Read Yupik Revelation 10 Bible Online

Revelation 10 - Yupik bible

Revelation 10

¹Allamek cali artuqailngurmek an'gilamek tangertua qilagmek atrarluni, amirlumek caqumaluni, qamiqurran-llu quliini agluryartangqertuq, kegginaa-llu akercetun tanqigtauq, iruk-llu tuarpiaq napalriik kenrek.

²Kalikacuarnek-llu imegyaranek tegumiangqertuq ikingqaluteng. Tallirpilirnemikun-llu it'gamikun imarpik tull'uku, iqsulirnemikun-llu nuna tull'uku,

³qastuluni-llu qayagpagtuq, lion-aatun uirrelriatun; qayagpiin-llu malrunelgen kalluut qasiartut.

⁴Qasiarcata-llu malrunelgen kalluut, igaqataryaaqua, tau͡gaam pakmaken erinamek niitua qanerluni, “Qemageski malrunelgen kalluut qanellrit, igautevkenaki-llu.”

⁵An'gilam-llu tangellma, imarpik nuna-llu tusngaviklukek nangengqalriim, tallirpilirneni tallini qulmun yagtaa.

⁶Ukvernarcarvikaa-llu akwanun piulria, qiliim nunam-llu imarpiim-llu piurcestiit tamakunelnguut-llu, qanerluni, “Ak'anurrlingairutuq!”

⁷Tau͡gaam taukuni ernerni malrunelgat an'gilaq cupkan, Agayutem nallunarqelriartaa piciurciiqniluku nallunaillruciatun pistem̄inun prophet-aanun-llu.

⁸Qilagmek niitellma erinam pulengllua qanrutaanga, qanerluni, “Ayagluten teguyarturru kalikaq imegyaraq ikingqalria an'gilam unatainek, imarpigmi nunami-llu nangengqalriim.”

⁹Tua-i-llu ullagaqa an'gilaq qanrulluku taitesqelluki kalikacuaraat imegyarat; qanrutaanga-llu, “Teguluki neriki, aqsaqurpeni cungarninarqeciquq, qanerpeni tau͡gaam neqnirqeciquq paatakaatun.”

¹⁰Tua-i-llu tegullruaqa kalikacuar imegyaraq taukut an'gilam unatainek nerluki-llu; qanemni-llu neqnirquq paatakaatun, nerumariamki-llu aqsaqumni aviranarquq.

¹¹Qanrutaanga cali, “Pulenglluten nallunairikina yugnek ayuqenrilngurnek nunanek-llu amllernek, qaneryarallgutkenrilngurnek-llu, atanernek-llu amllernek.”