Read Yupik Judges 5 Bible Online

Judges 5 - Yupik bible

Judges 5

¹Tua-llu aturtuk Deborah-nkuk Barak-aaq-llu Abinoam-aam qetunraa tuani ernermi:

²Ciuliqagtet ciuliqagglit Israel-aami yuut tunlit ellmeggnek tengruluteng, atawaqerli ATANEQ!

³Niici, angayuqani; niicugnici, angayuqat qetunraitni; ATANERMUN aturciqua, niitnirqelriamek yuarut'liciqua ATANERMUN, Israel-aam Agayutiinun.

⁴ATANEQ, ayallerpeni Seir-amek, piyuallerpeni Edom-aam nuniinek, nuna uulegtellruuq, qiliit-llu igtellruut, Aa-ang, amirlut ellallillruut.

⁵Ingrit pektellruut ATANREM ciuqerrani, Israel-aam Agayutiin.

⁶Shamgar-am, Anath-aam qetunraan nalliini, Jael-aam nalliini ayagalriit ungungssitgun qulugtellriatgun arulaillruut pektaulriit-llu tumyara'arteggun yugyanrilngurteggun gilerrluteng.

⁷Israel-aami-llu yuut calilriit caliameggnek arulaillruut, taivigpenun aanaulriatun Israel-aamun, Deborah.

⁸Nutarat agayutet cucukumaaqata, anguyak ikirtuqaani uitalartuq.

⁹Ircaquqa naklegyugtuq atanirturtainek Israel-aam ellait tunellruluteng ellmeggnek tengruluteng yugnun ilaulluteng. Atawaqerli ATANEQ.

¹⁰Qanrutkiciu, elpeci ayalalriani tungurrlugcetellriatgun ciulvagteggun, elpeci-llu aqumgalalriani akitulriani curuni elpeci-llu piyualalriani tumyaratgun.

¹¹Niicugniluki aturcetaartet elakat nuniitni, tuani qanrutkenqigtelarait cirlakillri ATANREM, Cirlakillrit elliin yuin Israel-aami. Atrarluteng-llu ikirtuqamun piyualuteng yui ATANREM.

¹²Tupii, tupii, Deborah! Tupii, tupii atua yuarutmek! Nangerten, Barak, ciuliqaggluki ayauski teguaten, elpet Abinoam-aam qetunraani.

¹³Tua-llu atrartut piyualuteng ilakuarrait yuut quyinrita; yui ATANREM piyuagut ellii pitekluku inglulirluki pinilegpaulriit.

¹⁴Kingunirluteng Ephraim-aamek ayagtut segnayugmun, maliggluten elpet, Benjamin, ilaten-llu; Machir-aamek piyuagut atanirturilriit, Zebul-aamek-llu tegumialriit atanerruam ayaruanek;

¹⁵angayuqat qetunrait Issachar-armiut taigut Deborah maliggluku, Issachar-aq-llu piciuguq Barak-aamun; segnayugmun ciumurtut kingunrakun. Reuben-aam-llu yuini ayuqucingcartut cumiggluteng ircaqumegteggun.

¹⁶Ciin uamsit qusngit eniitni niitnaluku-qaa qalriacetaaq qayagaurutiit katngaat? Reuben-aam yuini ayuqucingcartut cumiggluteng ircaqumegteggun.

¹⁷Gilead-aaq uitauq yaatiini Jordan-aam; Dan-aq-llu ciin uitaurta angyarpagni? Asher-aaq uitaurtuq imarpiim cen̄iini, nunaliluni culurrvillmi caniani.

¹⁸Zebulun-aaq yuuguq aarniurtelluki unguvateng tuqumun; Naphtali-llu anguyautellriit anguyagviktukiitni.

¹⁹Angayuqat taillruut anguyagluteng-llu tua-llu Canaan-aam angayuqri anguyallruut, Taanach-aami, Megiddo-m mer'an caniani; uayaarillrunritut qerrirlinek.

²⁰Qilagmek agyat anguyallruut, tumemeggni anguyallruut akiurluku Sisera.

²¹Ulerpiim Kishon-aam ayautai, Tuknilriim ulerpiim, ulerpiim Kishon-aam. Piyuagi, yuucimaa, pinirpak aturluku!

²²Tua-llu qastuluteng tutmallrat horse-aat it'gait pangalelriit Pangalelriit elliin horse-aarin.

²³Aniqlaamalit assiitellriamek uitavikestai, tua-i-wa taillrunrilata ikayuryarturluku ATANEQ, ikayuryarturluku ATANEQ akinaurluki pinilegpaulriit.

²⁴Arcaqerluni atawaqaumali arnani Jael-aaq, Heber-aam Kenite-am nulirra, pelatekani uitalriani arnani arcaqerluni atawaqaumali.

²⁵Sisera kaigallruuq mermek, elliin-llu cikillrua milegmek, taitellrua-llu milgem uitallrem pugcaqrinek tangnirqelriakun qantakun.

²⁶Jael-aam unatni ellillrua pelatekam ussukcaanun tallirpini-llu calistem mulut'uuganun; kaugtullrua Sisera, ciamtellrua qamiqurra, navgullrua ukilluku-llu ayakutaraa.

²⁷Igtellruuq, igtellruuq; it'gainun igtellruuq, iqullruuq; iggviminun, iqullruuq tuquluni.

²⁸Egalerteggun kiartellruuq aanii Sisera-m kiartellruuq akuliitgun egalret patuita: “Ciin ayagassuun akalrialek muluvakarta? Ciin horse-at cukaipakartat?”

²⁹Umyuartunqurraita arnat kevgain kiugaat, qang'a, ellminek kiuguq,

³⁰“Yuarluki-qaa averqenritait uayaarateng? Neviarcarmek wall'u malrugnek anguyagta atauciq pikirluku: kepcimalrianek-llu 'lumarrarnek Sisera pikirluku, mingeqluki qaraliliumalrianek malrugnek kepcimalriignek mingeqlukek qaraliliumalriignek 'lumarraagnek wiinga uyaqumni atu'urkamnek?”

³¹Taumek piunrireski tamalkuita inglukesteten, ATANEQ! tau͡gaam yugnikek'ngaten ayuqlit akertetun puglalriatun pinini aturluku. Nuna-llu qinuituq allrakuni yuinaagni malrugni (40).