Read Yupik Judges 4 Bible Online

Judges 4 - Yupik bible

Judges 4

¹Israel-aam-llu yui ataam assiitellriamek caliut tangvallrani ATANREM Ehud-aam tuqullran kinguani.

²ATANREM-llu cirlakevkarai Jabin-amun angayuqranun Canaan-aam, tauna angayuqauluni Hazor-aami; anguyagtain ciuliqagtiit Sisera-rullruuq uitaluni Harosheth-aaratni-Gentile-at.

³Tua-llu Israel-aam yui qayagaut ATANERMUN ikayungcarluteng; Jabin-aq tegglinek ayagassuutengqerran tiissitsaam avga yuinarnek yuinarnek cipluku (900), ataniurluki-llu Israel-aam yui nanglluki allrakuni yuinarni (20).

⁴Taum nalliini Deborah, arnaq ciunerkarcurta Lappidoth-aam nulirra cuqcisten͞gullruuq Israel-aamun.

⁵Aqumgalallruuq Deborah-m napartaan aciani akunliigni Ramah-nkuk Bethel-aaq-llu qemililriami nuniini Ephraim-aam, Israel-aam-llu yuin ullalaraat cuqcilallra pitekluku.

⁶Taum tungciraa taisqelluku Barak-aaq, qetunraa Abinoam-aam Kedesh-aarmium Naphtali-mi, qanertuq-llu elliinun, “ATANREM, Israel-aam Agayutiin, ellimerraaten waten, ‘Ayagluten quyureski anguyagteten Tabor-aam Ingrianun, tegulluten qulnek tiissitsaanek (10,000) Naphtali-m yuinek, Zebulun-aam-llu yuinek.

⁷Anuciiqaqa-llu Sisera, atanerruarat Jabin-am anguyagtain, pairtesqelluten Kishon-aam Kuigem caniani ayagassuutai anguyagtai-llu malikluki, tunciqaqa-llu elpet unatevnun.’”

⁸Barak-aaq-llu qanertuq elliinun, “Maligtarkaukuvnga ayagciqua; tau͡gaam maligtarkaunrilkuvnga ayagngaitua.”

⁹Arnaq-llu qanertuq, “Ilumun maligciiqamken; tau͡gaam, cirlakellra elpet nanrautekngaitan, tua-i-wa ATANREM tunciqngaku Sisera arnam.” Deborah-m-llu nangerrluni maligtaa Barak-aaq Kedesh-aamun.

¹⁰Barak-aam-llu taisqak Zebulun-aankuk Naphtali-llu Kedesh-aamun; qulen tiissitsaat (10,000) mayurtut kingunrakun; Deborah-m-llu maliggluku mayurtuq.

¹¹Wani-wa Heber-aaq Kenite-aq avtellruuq, taukut Hobab-aam kinguveqai, Moses-aam cakian, pelatekani-llu napartellruluku napam Zaanannim-aami uitalriim canianun, taum yaaqsinritaa Kedesh-aaq.

¹²Sisera qanrucatni Barak-aaq Abinoam-aam qetunraa mayullruniluku Tabor-aam Ingrianun,

¹³Sisera-m qayagaurai tamalkuita ayagassuutni caviit akalrialget, tiissitsaam avga yuinarnek yuinarnek cipluku (900), anguyagten̄i-llu tamalkuita, Harosheth-aarat-Gentile-at Kishon-aam Kuiga tekilluku.

¹⁴Deborah-llu qanertuq Barak-aamun, “Nangerrluten! Wani-wa uumi ernermi ATANREM cikiutekaa Sisera unatevnun. ATANREM-qaa ciuliqaqtenritaaten?” Tua-i Barak-aaq atrartuq Tabor-aam Ingrianek qulen tiissitsaat (10,000) anguyagtain maliggluku.

¹⁵Barak-aaq anguyagten̄i-llu curukallratni ATANREM Sisera uunguciirucetaa tapeqluki ayagassuutai anguyagtai-llu. Sisera-llu atrartuq ayagassuutminek qimagluni-llu aqvaqurluni.

¹⁶Barak-aam-llu maligtai ayagassuutet anguyagtet-llu Harosheth-aaratnun-Gentile-at, tamarmeng-llu Sisera-m anguyagtai iquut nuussirpagkun; atauciunger'mi uitavkenani.

¹⁷Sisera-llu qimagtuq aqvaqurluni Jael-aam pelatekaanun, Heber-aam Kenite-am nulirran; inglukutetailan Jabin-aankuk angayuqran Hazor-aam akuliik ilakutellriarin-llu Heber-aam Kenite-am yuin.

¹⁸Jael-aaq an'uq pairrluku Sisera, elliinun-llu qanertuq, “Taitai, takarnarqellriami, pelatekamnun. Alingevkenak.” Tua-i ellii itertuq, iiraa-llu tunuanun 'lumarram capkutam.

¹⁹Sisera-llu qanertuq elliinun, “Kaigavikamken merr'icesqellua; meqsugtua.” Ikirciluni-llu qecigmek milegmek imalegmek merr'itaa, cali tuamtellu iirluku.

²⁰Sisera-llu qanertuq elliinun, “Nangerten pelatekam amiiganun, kia-llu tailuni apeskaten, ‘Kina-qaa maantuq?’ qanqina, ‘Qang'a.’”

²¹Tau͡gaam Jael-aaq Heber-aam nulirra pelatekam ussukcaanek tegutuq, mulut'uugmek-llu, niugilcaarluni-llu ullagaa kapulluku-llu ussukcaq ayakutaraanun, nunamun anvianun, inangqaluni qavallrani mernuami. Tua-i yuunrirtuq.

²²Barak-aam-llu maligtellrani Sisera, Jael-aaq an'uq paircarturluku, qanertuq-llu elliinun, “Tailuten nasvitnaamken yuaqengarpenek.” Ellii-llu itertuq pelatekaanun; tangrraa-llu Sisera inangqaluni tuqumaluni, pelatekam ussukcaanek kapumaluni ayakutaramikun.

²³Tua-i tuani ernermi Agayutem Israel-aanun cirlakevkaraa Jabin-aaq Canaan-aam angayuqra.

²⁴Israel-aam-llu yuin inglukaat pingiinarluku Jabin-aaq Canaan-aam atanra, piunrirvimeggnun.