Read Yupik Revelation 13 Bible Online

Revelation 13 - Yupik bible

Revelation 13

¹Tua-i-llu cali tangertua ungungssilkugmek imarpigmek nugelriamek, qulnek cirunerluni malrunlegnek-llu qamiqurluni, cirunemikun-llu qulnek nasqerruterluni, qamiquini-llu igartarluni aternek piciliutnek.

²Tangelqa-llu ungungssilkuk kuskarngatellruuq, taqukinrarnek it'garluni, qanra-llu lion-aam qanratun ayuqluni. Tauna ciissirpiim piniminek cikiraa atanruviminek-llu, piunarqucimek-llu angelriamek.

³Qamiqurrin iliit kilirpaumallrunganani, tau͡gaam mamumaluni, nunam-llu ungungssilkuk maligtaa irr'ikluku.

⁴Yuut-llu ciissirpak ciktaarvikaat, tua-i piunarquciminek cikillruaku ungungssilkuk. Ungungssilkuk-llu ciktaarvikaat, qanerluteng, “Kina ungungssilkugtun pitaa, kia-llu ingluliryugngaagu?”

⁵Ungungssilkuk-llu qanermek cikiumauq ellminek ucuryagutekluni piciliutekiluni-llu, piunarquciliumallruuq-llu iraluni yuinaak malruk, malrugnek ciplukek (42).

⁶Qaneni-llu aitartaa qalarrluni piciliutnek Agayutmun, atra-llu piciliutekluku, enii-llu, qilagmelnguut-llu.

⁷Tuaten-llu piyunarivkaumauq ellualrianun anguyagarkauluni cirlakarkauluki-llu. Piyunarivkaumauq-llu nauvillgutkelrianun tamaitnun, yuullgutkelrianun-llu qaneryarallgutkenrilngurnun-llu angayuqauvignun-llu.

⁸Ciktaarvikciqaat-llu nunam yuin tamarmeng, taukut atrit igausngallrunrilnguut piqarraami Qusngiyagaam tuqutaullrem kalikaini unguvatalegni.

⁹“Kina imna ciutengqellria niilli!

¹⁰Yuk teguaruarkaukuni, teguaruciquq; nuussirpagkun tuqucilria, tuqucimaarkauguq nuussirpagkun, maa-inguuq ellualriit asvailuciat, ukverata-llu naspaamallerkaat.”

¹¹Tua-llu allamek cali ungungssilkugmek tangertua nunam akuliinek nugelriamek; malrugnek cirunengqerrluni qusngiyagartun, ciissirpagtun-llu qalarrluni.

¹²Ciuqliim-llu ungungssilkuum piunarqucia aturluku tamalkuan ciuqerrani, nuna nunam-llu yui ciktaarcetai ciuqliim ungungssilkuum ciuqerrani, qelengllagpalgem qamiqumikun.

¹³Irr'inarqelrialiuq, kenermek-llu tuaten igceciaqluni qilagmek nunamun yuut takuatni.

¹⁴Ungungssilkuum-llu ciuqerrani piunarquciliutmikun caliamikun nallunailkutetgun, nunam qainganelnguut iqluurai, qanrulluki yugualisqelluki ungungssilkugmun kiliumallermun nuussirpagkun, tau͡gken unguvaluni.

¹⁵Ungungssilkuum-llu ayuqii yuguaq anerneliryugngaluku, qallacaurcugngaluku tuaten, tuqucugngaluki-llu ungungssilkuum ayuqiin ciktaarvikenritestai.

¹⁶Nallunailkucirluki-llu, unataitgun tallirpilirneritgun wall'u qauraitgun, tamalkuita ayuqmun mikellriit angelriit-llu, tukuulriit arrsaulriit-llu, teguarunrilnguut teguat-llu.

¹⁷Tua-i kina imna ungungssilkuum atranek, wall'u number-aaranek nallunailkuciumanrilnguq kiputarkauvkenani tuneniararkauvkenani-llu.

¹⁸Man'a taringnauyunarquq, taringumalriim elitaqengnaqliu ungungssilkuum number-aara, yuum number-aaqngaku, waten ayuqluni 666.