Read Yupik Revelation 12 Bible Online

Revelation 12 - Yupik bible

Revelation 12

¹Tua-llu nallunailkutarpak alairtuq qilagmi, arnauluni aturiumaluni akertem̄ek, iraluq-llu tusngavikluku, nasqerruciumaluni-llu agyalegmek qula malrugnek cipluku.

²Ellii-llu qingangqertuq, teggiurciami-llu nepliaguq nangtequtni pellugyuumirluku.

³Tuamta-llu alla nallunailkutarpak cali alairtuq qilagmi; tangerrluku, ciissirpak kavirliq, malrunlegnek qamiqurluni, cirunerluni-llu qulnek nasqerruterluni-llu malrunlegnek qamiqumini.

⁴Agyat-llu pingasuirrluteng avgumallrat pingayuat pamyuminek sagulluki nunamun igcetai. Ciissirpak-llu arnam irniqatalriim ciuqerrani nangengqauq, aneskaku irniara nernaluku.

⁵Irniuq-llu angutmek, nunat tamarmeng atanerkaatnek ayarukun cavigkun; tau͡gaam mikelnguq tauna tegumallruuq pakmavet Agayutmun aqumllertaanun-llu.

⁶Arnaq-llu qimagtuq yuilqumun, nunakaminun Agayutem uptellranun, aulukumallerkaminun ernerni tiissitsaaq yuinarnek qulnek pingayunek cipluki (1,260).

⁷Tua-i-llu anguyautellriartanguq qilagmi, Michael-aaq an'gilani-llu anguyautut ciissirpagmun; ciissirpak-llu an'gilani-llu ingluliurait.

⁸Tau͡gaam cirlakumaut nunakairulluteng-llu qilagmi.

⁹Ciissirpak-llu iivkaumauq, tauna akwanek piulria ciissirpak, Tuunrangayagmek aprumalria Satan-aamek-llu, ellarpiim iqlungalriartaanek, tauna nunamun igcecimauq, an'gilai-llu tapeqluki.

¹⁰Erinamek-llu niitua qilagmek qastuluni, qanelriamek, “Nutaan Agayutem anirtuutii, pinia-llu, angayuqauvia-llu tekitut Christ-aaran-llu piunarqucia, wani-wa anelgutemta picetaartiit iivkaumauq, picetaarutestek'lallrat Agayutem ciuqerrani erenret tamaitni unugtuumaita-llu.

¹¹Ellaita-llu cirlakaat Qusngiyagaam augakun nallunairillermegteggun-llu, unguvaseng arcaqakenrilamegteggu tuqutaunge'rmeng-llu.

¹²Taumek nunaniryua, qilaak, qilagmelngurni-llu! Tau͡gaam nakleng nuna imarpik-llu, tuunrangayiim atrarvikngatek eq'uqerterpagluni, pillerkami canimelliucia nallunrilamiu!”

¹³Iivkaumacini-llu nunamun ciissirpiim elpekngamiu, arnaq pitaqengnaqaa mikelnguum angutem antestii.

¹⁴Tau͡gaam tauna arnaq yaqulegpiim yaqugkenek cikiumauq ciissirpagmek qimaasqelluku yuilqumun, aulukumallerkaanun allrakuni cetamiit avegluku.

¹⁵Tua-i-llu ciissirpak qanmikun mer'mek kuigtun anciuq arnam kingunrakun, merkun sagutnaluku.

¹⁶Tau͡gaam nunam ikayuraa arnaq, qaneni ikirrluku igluku-llu kuik ciissirpiim qanmikun antellra.

¹⁷Tua-i-llu ciissirpiim arnaq qenqerrutaa, ayagluni-llu anguyaucarturluki irniari, Agayutem alerquutain aturtait, Jesus-aam-llu nallunairtai.

¹⁸Ellii-llu imarpiim qau͡gyain qaingani nangengqauq.