Read Yupik Judges 6 Bible Online

Judges 6 - Yupik bible

Judges 6

¹Israel-aam yui pulenglluteng assiilngirtut ATANERMUN; taumek elliin Midian-aam yuinun ataniungevkarai allrakuni malrunlegni.

²Midian-aat pininruata Israel-aani, Israel-aam yuin iilarait qerranqunun teggalquni pengegnailngurnun-llu qemini.

³Tua-i Israel-aat nauceciigaqata, Midianite-at Amalekite-at-llu yuut-llu kinguvellgutkellriit mertailngurmek nunamek taillret curularait.

⁴Pelatekiluteng-llu nuniitni inglukluki piunrirtaqluki nunam naugillri yaaqvaq ungalalirnera Gaza-m nunii tekilluku. Tamalkuita teguaqluki qusngit, kuluviit, ciulviit-llu, camek-llu uitaciivkenateng Israelite-at yuutekaatnek.

⁵Tua-i tailaameng kuluvauteteng pelatekateng-llu malikluki, amllellriatun petgertayulitun tekitaqluteng. Tamarmeng yuut ungungssit-llu qulugtellriit amllertaciit naaqumasciiganateng. Tekilluteng navguraqluku nuna,

⁶Israel-aat-llu qaillun pisciiganaki.

⁷Tua-i-llu Israel-aam yui qayagaut ATANERMUN ikayuusqelluteng Midianite-anek,

⁸prophet-aamek-llu ellaitnun ayagceciuq qanrucarturtelluki qanellranek ATANREM, Agayutiin Israel-aam: “Anutellruamci teguarullerpecen̄ek Egypt-aamek.

⁹Aviutellruamci Egypt-aarmiunek, yugnek-llu nangcestevcen̄ek maani nunami. Anlluki-llu ciunerpecen̄ek, cikirluci-llu nuniitnek.

¹⁰Qanrutellruamci-llu ATANRUNILUA Agayutsi elpeci ciktaarvikesqevkenaki-llu agayutait Amorite-at maa-i nuniitni uitangelriaci. Tau͡gaam elpeci niitellrunritarpecia.”

¹¹Tua-llu an'gilaa ATANREM taiguq nunarrarmun Ophrah-mun, aqumluni-llu napam oak-am acianun tauna Joash-aam pikluku, angutem tungayakellriarinek Abiezer-aam. Qetunraa-wa Gideon-aaq mukaarkanek carririlria aassaqu'urluni wine-arkiurvigmi, Midianite-anun tangercecaaqevkenani.

¹²ATANREM-llu an'gilaan alairvikaa tuani ellii qanerluni-llu, “ATANREM nayuraaten, elpet alinguraranrilngurmi angutmi!”

¹³Gideon-aaq qanertuq elliinun, “Kaigavikamken qanrusnga, ATANREM nayuqakut ciin makut tamarmeng wangkutnun tut'at? Nauwa-llu assilriit caliallri atamta wangkutnun qanrutkelallrit ATANREM pilallri, qaillun anutellra Egypt-aamek? ATANREM cakaaraakut unilluta-llu umyugiurutkesqelluta Midianite-anun.”

¹⁴Tua-llu ATANREM ellimerraa, “Ayii piniucin aturluku aviulluku-llu Israel-aaq Midianite-anek. Wiinga tungaunii ayagcetamken.”

¹⁵Gideon-aaq kiuguq, “Tau͡gaam, ATANEQ, qaillun wii anirtuayagciqsia Israel-aaq? Wiinga tungayiinka pinialqurraugut Manasseh-m kinguveqellriarini, wiinga-llu caunrilqurraulua nakmiin ilamni.”

¹⁶ATANEQ kiuguq, “Piyugngauten tua-i-wa wiinga ikayurciqngamken. Iquciiqaten Midianite-at ataucitun yugtun pitarrluki.”

¹⁷Gideon-aaq-llu qanertuq, “Waniwa elpenun ilukegcinarqekuma, nasvisnga nallunairutmek ilumun elpengucivnek, ATANEQ.

¹⁸Ayagyaqunak taitnatkamnun elpenun cikiutmek neqmek.” Ellii-llu qanertuq, “Uitaurciqua uterrnatkarpenun.”

¹⁹Tua-i Gideon-aaq itertuq eneminun kenirluni-llu qusngirngalngurmek piyagarmek quuleciryarailngurmek-llu kelipiluni usperem pitatiinek mukaamek. Kemek-llu ekaa assigtamun, imarkuaq-llu egatmun, agutai-llu taukut ATANREM an'gilaanun napam oak-am aciani uitalriamun tunluki-llu elliinun.

²⁰An'gilam-llu qanrutaa, “Elliu kemek kelipaq-llu wavet teggalqum qainganun, kuvluku-llu imarkuaq qaingagnun.” Gideon-aaq-llu tuaten piuq.

²¹ATANREM-llu an'gilaa yagtuq agturluku-llu kemek kelipaq-llu nuuganek muraggaam tegumiami. Teggalquq-llu maq'uq kenermek ekualuku-llu kemek kelipaq-llu. Tua-i-llu an'gilaq cataiteqerluni.

²²Gideon-aam-llu elpekaa ATANREM an'gilaanek tangrrucini, alingqapiggluni-llu qanertuq, “Pinirpaulria ATANEQ! Tangellruaqa an'gilaan kegginaa qukarturluku!”

²³Tau͡gaam ATANREM qanrutaa, “Uitanqegci. Alingenrilu. Tuqungaituten.”

²⁴Gideon-aaq-llu ekuaviliuq tuani ATANERMUN acirluku-llu “ATANEQ Uitanqegcitnguuq.” (Una erneq engelkarrluku cali nangengqauq Ophrah-mi, tungayakellriarinek Abiezerite-aam pikesterluni.)

²⁵Tuani unugmi ATANREM qanrutaa Gideon-aaq, “Atavet kuluviinek teguten allamek-llu allrakungelriamek malrunlegnek, navgurluku-llu atavet ekuavia Baal-amun, iqulluku-llu nallunairutii agayutnguam Asherah-m, canianelnguq.

²⁶Nauciluten-llu elluarrluni pilimalriamek ekuavigmek ATANERMUN Agayutevnun kangrani uum qertulriim. Tua-i-llu teguluku kinguqlia kuluvak tamalkuuciatun-llu ekuavkarluku elliitnguluku, murirluten nallunailkutaanek Asher-aam iqutellerpet.”

²⁷Tua-i Gideon-aaq nakmiuq qulnek pistem̄inek piluni-llu ATANREM qanrutellruciatun. Alingessiyaagami ilaminek taukut-llu nunat yuitnek ernermi pillerkaminek, unugmi piuq.

²⁸Nunat yuit unuakuayaarmi makcameng, tangrraat Baal-am ekuavia navguumaluni, nallunailkutaa-llu Asherah-m iqusngaluni, kuluviim-llu tunglia ekuamaluni ekuavigmi tuani piliaqumallermi.

²⁹Ellmeggnun-llu qanruyutut, “Kia una waten piagu?” Kangiiturluteng-llu kangingaat Gideon-aamun Joash-am qetunraanun pillrucia.

³⁰Qanertut-llu Joash-amun, “Anusgu qetunraan, tuqutniarput! Navgullruaku ekuavia Baal-am iqulluku-llu Asherah-m nallunailkutaa.”

³¹Tau͡gaam Joash-am qanrutai tamalkuita ullagluni apqaurten̄i, “Qanekluartuci-qaa Baal-aq pitekluku? Anagyaaqutarci-qaa? Kina imna qanekluarautekestii tuqucimaciquq unuakurpailgan. Baal-aq-gguq agayutngukuni, ellminek anagyaaqulli. Elliin ekuavia navguumallruuq.”

³²Tuakenirnek Gideon-aaq aterpagcimauq Jerubbaal-amek, Joash-am qanellra pitekluku, “Baal-aq-gguq ellminek anagyaaqulli; elliin ekuavia navguumallruuq.”

³³Tua-llu Midianite-at, Amalekite-at, mertailngurmek-llu nunamek kinguvellgutkellriit quyurtut, qerarluku-llu Jordan-aam Kuiga, pelatekiurtut Kuignayuani Jezreel-am.

³⁴ATANREM anerneran imiraa Gideon-aaq, elliin-llu cupu'uryaraq cupaa tailuki angutnun tungayakellriarinek Abiezer-aam maligcesqelluni.

³⁵Ayagceciuq-llu kevganek tamiin Manasseh-mun tailuki maligcesqelluni. Ayagceciuq kevganek Asher-aamun, Zebulun-aamun, Naphtali-mun-llu, tailuteng-llu ellaita-llu maligcarturaat.

³⁶Tua-i-llu Gideon-aaq qanertuq Agayutmun, “Elpet qanertuten umyuangniluten wii aturlua aviutnaluku Israel-aaq.

³⁷Tangerrluku, elliigua qivyumek nunamun mukaarkanek carririvikelallemten̄un. Tua-llu unuakumi yukutareskaku qivyuq kiingan, kinerrluku-llu cailkaq tamarmi, nutaan nallunriciiqaqa elpenun aviutarkaucia Israel-aaq wiinga aturlua, qanellrucirpetun.”

³⁸Tuatqapiar-llu piuq. Gideon-aaq maktellermini unuakuayaarmi ciurluku-llu qivyuq yukutamek qantam imarkanranek mermek.

³⁹Gideon-aaq-llu qanertuq Agayutmun, “Qenngucaaqunii; ataucirqumek cali qanercessnga. Kaigavikamken naspaavkarnga ataucirqumek qivyuq aturluku. Maa-i qivyuq kiingan kinerceskiu, cailkaq-llu mecungevkarluku.”

⁴⁰Agayun-llu tuaten piuq tuani unugmi. Unuakumi tua-i qivyuq kiimi kinertellruuq, tau͡gken tamarmi cailkaq mecungluni yukutamek.