Read Yupik Judges 19 Bible Online

Judges 19 - Yupik bible

Judges 19

¹Tamakuni ernerni Israel-aaq atanengvailgan, Levite-artangqelliniuq yuulriamek keluqvani qemililriami nuniini Ephraim-aam. Tegutuq ayagyuamek arnamek Bethlehem-aamek Judah-mi nulirruaqnaluku.

²Tau͡gaam arnam qenrutlerminiu utertuq atami eniinun Bethlehem-aami, tuanlluni-llu cetamani iraluni.

³Tua-i taum angutem maligtaa qarulluku-llu maliggluni utercesqelluku. Malingqellruuq pistem̄inek malrugnek-llu ciulviignek. Arnam itrutaa Levite-aq enemun, atiin tangrramiu, quyaluni ciuniuraa.

⁴Atiin quurituataa tamaanteqaasqelluku, tua-i-llu uitaluni ernerni pingayuni. Taukuk aipaqutellriik tamaani nerlartuk qavaraqlutek-llu.

⁵Unuaquani erenrit cetamiita makcara'artuk unuakuayaarmi uplutek-llu ayagnaluni. Tau͡gaam nasaurluum atii qanertuq Levite-amun, “Camek ciumek nererraartek. Ayuqucitek assiriqerrniartuq. Waniku ayagniartutek.”

⁶Tua-i aqumlutek angutek nerellgutkuk mellguteklutek-llu. Arnam-llu atiin pia, “Cali qavartaa assililuten-llu maani.”

⁷Levite-aq nangertuq ayagnaluni, tau͡gaam taum ataulriim aguagutaa cali uitasqelluku.

⁸Erenret-llu tallimiitni maktuq unuakuayaarmi ayagnaluni, nasaurluum-llu atii qanertuq, “Nererraara camek. Wanikullerkaa utaqaluku.” Tua-i nerellgutkuk.

⁹Tua-llu angun tauna, nulirruara, pista-llu nangertenqigcata ayakatarluteng, atii qanertuq, “Atam, erneq atakuyarturtuq; cali tang unugici. Tan'geriniarartuq; maanci assililuci. Unuaqu makcara'arluten unuakuayaarmi ayallerkarpenun uterrniartuten kingunerpenun.”

¹⁰Tau͡gaam uitayuumiituq unugpak tamaani, taumek ellii nulirruani-llu ayagtuq, pistetek-llu, malruk-llu ciulviik atmaglutek. Erenrurrnerakun canimelliat Jebus-aaq (tauna, Jerusalem-aaruuq), tua-i pista qanertuq angayuqaminun, “Arulainrilamta-wa qavartarluta-llu wani Jebusite-at nunarpiitni?”

¹¹Atakuyartunrakun canimelliat Jebus-aaq (tauna Jerusalem-aaruuq), tua-i pista qanertuq atanerminun, “Arulainrilamta-wa qavartarluta-llu wani Jebusite-at nunarpiitni?”

¹²Tau͡gaam angayuqra qanertuq, “Arulairngaitukut nunarpagmun Israel-aarunrilngurnek yul'egmun.

¹³Kiturciququt yaaqvaarnun ayagluta qavartarluta-llu Gibeah-mi wall'u Ramah-mi.”

¹⁴Tua-i kituraat Jebus-aaq arulairpek'nateng-llu ayagluteng. Akerta teviqatarluku tekitut Gibeah-mun nunamun uitaviatnun kinguveqellriartain Benjamin-aam.

¹⁵Tumyaramek caqirtut tuani qavartarnaluteng. Itertut nunarrarnun aqumluteng-llu nunarpiim qukaanun quyurrvigmun, tau͡gaam kia allaneqsunritai enemini unugpak uitasqelluki.

¹⁶Tuanelnginanratni, angukara'urluq tamaagguirtuq utertellria calillerminek naucetaarvigmi. Tauna kingunengqellruuq pengulilriamek nuniinek Ephraim-aam, tau͡gaam Gibeah-rmiiungurtellruluni. (Tamakurmiut nunam taum yui kinguvellgutkellriaruut Benjamin-aamek.)

¹⁷Angukara'urluum murilkartaa tauna allanek nunarpiim quyurrviani uitalria apluku-llu, “Naken taisit? Natmun ayagcit?”

¹⁸Levite-aq kiuguq, “Bethlehem-aametellruukut Judah-mi, waniwa-llu kingunemten̄un uterrluta yuilqumun pengulilriamun nuniinun Ehpraim-aam. Kia allaneqenritaakut

¹⁹neqkautengqengraata canegkarluteng-llu ciulvaput, cali-llu wangkuk nulirruaqa-llu pisteka-llu taquarluta kelipamek wine-amek-llu. Camek nuuqitevkenata.”

²⁰Angukara'urluq qanertuq, “Ciuniurumauci enemni! Aulukciqamci; qavarngaituci nunarpiim quyurrviani.”

²¹Tua-i ut'rutai malikluki eneminun ciulvait-llu nerevkarluki. Erurai-llu allanemi it'gait nerluteng-llu.

²²Angnirluteng piinanratni tangerrluku alqunaq picirkartulriit taukumiut angutet avatairaat ena amiigkun-llu tukriarangluteng. Qanertut-llu angukara'urlurmun, “Anusgu angun enevnun itleq! Akusraruteksugarput!”

²³Tau͡gaam angukara'urluq an'uq qanrulluki-llu, “Qang'a, yugnikekmaa! Watnanrici anernerrlugtarmek! Una angun allaneqaqa.

²⁴Atam waniwa! Wani-wa-tang nulirruara wiinga-llu nakmiin panika angutem agtuqsailkii. Wanirpak anutnaugka, elkek piniagci. Qaillun piyullerpecetun piniagci. Tau͡gaam una angun tamatumek assiitqapiarmek piyaqunaciu!”

²⁵Tau͡gaam taukut angutet niitenritut. Tua-i Levite-am nulirruani tegua anlluku-llu ellaitnun. Agaat-llu nanglluku unugpak arulaiqsaunateng errvianun.

²⁶Erqaarallrani arnaq taiguq iquluni-llu amiiganun angukara'urluum eniin, uimi uitavian. Tuaken-llu pekpailgan ertuq.

²⁷Uinga maktuq tuani unuakumi, amiik-llu ikirtellermini ayagyarturnaluni, tangrraa nulirruani enem ciuqerrani tallik amiigem tungiinun yagingalutek.

²⁸Qanertuq-llu, “Makten. Ayagnaurtukut.” Tau͡gaam kiunrituq. Tua-i elliluku temii ciulviim qainganun ayagtuq kingunerminun.

²⁹Tekicami, enemun itertuq nuussimek-llu tegulluni. Teguluku-llu nulirruami temii, kepuraa qula malrugnek cipluku (12) amllertaluku, ayagtelluki-llu ataucitaarluki naaluki qula malrugnek cipluku (12) kinguveqellriartainun Israel-aam.

³⁰Tamarmeng-llu tangertai qanertut, “Waten pilriamek niiteqaqsaitukut! Ca waten piksaituq Israel-aam yui anrraanratnek Egypt-aamek. Una waten pilria uitatevkenaku pinarqaput! Cauciqa?”