Read Yupik Revelation 1 Bible Online

Revelation 1 - Yupik bible

Revelation 1

¹Jesus Christ-am nallunaillra, Agayutmek cikiumallermek, pistainun nasvaasqelluki tekitarkat an'gilamikun ullagtelluku pisten̄i John-aaq,

²taum nallunairaa Agayutem qaneryaraa, Jesus Christ-am-llu nallunairutii, tangellni-llu tamalkuan.

³Atawaqertuq naaqilria yuut ciuqerratni tekitarkam qaneryarartainek, atawaqertut-llu niitellriit aturluki-llu igausngalriit tuani: pillerkaq canimellian.

⁴John-aam igautii agayuvignun Asia-melngurnun malrunlegnun: Naklekutmek uitanqegcitmek-llu pisqumaaci elliin piulriim, pillrem-llu, piugarkam-llu, malrunlegen-llu Anerneret aqumllertaan ciuqerranelnguut,

⁵Jesus Christ-am-llu piciulriim nallunairturilriim, tuqumalriit-llu yuurteqarraartiita, atanirturtiita-llu nunam atanrin. Taumun kenkestemten̄un assiilngumten̄ek-llu angicestemten̄un aumikun,

⁶atanrurrluta, agayulirten͞gurrluta-llu Agayutmun Ataminun; Elliinun piuli ucurnaq piyunarquciq-llu akwarpak akwanun. Amen.

⁷Tangerrluku, tekiciiquq amirlutgun, tamarmeng-llu iingita tangerciqaat, tamarmeng kapestellrin, nunam-llu naumallgutkelriartai tamarmeng neplirciqut ellii pitekluku. Tuaten pili, Amen.

⁸“Wiinga Ayagneqarraarutnguunga Nangnerulua-llu,” qanertuq Ataneq Agayun, piulria, pilleq-llu, piugarkaq-llu, Caprilnguq.

⁹Wii, John-aaq, anelgutsi Jesus-aakun pillgutsi nanikuallemteggun, Angayuqauvingqellemteggun ilalciucimteggun-llu, qikertami uitallruunga Patmos-aamek aterpagcimalriami, Agayutem qaneryaraa pitekluku, Jesus-aam-llu nallunairutii pitekluku.

¹⁰Anernermetellruunga Atanrem Erenrani, tunumnek-llu niitua erinamek qastuluni cupu'uryaratun.

¹¹Qanerluni, “Tangelten kalikamun igauskiki, ayagtelluki-llu agayuvignun malrunlegnun: Ephesus-aamun, Smyrna-mun, Pergamum-aamun, Thyatira-mun, Sardis-aamun, Philadelphia-mun Laodicea-mun-llu.”

¹²Tua-i-llu kingyartua tangerrnaluku erina qalarutesteka, kingyaama-llu tangertua kenurrarvignek malrunlegnek suulutaanek;

¹³kenurrarviit-llu qukaatni tangertua Yuum Qetunraatun ayuqelriamek, aturiumaluni akurtulriamek naqugngaluni-llu suulutaamek qukamikun.

¹⁴Qamiqurra nuyai-llu qatertaluteng qusngim melqurratun, qanikcartun-llu; iik-llu ciqinqaumalutek kenertun.

¹⁵It'gai-llu punernertun qevlercaumalriatun, kenerkun urugcimallertun, erinii-llu ayuqluni meruugaat nepaicetun.

¹⁶Tallirpilirnemini tegumiangqertuq agyanek malrunlegnek, qanminek-llu anciuq nuussirpagmek atunem kegginalegmek, kegginaa-llu ayuqluni akertetun akervalriatun.

¹⁷Tangrramku, it'gain ciuqerratnun palurtua tuqumalriatun. Tau͡gaam tallirpilirneminek pategvikaanga qanerluni, “Alingevkenak, wii Ayagneruunga Iquulua-llu.

¹⁸Unguvalriarulua-llu; tuqullruunga, tangerrluku-llu unguvaunga nangyuilngurmun, avaliqanka-llu tuqum kelucairissuutai, Anerneret-llu uitaviata.

¹⁹Igauski tangelten, maa-i etellriit cali-llu piugarkat mat'um kinguani.

²⁰Ukut nallunarqellriit malrunelgen agyat unatemni tallirpilirnemni tangelten, malrunelgen-llu kenurrarviit suulutaat piluki, ukut malrunelgen agyat an'gilaqait malrunelgen agayuviit, taukut-llu malrunelgen kenurrarviit taukuugut agayuviit malrunelgen.”