Read Yupik Judges 20 Bible Online

Judges 20 - Yupik bible

Judges 20

¹Tamarmeng Israel-aam yui Dan-amek negeqvami Beersheba-mun ungalami, cali-llu Gilead-aam nuniinek keggaknermi, qayagaurumallerteng niitaat. Quyurtut umyuallgutekluteng ATANREM tuanluciani Mizpah-mi.

²Ciuliqagtai tamarmeng kinguvellgutkellriartainek Israel-aam tuantut tuani quyurtellratni Agayutem yui, tiissitsaat-llu yuinaat yuinaq (400,000) nunakualriit anguyagtet.

³Tuaten-llu piinanratni Benjamin-aam yui niitelliniut Israel-aam yui quyurrniluki Mizpah-mun. Israel-aam yui kangingyugluteng aptut, “Qanruskut, qaillun una picurlak piurta?”

⁴Levite-am nulirruaranek tuqucesciullrem kiugaa, “Wangkuk nulirruaqa-llu ayallruukuk Gibeah-mun Benjamin-aam nunautiinun qavartarnalunuk.

⁵Gibeah-rmiut-llu angutait taigut aqvalua avatairluku-llu ena unugmi. Tuqutellerkaqa kiingan pitekluku; tau͡gaam nulirruaqa agaat, ellii-llu yuunrirluni.

⁶Teguluku tua-i temii, kepuraqa avegluku, ataucitaarluki-llu avvlemnek tuyuranka qula malrugnek cipluku (12) kinguvellgutkellriartai Israel-aam.

⁷Tamarpeci wanelngurni Israel-aam yukaaci. Qaillun tua-llu man'a piqatarceciu?”

⁸Tamarmeng-llu yuut nangertut qanerluteng-llu, “Ilavut atauciunger'mi, pelatekami uitali wall'u enemi, uterrngaituq eneminun.

⁹Waten piqatartukut: nall'arcetaariqatartukut cucuklirluta-llu angutnek curugtekainek Gibeah-m.

¹⁰Yuinaat talliman (100) angutet Israel-aami paivciciqut neqkaitnek anguyagtet, ilaita-llu ayagluteng anucimirqecetaarciqaat Gibeah kasngunarqellriamek taqutellra pitekluku Israel-aami.”

¹¹Tua-i tamarmeng angutai Israel-aam quyurtut atauciq pitekluku, curugnaluku nunarraq tauna.

¹²Israel-aam yuin kinguvellgutkellriartai ayagceciut qaneryartulrianek tamalkuitnun kinguvellgutkellriartainun Benjamin-aam waten qanerluteng, “Cauga man'a picurlak taqutellerci?

¹³Wangkutnun tuniciki kasngunarqelrialilriit Gibeah-mi, tuqutnauput assiilnguq-llu au͡g'arniaput Israel-aamek.” Tau͡gaam Benjamin-aam yuin ilangcinritait Israelite-aullguteteng.

¹⁴Tamalkuitnek-llu nunarpainek Benjamin-aam taigut Gibeah-mun anguyagnaluki ilateng Israel-aam yui.

¹⁵Qayagaurait yuinaq arvinlegnek cipluku tiissitsaat (26,000) anguyagtet nunarpameggnek tuani ernermi. Avatiitgun-llu taukut, Gibeah-rmiut quyurcillruut angutnek tiissitsaam avga yuinarnek qulnek cipluku (700) urenkutmek nakmikumalrianek

¹⁶carumilegnek. Tamaq'apiarmeng teggalqumek elluuyugngaluku nuyaq, uniurtevkenaku-llu.

¹⁷Israel-aam-llu yui, Benjamin-aaq ilakevkenaku, quyurtut yuinarnek yuinarnek tiissitsaanek (400,000) angutnek anguyagarkanek, tamarmeng ukut anguyiurten͞guluteng.

¹⁸Israel-aam yui ayagtut agayuvikelallratnun Bethel-aami, tuani-llu apluku Agayun, “Naliata kinguvellgutkellriit ciumek curugciqaki Benjaminite-at?” ATANEQ-llu kiuguq, “Kinguvellgutkellriartain Judah-m.”

¹⁹Tua-i Israelite-at ayagtut unuaquan, arulairluteng-llu nunarpiim Gibeah-m mallgeskiinun.

²⁰Ayagtut curugyarturluki Benjamin-aam anguyagtai, nekaitnun-llu elkarrluki anguyagtet nunarpak caumaluku.

²¹Benjamin-aam anguyagtai nunarpagmek an'ut, erneq-llu iquklipailgan Israelite-anek anguyagten̄ek tuquciut yuinaq malrugnek cipluku tiissitsaanek (22,000).

²²Tua-llu Israelite-at ayagtut agayuvikelallratnun ilutequaluteng-llu angniinateng ciuqerrani ATANREM atakuvianun. Ellaita aptaat, “Cali-qaa ayanqigtelta anguyallerkamten̄un anelgutput Benjaminite-at?” ATANEQ-llu kiuguq, “Aa-ang.”

²³Tua-i Israelite-at anguyagtet caceturiqertut, nekaitnun-llu anguyagteteng elkartenqiggluki, akwauvaq enellratnun.

²⁴Ciutmun-llu ayagtut tungiitnun Benjamin-aam anguyagtain aipiriluteng.

²⁵Aipiriluteng-llu Benjaminite-at Gibeah-mek an'ut, tuani-llu tuqutait akimiaq pingayunek cipluku tiissitsaat (18,000) anguyiutulit Israelite-at anguyagtait.

²⁶Tua-llu tamarmeng Israel-aam yui mayurtut Bethel-aamun piciryarateng-llu aturluku qiagut. Tuani aqumgaut ciuqerrani ATANREM, nereksaunateng atakurvianun. Elliigut-llu ilakuyutem ekuavkariyaraanek ekuagiluteng elliigut ilait tamalkuuluki, tamalkuita ATANREM ciuqerrani.

²⁷Agayutem Akqutiin Yaassiiga tuantellruuq Bethel-aami tamakuni ernerni,

²⁸Phineas-aaq-llu Eleazar-aam qetunraa, Aaron-aam tutgarii, tarikestekaa. Yuut aptaat ATANEQ, “Anelta-qaa callugyartunqiggluki anelgutput Benjaminite-at, wall'u-qaa taq'ilta?” ATANEQ kiuguq, “Callugci. Unuaqu ellaitnun cirlakutmek cikirciqamci.”

²⁹Tua-i Israelite-at elkarciut anguyagten̄ek iirtelluki avatiinun Gibeah-m.

³⁰Erenret-llu pingayun aturluki ullagturarait anguyagtai Benjamin-aam elkarrluki-llu anguyagteteng anguyallerkaatnun cauluku Gibeah, ciungani pillrucimegcetun.

³¹Benjaminite-at an'ut callugyarturluteng ayaucimaluteng-llu nunarpagnek. Ciungani pillrucirmegcetun, tuqurqiut Israelite-at yuilngurmi, tumyarami Bethel-aamun ayalriami cali-llu Gibeah-mun tumyarami. Tuquciut tayima yuinaq qulmek cipluku (30) nuniini Israelite-anek.

³²Benjaminite-at qanertut, “Cirlakaput ciunganicetun.” Tau͡gaam Israelite-at picirkiullruluteng kingupiarnaluteng maligtelluteng-llu nunarpak unilluku tumyaranun.

³³Taumek Israelite-at piuranrit anguyagtet kingupiarluteng quyu'urtellratni Baaltamar-ami, angutet kassugusngastai Gibeah-m anqerraut iirvimeggnek teggalqulilriamek yuilqumek nunarpiim avatiinek.

³⁴Qulen tiissitsaat (10,000) anguyagtet, urenkutmek cucukumalriit tamalkuan Israel-aamek, curugaat Gibeah, callullrat-llu tukniuq. Benjaminite-at elpekumanritaat perriumaqatalteng.

³⁵ATANREM-llu cikiraa Israel-aaq cirlakutmek anguyagtainun Benjamin-aam. Israelite-at tuquciut yuinaq tallimanek cipluku tiissitsaanek, (25,100) yuinaat-wa talliman inglumeggnek tuani ernermi,

³⁶tua-i Benjaminite-at taringut cirlakumacimeggnek. Amllenrit-llu Israelite-am anguyagtain kingupiallruluteng imkut anguyagtet iirumallret Gibeah-m avatiini qageqluki, piyugngaciat ukveqngamegteggu.

³⁷Ukut anguyagtet cukamek aqvaqurtut Gibeah-m tungiinun; saggluteng-llu nunarpagmun tuqutait tamalkuita tamaanelnguut.

³⁸Taukut Amllenrit anguyagtet, anguyagtet-llu iirumalriit pillerkiullruut nallunailkutarkameggnek. Tangerquneng amirlurpagmek aruvagmek mayulriamek nunacuarmek tuaken,

³⁹Israelite-at anguyausvigmi uitalriit kingutmun caugarkauluteng. Tuani Benjaminite-at ak'a tuqucillruluteng yuinaq qulmek cipluku (30) Israelite-anek. Umyuartequt-llu ellmeggnun, “Aa-ang, cali-am tua-i cirlakaput ciungani pillrucimcetun.”

⁴⁰Tua-llu nallunailkutaq nauguq; amirluluni aruvak nauguq kinguneqluki nunat. Benjaminite-at kingyaameng tangrraat alangaarluteng-llu nunarpagmek tamarmi ekualriamek.

⁴¹Tua-llu Israelite-at kingutmun caugut, Benjaminite-at-llu nuniingartut tua-i-wa taringamegteggu piunriumaqatalteng.

⁴²Kingupiartut Israelite-anek qimagluteng-llu yuilqum tungiinun, tau͡gaam anagciigatut. Nagtut akuliigni anguyagtet amllenrita anelriit-llu nunarpagmek piunriumaut-llu.

⁴³Israelite-at ingluteng qimagviirait, arulairpek'nateng maligtait Gibeah-m calaralirneranun, tumemeggni tuaten tuqulluki.

⁴⁴Akimiaq pingayunek cipluku tiissitsaat (18,000) Benjaminite-at anguyagtaita assinqurrait iquut.

⁴⁵Ilait-llu tuiggluteng qimagtut yuilqum tungiinun Rimmon-aam Teggalqurtaanun. Tiissitsaat talliman (5,000) piunriumaut tumyarani. Israelite-at maligqurarait ilait Gidom-aamun, malrugnek-llu tiissitsaagnek (2,000) cali tuquciluteng.

⁴⁶Quyurmeng, yuinaq tallimanek cipluku tiissitsaat, (25,000) Benjaminite-at tuqucimaut tuani ernermi, tamarmeng alinguraralriaruvkenateng anguyagtet.

⁴⁷Tau͡gaam tiissitsaam avga yuinarnek tallimanek cipluku (600) qimagyugngallruut yuilqumun Teggalqurtaanun Rimmon-aam, uitaluteng-llu tuani iraluni cetamani.

⁴⁸Israelite-at-llu yuin uterrvikait anguyagluki-llu Benjaminite-at, tuqulluki-llu tamalkuita—angutet, arnat, mikelnguut, ungungssit-llu. Nunat-llu tamalkuita nataqelteng ekuavkarluki.