Read Yupik Judges 8 Bible Online

Judges 8 - Yupik bible

Judges 8

¹Ephraim-aarmiut-llu qanertut Gideon-aamun, “Ciin qayagauqsaicikut anguyagyartullerpeni Midianite-at?” Qanemyuugartut-llu umyuateng assiinaku.

²Elliin tau͡gaam qanrutai, “Wiinga piyugngalqa caunrituq pitassiaruskumten̄i elpeci caliallerpecen̄un. Carraunge'rmi caliallerci elpeci Ephraim-aam yuini carpaunruuq caliallratni tamarmeng tungayama.

³Elpeci-wa, Agayutem piniakun tuqutellrukci malruk Midianite-at angayuqak qetunrakek, Oreb-aankuk Zeep-a-llu. Camek wii pillrusia ayuqestassiigutkamnek elpeci pillerpecen̄un?” Waten qanran, eq'urtellrat elliinun utumartuq.

⁴Gideon-aaq yuinaat-llu akimiaret (300) anguyagtet waniwa tekitellrurtut Kuigmun Jordan-aamun qerarluku-llu. Mernuqapiarluteng, tau͡gken cali ingluteng maliggluki.

⁵Tekicameng-llu Sukkoth-aamun, qanertuq taukut nunat angutaitnun, “Kaigavikamci cikiisqelluki anguyagtenka kelipanek. Wani-wa mernuata, wiinga-llu maligglukek Zebah-nkuk Zalmunna-llu Midianite-ak angayuqak.”

⁶Tau͡gaam atanerruari Sukkoth-aam qanertut, “Ciin cikirciqseta anguyagteten neqkamek? Zebah-nkuk Zalmunna-llu teguaqeksaileng'e'rpekek?”

⁷Taumek Gideon-aaq qanertuq, “Kitaki, ATANREM taiskakek Zebah-nkuk Zalmunna-llu wangnun, piqertuarciqamken cukilanainek yuilqum, napainek-llu cukilanat nauvikumakaitnek.”

⁸Gideon-aaq ayagtuq Penuel-aamun kaigavikluki-llu tamakumiut yuut cali tuaten, tau͡gaam Penuel-aarmiut-llu kiugaat Sukkoth-aarmiut kiullruciacetun.

⁹Taumek elliin qanrutai, “Tainqigciiqua camek natlugutaunii tuani-llu una sugtulria ena imciiqaqa!”

¹⁰Zebah-nkuk Zalmunna-llu Karkor-amtuk anguyagcetek ilakluki. Tamarmeng anguyagtet mertailngurmek nunamek kinguvellgutkellriit akimiaren tiissitsaat (15,000) nuniini amllertalriit uitaqallruut; tuani piunriumallruut yuinaat arvinlegen tiissitsaat (12,000).

¹¹Gideon-aaq-llu ayagtuq tumyarakun mertailnguum nunam iquan mengliikun, calaralirnerakun Nobah-m Jogbehah-m-llu, curugluki-llu anguyagtet alangiilluki.

¹²Imkuk malruk Midianite-ak angayuqak qetunrakek Zebah-nkuk Zalmunna-llu qimagtuk, tau͡gaam elliin maligtak teguaqlukek-llu, tamalkuita-llu anguyagtekek nanikuavkarluki.

¹³Tua-i-llu Gideon-aaq utertellermini anguyagmek atraryaraakun Heres-aam,

¹⁴tegukenguq ayagyuamek yun'erra'armek Sukkoth-aarmiumek, apqaurluku-llu. Ayagyuam yun'erra'araam igaulluki tunai Gideon-aamun atrit atanerruarita ciulirnerita-llu Sukkoth-am, yuinaat pingayun akimiaq malrugnek cipluku (77).

¹⁵Gideon-aam-llu anguyagtai Sukkoth-am qanerluni-llu, “Neq'akaci-qaa wangnek ikayuqengyuumiitellerci? Qanellruuci cikiqengengaitniluci neqmek mernulrianun anguyagtemnun teguaqeksaitnilukek Zebah-nkuk Zalmunna-llu. Tangercikek kitak waniwa!”

¹⁶Tegutuq-llu cukilanainek yuilqum napanek-llu cukilanat naumakaitnek tamakunek-llu aturluni anucimirqecetaarai ciuliqagtai Sukkoth-am.

¹⁷Imtaa-llu sugtulria enengutii Penuel-aam, tuqulluki-llu nunarpiim angutai.

¹⁸Tua-llu Gideon-aam aptak Zebah-nkuk Zalmunna-llu, “Angutet-mi imkut tuquteltek Tabor-aami?” Kiuguk-llu, “Elpetun taukut ayuqellruut tamaq'apiarmeng angayuqam qetunraitun ayuqluteng.”

¹⁹Gideon-aaq qanertuq, “Anelgutkellruanka, wii nakmiin aanama qetunrai. ATANEQ unguvaciatun unguvavkallrukuvteki, tuqucanritamtek.”

²⁰Qanertuq-llu Jether-aamun qetunrangqerraarutminun, “Kiiki, tuquskek!” Tau͡gaam tan'gaurluum nuussini amunritaa. Uitaqertuq, tua-i-wa ayagyuarami.

²¹Tua-llu Zebah-nkuk Zalmunna-llu qanertuq Gideon-aamun, “Kiiki, elpenek tuquskuk. Angutem caliaqerkaugaa angutem caliarkaa.” Tua-i Gideon-aam tuqutak teguluki-llu tangnircaucet uyaqurritnelnguut ungungssiita qulugtellriit.

²²Tamatum kinguani, Israelite-at qanrutaat Gideon-aaq, “Atanirturkut, elpet kinguveten-llu. Anirtullruavkut Midianite-anek.”

²³Gideon-aaq kiuguq, “Wiinga atanrungaitua elpecen̄un, wall'u qetunraqa. ATANEQ atanirturtekciqaaci.”

²⁴Waten-llu iqulirluku, “Pitekliqerlii ilavcen̄ek. Tamarpeci cikircia aqlitnek uayaaqengallerpecen̄ek.” (Midianite-at, ilamegcetun mertailngurmi nunami uitalalriacetun, suulutaanek aqlitengqerrata.)

²⁵Yuut-llu kiugut, “Tengruluta cikiutekciqaput.” Sagciut-llu 'lumarrarmek, tamarmeng-llu elliivikaat aqlitnek tegukengallermeggnek.

²⁶Suulutaat aqlitet Gideon-aam piteklillrin uqamiit amllertauq yuinaak malruk (40) cipluku usperumallermeggni, ilakevkenaki tangnircautet, uyamiit, kavirlit-llu 'lumarraat angayuqrita Midianite-at atulallrit, uyaqurrutellrit-llu ungungssit qulugtellriit.

²⁷Gideon-aaq piliuq agayutnguamek taukut aturluki, nunarpaminun-llu elliluku, Ophrah-mun. Tamarmeng Israelite-at cakaaraat Agayun tauna-llu ullagluku ciktaarvikaat agayutnguaq. Gideon-aamun nakmiin-llu ilainun man'a napcetaarutnguuq.

²⁸Tua-i Midian-aat cirlakumaut Israelite-atgun alingnairulluteng. Nuna-llu uitanqegcinariut allrakuni yuinaagni malrugni (40), Gideon-aam tuqullra tekilluku.

²⁹Gideon-aaq utertuq nakmiin eneminun tuanlluni-llu.

³⁰Wani-wa Gideon-aaq qetunrangqertuq yuinaat pingayun qulmek cipluku (70), tua-i amllernek nuliangqerrami.

³¹Malrukanengqertuq-llu cali Shechem-aami; tuaggun-llu qetunranguq, aciraa-llu Abimelech-aamek.

³²Gideon-aaq-llu Joash-am qetunraa yuunrirtuq ak'allaurtenqegcaarluni, tungmagcimaluni-llu qunguani Joash-am atami, Ophrah-mi, nunarraatni tungayakellriarin Abiezer-aat.

³³Kinguani Gideon-aam tuqullran, Israel-aam yui cali ukvenrirtut Agayutmun agayulangluteng-llu Baal-anun. Agayuteksagulluku Baal-aa Akqutem,

³⁴kevgiunrirluku-llu ATANEQ Agayutseng, anirturtellerteng tamalkuitnek inglukestemeggnek avatmeggni.

³⁵Gideon-aam nakmiin ilai elingrakevkenaki tamalkuitnek assilrianek pillritnek Israel-aamun.