Read Yupik Judges 3 Bible Online

Judges 3 - Yupik bible

Judges 3

¹Tua-llu-gguq, ATANEQ uitaciiguq ilaitnek angayuqauvillgutkellriit nunami naspaanaluki Israelite-at taukutgun anguyagmi callukaqsailnguut Canaan-aami.

²Waten piuq kinguvellriarinun Israelite-am elitnaurnaluki anguyagmek, arcaqerluki imkut ciungani anguyagmi uitaqaqsailnguut.

³Taukut unegtellret nunamun ukuugut talliman Philistine-at nunarpait, tamalkuita Canaanite-at, Sidonian-aat, Hivite-at-wa nunalget Ingriini Lebanon-aam Ingrimek Baal-amek ayagluteng yaaqvaq tevyaraq Hamath Pass-aq tekilluku.

⁴Taukut naspaatekauluteng Israel-aamun, nallunairarkauluku Israel-aamun maligtaquarkaucii alerquuteklerminek ciuliaritnun Moses-aakun.

⁵Tua-i Israel-aam yui tamaantut ilagarluki Canaanite-at, Hittite-at, Amorite-at, Perizzite-at, Hivite-at, Jebusite-at-llu.

⁶Tamakunek kassuutelartut agayutaitnun-llu agayulangluteng.

⁷Israel-aam yuin nalluyagutaat ATANEQ Agayuteteng; assiilngirtut elliinun agayuviklukek-llu agayutnguakek Baal-ankuk Asheroth-aaq-llu.

⁸Taumek ATANEQ eq'uqertuq Israel-aamun Angayuqamun-llu Cushan Rishathaim-amun Mesopotamia-rmiumun cirlakevkarluki. Israel-aam-llu yuin kevgiuraat pingayunlegni allrakuni.

⁹Tau͡gaam Israel-aam yui qayagallratni ATANERMUN, ATANEQ taqutuq aviutestekaatnek Israel-aam yuin. Othniel-aam Kenaz-aam qetunraan Caleb-aam kinguqlian aviutai.

¹⁰ATANREM anernera tut'uq elliinun, ciuliqagten͞gurtuq-llu Israel-aamun. Othniel-aaq ayagtuq anguyagyarturluni, ATANREM-llu cirlakevkaraa angayuqra Mesopotamia-m.

¹¹Qinuituq-llu nuna allrakuni yuinaagni malrugni (40). Tua-i-llu Othniel-aaq Kenaz-aam qetunraa yuunrirluni.

¹²Israel-aam-llu yui ataam assiilngirtut ATANERMUN. Man'a pitekluku ATANREM pininrurcetaa Israel-aami Eglon-aaq Angayuqra Moab-am.

¹³Eglon-aaq-llu ilaliutuq Ammonite-anun Amalekite-anun-llu; cirlakaat-llu Israel-aaq teguaqluku-llu Jericho-q nunarpak palm-anek napatalek.

¹⁴Israelite-at-llu kevgiuraat Eglon-aaq allrakuni akimiaq pingayunek cipluku (18).

¹⁵Tau͡gaam Israel-aam yui qayagallratni ATANERMUN, ATANEQ taqutuq aviutestekaatnek, Ehud-aamek, Gera-m qetunraanek, Benjaminite-amek, tauna carumingqerrluni. Israel-aam-llu yuin elliikun tuyuraat Eglon-aaq angayuqra Moab-am cikiutnek.

¹⁶Ehud-aaq-llu nuussirpaliuq pikaminek atunem kegginalegmek, cingutmek qaqumun taktalriamek; naqyulluku-llu tallirpilirnermun qugtuqaminun, aturami aciatnun.

¹⁷Tunai-llu cikiutet Eglon-aamun angayuqranun Moab-am. Tauna Eglon-aaq uquripiartuq.

¹⁸Ehud-aam cikiucet tunrraarluki utercetai tegumiaqestellrit.

¹⁹Ellii-llu utertuq, teggalqunun canaumalrianun Gilgal-aam mallgeskiini, qanertuq-llu, “Aassaqnarqellriamek qanerkangqertua elpenun, Angayuqaaq.” Eglon-aaq-llu piuq, “Nepaici.” Tamarmeng-llu nayurtai an'ut uitallranek.

²⁰Ehud-aam-llu ullagaa, kiimi aqumgiin nengllamaanaarmi enem kangran enetaani. Ehud-aaq-llu qanertuq, “Qanerkangqertua Agayutmek elpenun.” Eglon-aaq-llu nangertuq aqumgallminek.

²¹Ehud-aam carumiminek tegua nuussiq tallirpilirneminek qugtuqaminek, kap'lerulluku-llu aqsaqruanun.

²²Tamarmi-llu nuussiq itertuq, uqum-llu patuluku, amunrilaku aqsaqruanek; iqaq-llu an'uq.

²³Ehud-aaq-llu an'uq elaturramun, patuluki-llu amiigi enem qainganelnguum, kelucarluki-llu.

²⁴Ayaumarian-llu, pistet taigut; tangrramegteki-llu amiiget kelucaumaciit umyuartequt, “Yuqerrngatuq yuqerrvianun nengllamanarqellriim enem.”

²⁵Utaqalgirtut-llu kiituan paqnayungut; ikircunrilaki amiiget, kelucairissuun teguluku ikirtait; tangrraat-llu atanerruarteng natermi inangqaluku tuqumaluni.

²⁶Ehud-aaq-llu ayakartuq qarillratni, kiturluki teggalqut canaumalriit, qimagluni-llu Seirah-mun.

²⁷Tuavet-llu tekicami, cupu'uryaraq qalriavkaraa qemililriami Ephraim-aam nuniini; Israel-aam-llu yui atrartut maliggluku qemililriamek nunamek, ciuliqagtelluteng.

²⁸Elliin-llu qanrutai, “Kingunemkun maligcia; ATANREM cikillruaci cirlaklerkaitnek inglukesteci Moab-armiut.” Kingunrakun-llu atrartut, teguluki-llu Moab-armiut qerarvigkait Jordan-aami, kina-llu yuk kiturcetevkenaku.

²⁹Taum-llu nalliini tuquciut tayima qulen tiissitsaat (10,000) nuniitni Moab-armiunek, tamarmeng pinilrianek, natlugnerilngurnek angutnek, atauciunger'mi-llu anagpek'nani.

³⁰Tua-i taumi ernermi Moab-aq cirlakumallruuq Israel-aakun. Nuna-llu qinuitellruuq allrakuni yuinarni cetamani (80).

³¹Kinguakun-llu Shamgar-aq Anath-aam qetunraa ciuliqagten͞gullruuq, tauna tuqucillruluni tiissitsaam avga yuinarnek tallimanek cipluku cali qulnek cipluku (600) Philistine-anek kuluviit pamacetaaratnek muragamek caskirluni; elliin-llu aviutellrui Israel-aat.