Read Yupik Judges 7 Bible Online

Judges 7 - Yupik bible

Judges 7

¹Tua-llu erenret iliitni Gideon-aaq tamarmeng-llu anguyagtai makcara'arluteng pelatekiurtut Harod Spring-am canianun. Midianite-at pelatekarviat kuignayugmi neglirneratni uitaluni caniani Pengum Moreh-m.

²ATANEQ-llu qanertuq Gideon-aamun, “Anguyagtet maliten amllessiyaagtut cirlakivkallerkamnek Midianite-anek. Umyuarteqciqut ellmeggnek anagkengyukluteng, wiinga-llu tayima qanrutkeqerngaunii.

³Qanruski yuut tamalkuita niitelluki, ‘Kina alingelria kingunerminun uterrli, wangkuta maanciiqukut Ingrimi Gilead-aami.’” Tua-i tiissitsaat yuinaat malrugnek tiissitsaagnek cipluku (22,000) utertut, qulen-llu tiissitsaat uitaluteng (10,000).

⁴Tua-llu cali ATANEQ qanertuq Gideon-aamun, “Cali anguyagteten amllessiyaagtut. Atrauski mermun, wiinga-llu avguciciiqamken tuani. Qanruskumken taumun angutmun maligcesqelluten, ayagciquq. Qanruskumken taumun angutmun maligcesqevkenak, ayagngaituq.”

⁵Gideon-aam atrautai mermun, ATANREM-llu qanrutaa, “Allakaqiki melriit alungluteng qimugtetun ciisqumiggluteng melrianek.”

⁶Yuinaat akimiaren (300) unatmegteggun mermek qaluciluteng mellruut; ilait-llu tamarmeng ciisqumiggluteng pull'uteng mertut.

⁷ATANEQ-llu qanertuq Gideon-aamun, “Aviuciiqamken cirlakevkarluki-llu Midianite-at anguyagtet yuinaat akimiaren (300) aturluki mellret unatmeggnek. Qanruski ilait utercesqelluki kingunritnun.”

⁸Tua-i Gideon-aam tamalkuita Israelite-at utercetai, uitalluki tau͡gaam yuinaat akimiaret (300), aulukestait tamalkuita aklumeng cupu'uryarat-llu. Pelatekarviat Midianite-at kana-i uitauq aciatni kuignayugmi.

⁹Unuan ATANREM ellimerraa Gideon-aaq, “Makluten curuggu pelatekarviat; cirlaklerkaanek cikiramken.

¹⁰Tau͡gaam alingekuvet curullerkarpenek, atraa pelatekarvigmun Purah pisten malikluku.

¹¹Niiciiqaten camek qalaruciat, tua-i-llu caceturiciquten curullerkarpenun.” Tua-i Gideon-aaq atrartuq Purah pisten̄i malikluku elatiinun inglumi pelatekarviata.

¹²Midianite-at, Amalekite-at, tamarmeng-llu mertailngurmek nunamek kingunelget yuut uitaut sagqurluteng kuignayugmi petgertayulitun amllertaluteng, ungungssiutait-llu naaquciinateng, qau͡gyatun imarpiim sen̄iinelngurtun amllerameng.

¹³Gideon-aaq tekitellermini, niituq angutmek qanemcilriamek yugnikekminun qavanguminek. Qanerluni, “Qavangurturtua mukaarkamek barley-mek pilimalriamek kelipamek akalriamek pelatekaumavimtenun, pelatekamun-llu tull'uni. Pelatekaq-llu im'uq cailkami-llu uitaqerluni.”

¹⁴Yugnikek'ngaa qanertuq, “Tauna Israelite-at nuussirpakaat, Gideon-aaq Joash-am qetunraa! Allaunrituq! Cirlakutmek Agayutem cikiraa Midian-aanun tamalkuitnun-llu anguyagtemten̄un.”

¹⁵Gideon-aam-llu niicamiu man'a angutem qavangua taikaniumallra-llu, ciisqumiggluni ciktaartuq ATANERMUN. Uterrluni-llu Israel-aat pelatekaumaviatnun qanertuq, “Makci! ATANREM cikiraci cirlakutmek Midian-aam anguyagtainun!”

¹⁶Avgai-llu yuinaat akimiaren (300) anguyagtet pingayuirrluki, cupu'uryaranek-llu tegumiirluki imailngurnek-llu mer'utnek, ekualrianek kumarutnek imirluki.

¹⁷Qanrutai-llu, “Tekiskuma iquanun pelatekaumaviim, tangvakicia, pillemtun-llu pikici.

¹⁸Malima-llu cupkumteki cupu'uryaraput, cupkiciki cupu'uryaraci pelatekaumavik kassugarrluku, qayagpagluci, ‘ATANEQ Gideon-aaq-llu pitekluku!’”

¹⁹Gideon-aaq-llu malini-llu yuinaat talliman (100) amllertalriit tekitut elatiinun pelatekaumaviim unuk qukaqatartelluku, nayurta cimiqanrakun. Tua-i-llu cupu'uryarat qalriagait navegluki-llu tegumiateng mer'utet,

²⁰Malruin-llu malikellriit tuaten cali piluteng. Tamarmeng kumarutet ekualriit tegumiaqluki iqsulirnerkun, tallirpilirnerkun-llu cupu'uryarat, qayagpagtut-llu, “Nuussirpak ATANREM pia Gideon-aam-llu.”

²¹Tamarmeng-llu nangengqaut uitallerkiurumallermeggni kassugulluku pelatekaumavik, anguyagtet-llu tamarmeng aqvaqurluteng ayaguraut qayagpagaluteng.

²²Gideon-aam anguyagtain qalriavkallratki cupu'uryarat, ATANREM ingluit atunem calluucetai nuussiirpaitgun. Qimagtut-llu Beth Shittah tekilluku, Zerethan-aam tungiinun, tekilluku-llu nunarrii Abel Meholah Tabbath-aam mallgeskii.

²³Anguyagtet-llu kinguveqellriartainek Naphtali-m, Asher-aam, tamiinek-llu Manasseh-mek qayagaurumaut, malirqerait-llu Midianite-at.

²⁴Gideon-aaq-llu ayagceciuq kevganek tamiin pengulilriamun nuniinun Ephraim-aam qanerluteng, “Anguyagyarturciki Midianite-at nayurluki-llu kuiget qerallerkait, Bethbarah tekilluku, Jordan-aaq-llu.” Tua-i tamarmeng Ephraim-aarmiut anguyagtet qayagaurumaut, nayurait-llu kuiget Bethbarah tekilluku, Jordan-aaq-llu.

²⁵Angayuqak-llu qetunrakegnek malrugnek tegutut, Oreb-aankugnek Zeep-aq-llu; tuqulluku-llu Oreb-aaq, Oreb-aam Teggalqurtaani, Zeep-aq-llu tuqulluku Wine-aliviani Zeep-am. Maligqurarait-llu Midianite-at taitagket-llu qamiqukek Oreb-aankuk Zeep-aq-llu Gideon-aamun, keggaknelirneranun Jordan-aam tekitnerakun.