Read Yupik Judges 2 Bible Online

Judges 2 - Yupik bible

Judges 2

¹Tua-llu ATANREM an'gilaa ayagtuq Gilgal-aamek Bochim-aamun Israelite-at-llu qanrulluki, “Anutellruamci Egypt-aamek, tailluci-llu nunamun akqutkellemnun ciuliavcen̄un. Qanellruunga, ‘Watqapik navegngaitaqa akqutka elpenun.

²Elpet-llu akqutmek taqusngaituten yuut maani uitalriit pillgutekluki. Navgurarkaugaten ekuaviit.’ Tau͡gaam elpet maligtaqullrunritan alerquuteka. Pairrluku pillruuten!

³Taumek wani-wa qanertua anesngaitanka ciunerpenek makut yuut. Ingluksaguciiqaaci, napciiquten-llu agayuyaaraitnun agayutmeggnun.”

⁴An'gilaq-llu mat'umek qanrraartelluku tamalkurmeng Israel-aam yui erinateng anlluki qiagut,

⁵taumek nuna aciraat Bochim-aamek, tuani-llu elliitnek ekuavkariut ATANERMUN.

⁶Joshua-m ayaasqen͞gateng Israel-aam yui ayagtut, tamarmeng-llu piksagulluki nunat ellmeggnun cikiutekumalriit.

⁷Yuut-llu kevgiuraat ATANEQ, Joshua-m unguvallran taktaciatun, kinguani-llu tuqullran taqevkenateng ciulirneret uitalriit unguvallrata taktaciatun, taukut tangellruluki tamalkuita caliat angtuat ATANREM pillri Israel-aamun.

⁸Joshua-llu Nun-am qetunraa, ATANREM pistii, yuunrirtuq allrakungluni yuinaat talliman qulmek cipluku (110).

⁹Tungmagtaat-llu nunautiinun, elliin cikiutellranun Timnath Serah-mi qemililriami nuniini Ephraim-aam, neglirnerani Ingrim Gaash-am.

¹⁰Taukut-llu yuulgutkelriit cali yuunrirluteng, kinguatgun-llu allat yuulgutkelriit nalluyagutaat ATANEQ calialri-llu Israel-aamun.

¹¹Tua-llu Israel-aam yui assiilngirtut ATANERMUN kevgiungluki-llu agayutnguat Baal-at.

¹²Taqluku agayulallerteng ATANERMUN, ciuliameng Agayutiitnun, Agayutmun anucetellratnun Egypt-aam nuniinek, allanun-llu agayutnun maligulluteng, agayutnguaritnun yuut tamaani uitallgutmeng. Ciktaarluteng-llu tamakunun ATANEQ eq'uqertevkaraat.

¹³ATANEQ taqaat agayuviknermek kevgiurluki-llu Baal-at Astartes-at-llu.

¹⁴Tua-llu ATANREM eq'uqrutai Israel-aat uayaaristen̄un-llu curugtelluki uayarcetai. Inglukestaitnun-llu tamaani nuniitni uitalrianun cirlakevkarai, Israelite-at-llu ellmeggnek inglukesteteng akiurciigaliit.

¹⁵Anguyagyarturluteng an'aqata, ATANREM ingluliumaaqluki, tuaten piciqnillermitun. Cakneq-llu nangtequt.

¹⁶Tua-llu ATANREM Israelite-at cikirai ciuliqagten̄ek taukut-llu anirturait uayalartaitnek.

¹⁷Tau͡gaam Israelite-at caukenritait ciuliqagteteng. Israel-aat piciuvkenateng ATANERMUN, allanun-llu agayutnun agayuaqluteng. Ataita niisngallruit ATANREM alerquutai, tau͡gaam ukut nutarat yuulgutkellriit tuaten piyuirutut.

¹⁸ATANREM cikiraqamiki Israel-aat ciuliqagtekaitnek, ATANREM ikayularaa tauna ciuliqagta yuut-llu anirturluki ingluitnek taum ciuliqagtem unguvallran taktaciatun. ATANREM naklek'larai yuuniaralaata cakviullermeggnek nangcimallermeggnek-llu.

¹⁹Tau͡gaam ciuliqagta yuunriraqan tunutelaraat, arcaqanruluteng-llu callrat ciuliameggni. Maliggluki allat agayutet, kevgiurluki ciktaarvikluki-llu; taqevkenaki piciryarateng pamailucirteng-llu.

²⁰Taumek ATANEQ eq'urtelalria cakneq Israel-aat tungiitnun qanerluni-llu, “Ukut angayuqauvillgutkellriit navgaat akquyutelqa maligtaqusqelqa ciuliaritnun. Niisnganrilatnga,

²¹anesngaitanka ciunratnek angayuqauvillgutkellriit maani nunalgulriit Joshua-m tuqullrani uitallret.

²²Ellait aturluki Israelite-at yuvrirciqanka piciryaramnun maligutetassiarluki, ciuliameng pillracetun.”

²³Tua-i ATANREM uitatai tamakut angayuqauvillgutkellriit tamaani nunami; cirlakevkarpek'naki-llu Joshua-mun, egmian-llu anevkarpek'naki Joshua-m tuqullran kinguani.