Read Yupik Judges 9 Bible Online

Judges 9 - Yupik bible

Judges 9

¹Gideon-aam qetunraa Abimelech-aaq ayagtuq nunarrarmun Shechem-aamun, aanami ilakutain uitaviatnun, qanrulluki-llu

²apcesqelluki angutai Shechem-aam, “Naliak assinrua elpecen̄un, tamalkuitnun yuinaat pingayun qulmek cipluku (70) qetunrainun Gideon-aam ataniurtelluci, wall'u-qaa ataucimun angutmun? Umyuaqiciu Abimelech-aaq nakmiin kemellgutkarci aullgutekluku-llu.”

³Aaniin-llu ilakutain qanrucitaat makunek angutainun Shechem-aam, angutai-llu Shechem-aam maligucugtut Abimelech-aamun, ilakutaqngamegteggu.

⁴Cikiraat yuinarnek pingayunek (60) qerrirlinek agayuvianek Baal-am Akqutem, taukut-llu akit aturluki calistekanek pillruuq cautngunrilngurnek angutnek ilikaminek.

⁵Ayagtuq atami eniinun Ophrah-mi, tuani-llu teggalqum ataucim qaingani tuqutai yuinaat pingayun qulnek cipluku (70) anelgutni, Gideon-aam qetunrai. Jotham-aaq tau͡gaam Gideon-aam qetunrain kinguqlikacagiit iirtuq tuqucimavkenani-llu.

⁶Tua-i-llu tamarmeng angutai Shechem-aam Bethmillo-m-llu quyurrluteng ayagtut qigcignarqellriamun napamun oak-amun Shechem-aami, tuani-llu Abimelech-aaq angayuqrurtaat.

⁷Mat'umek Jotham-aaq niicami, ayagtuq nangerrluni-llu kangranun Gerizim-aam Ingrian qayagpagluni-llu qanertuq ellaitnun, “Niicugnicia, Shechem-aam angutaini, Agayutem-llu niicugnikilici!

⁸Napat caqerluteng ayagtut cucuklirnaluteng atanerkameggnek. Qanertut olive-aat napaatnun, ‘Ataniurkut.’

⁹Tau͡gaam olive-aat napaat kiuguq, ‘Ataniuqataqumci, taq'erkaugaqa uqulilalqa, atuulalria takarnarcarluki agayutet yuut-llu.’

¹⁰Tua-llu napat qanertut fig-anek atsangtulimun napamun, ‘Tailuten ataneqnaamteggen.’

¹¹Tau͡gaam napa fig-anek atsangtuli kiuguq, ‘Ataniuqataqumci, taqnarqaqa naugilalqa assilrianek neqnirqellrianek naunrarnek.’

¹²Cali tua-i napat qanertut wine-am napaanun, ‘Taitai ataniurluta-llu.’

¹³Tau͡gaam wine-am napa kiuguq, ‘Ataniurarkaukumci, taqnarqaqa wine-alilalqa, angnirivkartiit agayutet yuut-llu.’

¹⁴Tua-llu tamarmeng napat qanertut cukilanamun, ‘Tailuten ataniurkut.’

¹⁵Cukilanaq-llu kiuguq, ‘Piciulriakun cucukekuvcia ataneqsuglua, kitak tailuci uqici talinemnun. Pinrilkuvci, keneq anciquq cukilanamnek ekualuki-llu napai cedar-aat Lebanon-aam.’

¹⁶“Tua-llu kitak,” Jotham-aaq cali qanertuq, “ilumun-qaa iqluvkenaci piciullruuci Abimelech-aaq atanrurtellerpecen̄i? Umyuavciuggun-qaa takaqutmek pillruaci Gideon-aaq ilai-llu assirluki ilaliurluki, elliin caliallra pitekluki?

¹⁷Umyuaqiciu atamnun calluutellrucirci. Unguvani aarniurtelluku aviulluci-llu Midianite-anek.

¹⁸Tau͡gaam ernerpak caulinqaci atama ilai. Tuqutaci qetunrai, yuinaat pingayun qulmek cipluki (70) qaingani ataucim teggalqum, Abimelech-aam, qetunraan pistekun arnakun, ilakellra pitekluku, angayuqrurtaci Shechem-aamun.

¹⁹Tua-llu, waten pillerci ernerpak iqluurutngunrilkan piciuluni-llu Gideon-aamun ilainun-llu, angnillgucirciu Abimelech-aaq elliinun-llu angnillgucircelluci.

²⁰Tau͡gaam tuaten pinrilkan, keneq anli Abimelech-aamek, ekualuki-llu angutet Shechem-aarmiut, Bethmillo-rmiut-llu. Keneq-llu cali anli angutainek Shechem-aam Bethmillo-m-llu ekualuku-llu Abimelech-aaq”

²¹Tua-i alingami anelgutminek Abimelech-aamek Jotham-aaq qimagtuq Beer-ami uitayarturluni.

²²Abimelech-aam-llu ataniuraa Israel-aaq allrakuni pingayuni.

²³Agayutem-llu Abimelech-aaq Shechem-aarmiut-llu angutait inglukucetai, taukut-llu inglulitut Abimelech-aamun.

²⁴Waten pivkaumaut Abimelech-aaq angutai-llu Shechem-aam, ellimerturtellri tuqucesqelluki Gideon-aam yuinaat pingayun qulmek cipluku (70) qetunrai, nunulirnaluku assinrilnguq caliallrat.

²⁵Shechem-aarmiut-llu elkarciut yugnek ingrit kangritnun nayurtekanek, uayaalarait-llu tamalkuita kiturteteng tamaaggun. Qanrutaat-llu mat'umek Abimelech-aaq.

²⁶Gaal-aq-llu Ebed-aam qetunraa tekituq Shechem-aamun anelgutni malikluki, Shechem-aarmiut-llu angutaita ellii kemyukaat.

²⁷Tamarmeng ayagtut wine-arkanek naucetaarvimeggnun quyurrluki-llu wine-arkat atsat, wine-aliluki tutmarluki, nerevkariluteng-llu. Itertut-llu agayuvianun agayutmeng, nerluteng merluteng-llu Abimelech-aaq-llu temciarautekluku.

²⁸Gaal-aq-llu qanertuq, “Qaillun wangkuta ayuqellriarucetaa Shechem-aarmiuni? Ciin kevgiurceta Abimelech-aaq? Kituuga-llu? Gideon-aam qetunraa! Zebul-aam-llu kevgiularaa, ciin-mi tua-i wangkuta kevgiuqatarceta?

²⁹Ukut-tuq yuut wani-wa wii ataniuqerlaki! Abimelech-aaq au͡g'aryaqeka! Qanrucaraqa, ‘Amllerikanirki anguyagteten, anluten-llu callua!’”

³⁰Zebul-aaq, nunarpiim atanirturtii, eq'uqertuq niicamiki qanellri Gaal-am.

³¹Kevganek-llu ayagceciuq Abimelech-aamun Arumah-mi, qaneryartuusqelluki, “Tangerrluku, Gaal-aq Ebed-aam qetunraa ilakutani-llu taillruut Shechem-aamun, itercessngaitaatgen-llu nunarpagmun.

³²Taumek, ayakici unugmi, maliten malikluki nayurluci-llu naucetaarvigni.

³³Tua-llu unuakumi, akerta pugutiini, curukaqiciu nunarpak. Gaal-ankut malini-llu curukaci, pitacirrarpeciuggun akiurniaci!”

³⁴Abimelech-aaq-llu tua-i tamalkuita-llu malini ayagtut unugmi nayurluku-llu Shechem-aaq avegluteng cetamainguluteng.

³⁵Abimelech-aam ilini-llu tangrramegteggu Gaal-aq anluni nangertellrani casguani nunarpiim, nangertut iirumavimeggnek.

³⁶Gaal-am-llu tangrrai qanerluni-llu Zebul-aamun, “Atam tangerqerciki! Angutet atralriit ingrit kangritnek!” “Tamakut angutngunritut,” Zebul-aq kiuguq. “Talinruut ingrini.”

³⁷Gaal-aq-llu qanenqigtuq, “Atam! Angutet atrartut ingrim kangrakun allat-wa cali tailriit tumyarakun kingunerluteng oak-amek napaanek ciunerkarcurtet!”

³⁸Zebul-aam-llu qanrutaa, “Nauwa imkut qanataalten? Elpet apqaullruuten ciin kevgiurnarqucimten̄ek una angun Abimelech-aaq. Imkuugut ukut angutet anglanitekelten? Anluten wanirpak ingluliuryarturki.”

³⁹Gaal-am-llu ciuliqaggluki Shechem-aarmiut anutai, Abimelech-aaq-llu anguyagluku.

⁴⁰Abimelech-aam-llu malirqeraa Gaal-aq, Gaal-aq-llu qimagtuq. Amlleret-llu akngiringaut, ikirtuqaani tuaten nunarpiim.

⁴¹Abimelech-aaq-llu uitauq Arumah-mi; Zebul-aam-llu antaa Gaal-aq ilakutai-llu, Shechem-aami uitangairutevkarluki.

⁴²Unuaquani Abimelech-aaq nallunrirtuq Shechem-aam yui picirkiullinilriit naucetaarvignun anenaluteng,

⁴³tua-i anguyagten̄i avgai pingasuingurrluki, iirluteng-llu naucetaarvignun, utaqaluteng. Tangrramiki angutet anevkarluki nunarpagnek, curugai tuquqnaluki.

⁴⁴Abimelech-aaq anguyagten̄i-llu ciuvaarcata nayurnaluku nunarpiim ikirtuqaa, malruin avgumalriit anguyagtet curugait tamalkuita naucetaarvigni uitalriit tuqulluki-llu tamalkuita.

⁴⁵Anguyautut ernerpak taqeksaunateng. Abimelech-aam-llu teguaqaa nunarpak, yuut-llu tuanelnguut tuqulluki, navgurluku-llu nunarpak, taryumek-llu saggvikluku.

⁴⁶Tamarmeng-llu nayurvigmi Shechem-aami ciuliqagtet mat'umek niicameng, ellmeggnek anagyaaqutut pengegnailngurmun agayuvianun Baal-am Akqutiinun.

⁴⁷Abimelech-aaq-llu qanrutaat tuavet quyurrniluki,

⁴⁸tua-i mayurtuq Zalmon-aam Ingrianun anguyagten̄i-llu. Tuani piqertuutarmek tegutuq, kepulluni-llu napam avayaanek, elliluku-llu tusminun. Qanrulluki-llu anguyagten̄i cukamek ellmitun pisqelluki.

⁴⁹Tamarmeng-llu keputut napam avayaanek; ayuqeliluku-llu Abimelech-aaq ellilarluki muriit pengegnairqumalriim enem mengliinun. Ekuavkaraat-llu, yugtuumaan, tamarmeng-llu tuanelnguut asvairqumalriami tuquut, tayima tiissitsaat (1,000) angutet arnat-llu.

⁵⁰Tua-llu Abimelech-aaq ayagtuq Thebez-aamun, avatairaat-llu tauna nunarpak, teguaqluku-llu.

⁵¹Tau͡gaam pengegnairqumalriamek sugtulriamek enemek pitangqertuq tuani nunarpagmi, tamarmeng-llu angutet arnat-llu nunarpagmi, ciuliqagtetuumarmeng qimagtut tuavet. Amiiget-llu kelucarluki mayurtut enem qainganun.

⁵²Abimelech-aam tekicami anguyagyarturluku pengegnairqumalria sugtulria ena, ullagaa amiiga ekuavkarnaluku.

⁵³Tau͡gaam arnam milqautaa miilissuutem teggalqua qamiqurranun, navekcagluku-llu ilqurra.

⁵⁴Patangnaqluni-llu qayagauq yun'erra'armun caskumi tegumiaqestainun qanrulluku-llu, “Nuussirpiin amugluku tuqusnga, qanresqumanritanka arnamun tuqutnilua.” Yun'erraam tua-i kapaa, ellii-llu tuquuq.

⁵⁵Israelite-at-llu yuin tangrramegteggu Abimelech-aam tuqucia, tamarmeng utertut kingunermeggnun.

⁵⁶Tuaten Agayutem akinauraa picurlallra Abimelech-aam ataminun, tuqutellerminiki yuinaat pingayun qulmek cipluki (70) anelgutni.

⁵⁷Agayutem cali Shechem-aarmiut cakviurcetai assiiluciat pitekluku, Jotham-aam, Gideon-aam qetunraan, qanellruciatun aniqlaallerminiki.