Read Yupik Judges 21 Bible Online

Judges 21 - Yupik bible

Judges 21

¹Israel-aam yui akqiut quyurtellermeggni Mizpah-mi, “Kia ilamta tunngaitaa paniini kassuucarakun Benjaminite-amun.”

²Yuut-llu ayagtut Bethel-aamun, tuani-llu aqumgaluteng atakurvianun ciuqerrani Agayutem, erinateng-llu nalugluki qiaqapigtut.

³Qanertut-llu, “ATANEQ, Agayutii Israel-aam, ciin man'a waten pia Israel-aami? Ciin ilakellriari Benjamin-aam catairutqatartat Israel-aamek?”

⁴Unuaquan-llu yuut makcaraartut, ekuavigmek-llu pililuteng, ekuavkariluteng-llu elliitnek, uitanqegcitem-llu elliitainek.

⁵Israel-aam-llu yui qanertut, “Naliit ilakellriarin Israel-aam taillrunritat quyurtellemten̄i ATANREM tuanluciani Mizpah-mi?” Angelriamek akqillruameng kina imna tainrilnguq ATANERMUN Mizpah-mi pitekluku, qanerluteng, “Tauna tuqucimaarkauguq.”

⁶Israel-aam-llu yuin takumcukaat Benjamin-aaq anelgutseng, qanerluteng-llu, “Atauciin ilakellriit au͡gaumaut Israel-aamek uumi ernermi.

⁷Benjamin-aam angutain nuliangellerkait qaillun piciqseta, akqillruamta ATANERMUN cikirngaitniluki panimten̄ek nulirkaitnek?”

⁸Qanertut-llu, “Naliat Israel-aam ilakellriarin taillrunritat ATANERMUN Mizpah-mi?” Maaten piut kina taillrunritlinilria pelateka'arvigmun Jabesh-aamek Gilead-aami, quyungqalrianun.

⁹Tua-i yuut quyurtellratni, atauciunge'rmi Jabesh-aam Gilead-aami yuin iliit tuantellrunrituq.

¹⁰Tua-i quyungqalriit ayagceciut tuavet qula malrugnek tiissitsaanek (12,000) alingilqurrameggnek angutnek, alerqurluki, “Ayagluci piunrirciki Jabesh-aam Gilead-aami yui nuussirpagteggun; arnat mikelnguut-llu ilakluki.

¹¹Una wani-wa piarkarci; tamalkuita angutet, arnat-llu tamalkuita angutmek inartellgucillret piunrirteqapigtarkaugaci.”

¹²Nataqutut-llu Jabesh-aam Gilead-aami yuini yuinarnek yuinarnek (400) neviarcarnek angutmek agtuumaksailngurnek inartellgutekluki; taitait-llu Shiloh-amun pelateka'arvigmun, Canaan-aam nuniini uitalriamun.

¹³Tua-llu tamarmeng yuut quyungqalriit qanermek ayagceciut Benjaminite-anun Rimmon-aam Teggalqurtaani uitalrianun, qanerluteng anguyak taqsugluku.

¹⁴Benjaminite-at-llu utertuq taum nalliini; Israelite-at-llu cikirait arnanek Jabesh-aarmiunek Gilead-aami uitatlermeggnek tuqutevkenaki, tau͡gaam nuringaluteng ellaitnun.

¹⁵Yuut-llu takumcuyugtut Benjaminite-anek tua-i-wa ATANREM ilakutellrat navellruaku Israel-aam yuin.

¹⁶Tua-llu quyungqalriit ciulirneret qanertut, “Qaillun nulirkaitnek piciqseta ilakuarulriit, Benjamin-aam yuini arnat piunriumallruata?”

¹⁷Kinguvartangqerarkaugut Benjamin-aam yui unguvalriit, ilakellriit perriumanritnaurtut Israel-aamek.

¹⁸Tau͡gaam cikirciigataput panimten̄ek nulirkaitnek. Israel-aam yui akqillruata, “Aniqlaamali cikiqengelria nulirkamek Benjaminite-amun.”

¹⁹Tua-i qanertut, “Atam, allamiaqan ATANREM nerevkaritiin atullra Shiloh-mi piniarartuq, Bethel-aam neglirnerani uitalriami, calaralirnerani tumyaram mayulriim Bethel-aamek Shechem-aamun, ungalalirnerani Lebonah-m.”

²⁰Alerqurait-llu Benjaminite-at qanerluteng, “Ayagluci nayuryarturci wine-arkanek naucetaarvigni,

²¹murilkelluci-llu; panii Shiloh-am ankata yuraryarturluteng nerevkaritmi, anluci wine-arkanek naucetaarvignek teguskici tamarpeci nulirkarpecen̄ek Shiloh-am paniinek, ayagluci-llu Benjamin-aam nuniinun.

²²Atait-llu wall'u anngait taikata qanemyuugarluteng wangkutnun, qanruciiqaput, ‘Cikiutekiciki nepailngurkun wangkutnun; tua-i-wa anguyagkun tegullrunrilamteki nuliqnaluki; wall'u elpeci tunellrunritaci, tunellrukuvciki pinarqelriaruyartuci akqillerpeci navellranek.’”

²³Tuaten-llu Benjaminite-at piut, tamarmeng nulirkameggnek tegulluteng, ayautellermeggnek yuraryartuumalrianek Shiloh-ami; nutaan-llu utertut nakmiin nunameggnun, nautenqiggluki-llu nunat uitavikait.

²⁴Israel-aam-llu yui tuaken ayagtut taum nalliini, uterrluteng yuullgutmeggnun ilameggnun-llu, nakmiin-llu nunautmeggnun.

²⁵Tamakuni ernerni atanertaitellruuq Israel-aami; tamarmeng yuut yuuluteng tangllermeggni elluakellermegteggun.