llu Laish-aaq, nunarraq nepailngurnek, qinuilngurnek yul'ek kuignayugmi uitallgutekluki Bethrehob-aam. Tuqutait yui ekuavkarluku-llu nunarraq.

²⁸Kitumek yurnakestaunateng, Laish-aaq yaaqsian Sidon-aamek, yugnun-llu allanun ilaliucuilameng. Dan-am yuin nunarraq nautenqigtaat tuavet-llu nunalgarrluteng.

²⁹Atra-llu cimiraat Laish-aunrirluku Dan-aurrluku, ciuliameggnek Dan-amek, Jacob-aam qetunraanek.

³⁰Dan-am yuin napartaat agayutnguaq agayuvikelaasqelluku, Jonathan-aaq-llu, qetunraa Gershom-aam Moses-aam-llu tutgarii, agayulirten͞gunrurtuq Dan-am yuinun, kinguvri-llu agayulirten͞gunruaqluteng yuut nunameggnek ayaucimallrat engelkarrluku.

³¹Micah-m agayutnguara uitaurallruuq Pelatekaq Agayutmun agayuvikelallrat napallra taktaciluku Shiloh-mi.