Read Yupik Revelation 11 Bible Online

Revelation 11 - Yupik bible

Revelation 11

¹Tua-i-llu cikiraatnga cuqyutmek ayarutun ayuqluni, qanrutaatnga-llu, “Nangerrluten Agayutem agayuvia cuqesgu, ekuavik-llu, tuani-llu agayulriit.

²Agayuviim tau͡gaam elaqlia cuqtevkenaku; tamana ilakevkenaku, Jews-aarunrilngurnun tunumiin, nunarpak-llu kenciknarqelria tutmarciqaat iraluni yuinaagni malrugni malrugnek cipluku (42).

³Malruk-llu nallunairturistekak piyunarqucilirciqagka nallunairivkarlukek missuullernek aturiumalukek ernerni tiissitsaaq yuinarnek qulnek pingayumek cipluku (1,260).”

⁴Waniwauguk malruk napak olive-aanek naugitulik kenurrarviulutek-llu malruk, nunam ataniumastiin ciuqerrani napalriik.

⁵Kia-llu picurlakatek qanmegnegun kenermek anllugciiquk piunrirluki inglukestetek; picurlagtiik-llu tuquarkauguq.

⁶Piyunarqucingqertuk qilak umgarkauluku, ellallirtessngaunaku ernerni nallunairillermegni, mer'et-llu augurtellerkaatnun piyunarqucingqertuk, nuna-llu agturyugngaluku nanikuatnek piyugaqamek.

⁷Nallunairumarikagnek-llu ungungssim, camaken petmigmek qutailngurmek mayulriim, anguyauciiqak cirlaklukek tuqullukek-llu.

⁸Temkek-llu nunarpiit tumyaraitni uitaciquk aciruarumalriani Sodom-aamek, Egypt-aamek-llu, Atanrem ussukcausngallran nuniini.

⁹Erenret-llu cetamiit avgurtellranun, yuut amlleret nauvillgutkelriit qaneryarallgutkenrilnguut-llu, angayuqauvillgutkenrilnguut-llu tangvagciqagket tungmagcecugpek'nakek-llu.

¹⁰Nunamiungulriit-llu quyatekciqagket nunaniryugluteng cikirtaagulluteng-llu atunem, nangcillruagnek nunam yuinek.

¹¹Tau͡gaam erenret cetamiit avgurteqerluku, unguvam Anerneran Agayutmek itervikak, nangerrlutek-llu, tangertekek-llu alingem tutai.

¹²Erinamek-llu qilagmek niitut qastuluni elkegnun qanelriamek, “Mayurtek maavet!” Inglukestemegnun-llu tangvagtellutek qilagmun mayurtuk amirlukun.

¹³Taumi-llu sass'ami nuna pekterpagtuq, nunarpiit-llu qulngurutiit itumuq; yuut-llu tiissitsaat malrunelgen tuqucimaut tuani nunam pektellrani, ilait-llu alingallagtut, ucurnarivkaraat-llu Agayun qilagmelnguq.

¹⁴Nanikuatem aipaa pellugtuq; tangerrluku-llu, pingayuak nanikuatekaq canimellirtuq.

¹⁵Malrunelgat-llu an'gilaq cupngan, qilagmek erinatanguq qastuluteng, qanerluteng, “Ellarpiim angayuqauvia Atanemta angayuqauviksagutaa, Christ-aaran-llu, ellii-llu atanruciquq akwarpak akwanun.”

¹⁶Taukut-llu ciulirneret yuinaq cetamanek cipingalriit aqumllermeggni aqumgalriit Agayutem ciuqerranun palurtut Agayun ciktaarvikluku.

¹⁷Qanerluteng-llu, “Quyavikamteggen, Ataneq Agayun Caprilnguq, piulriami nutem-llu piullermi! Piunarqucin angelria teguavgu atanirturiluten-llu!

¹⁸Angayuqauvillgutkenrilnguut-llu neplirtut, tau͡gaam eq'uqerten tekituq, tuqumalriit-llu qanercetaarumallerkaat, pistevvet-llu nunuliumallerkaat, prophet-aat ellualriit-llu, aterpet-llu qigcikestain angenge'rmeng mik'ngermeng, piunrillerkaat-llu nunam piunriristain.”

¹⁹Tua-i-llu Agayutem enii qilagmi ikircan, Akquyutiin Assigtaa Ark tangrruuguq agayuviim iluani; kenerpalla'artuq-llu, tem'irterpagluni-llu, kalluk-llu qasiarrluni, nuna-llu pekluni, kavcirluni-llu cikunek.