Read Yupik Revelation 14 Bible Online

Revelation 14 - Yupik bible

Revelation 14

¹Kiarcama-llu, tangerrluku, Zion-aam ingriani Qusngiyagaq nangerngalria, ilaluni yugnek amllertaluteng (144,000) qauramegteggun igaumaluteng elliin atranek, Atiin-llu atranek.

²Erinamek-llu niitua qilagmek tuarpiaq mer'ugaat nepiit kallirpalriatun-llu: erina-llu niitelqa ayuquq aturcetaat qelutelget nepaicetun.

³Taukut-llu nutaramek yuarutmek aturtut aqumllerem ciuqerrani, imkut-llu cetaman unguvalriit ciuqerratni, ciulirneret-llu ciuqerratni. Yuarun tamana allam elitesciigataa imkut tau͡gaam (144,000) nunamek anirtuumalriit.

⁴Taukut arnatgun menuurceteksailnguugut, arnamun agtuuteksailameng; ellaita-llu Qusngiyagaq maligterrlainaraat ayallra tamalkuan. Ukut yugnek anirtuumaut atsangqerraarutnguluteng Agayutmeggnun, Qusngiyagarmun-llu.

⁵Qanritni-llu iqluyarartaituq, tua-i menuilameng.

⁶Allamek cali an'gilamek tangertua pagaani tengaulriamek, Gospel-aamek nangyuilngurmek qanerkarluni nunamiunun, angayuqauvillgutkenrilngurnun, yugnun-llu tamalkuitnun.

⁷Qastuluni-llu qanrutai, “Agayun qigcikiciu ucurnarivkarluku-llu! Cuqcillerkaa tekican. Ciktaarvikiciu-llu qiliim nunam-llu piliaqestii imarpiim-llu, mer'et-llu!”

⁸Alla cali, an'gilam tunglia, alaillruuq qanerluni, “Iqucimauq, iqucimauq nunarpak Babylon! Piunriumauq nunat tamarmeng merqestiit wine-amek assiilngurkun eguaqurillermikun!”

⁹Alla cali an'gilaq, pingayuak, kinguagnegun alairtuq qastuluni qanerluni, “Kina imna ungungssilkugmun ciktaaquni tarenraanun-llu ayuqiinun, nallunailkutaanek-llu pingkuni qauramikun wall'u unatmikun,

¹⁰tauna cali mer'arkauguq wine-amek Agayutem eq'uqertiinek, avumanrilngurmek kuvumalriamek eq'uqertiin saskaanun. Cali-llu nangcimaarkauguq kenerkun quluurakun-llu, ciuqerratni tanqilriit an'gilat, Qusngiyagaam-llu ciuqerrani.

¹¹Nangcimaviata-llu aruvii qulmurciiquq nangyuunani. Mernuinerciutaiciiqut-llu, erenret tamaitni unugtuumaita, taukut ungungssilkuum ciktaarvikestai tarenraan-llu ayuqiin, atranek-llu nallunailkuciumalriit!”

¹²Tamaaggun ellualriit asvailuciat nasvaumaarkauguq, Agayutem alerquutain aturtait, Jesus-aam-llu ukveqestai.

¹³Erinamek-llu niitua qilagmek qanerluni, “Makut igauski: Atawaqertut Atanermi tuqulriit wak'nirnek.” “Aa-ang!” qanertuq Anerneq, “caliameggnek mernuinercirniartut, caliarita maligcatki!”

¹⁴Kiarcama-llu, tangerrluku, amirluq qatellria, qaingani-llu aqumgalria ayuquq Yuum Qetunraatun, suulutaamek nasqerruterluni qamiqumikun, evegtarcuutmek-llu ipegcetellriamek tegumiarluni.

¹⁵Alla cali an'gilaq agayuvigmek anluni, qastuluni qayagauraa amirlumi aqumgalria, “Evegtarcuuten teguluku, kepliarikina, quyurcillerkaq tekican, nunam naucetaari naumariata.”

¹⁶Tua-i-llu amirlumi aqumgalriim evegtarcuutni kalguurutaa nunamun, nunam-llu naucetaari kepurai quyurrluki-llu.

¹⁷Cali alla an'gilaq agayuvigmek qilagmelngurmek an'uq, tauna cali evegtarcuutmek ipegcetellriamek tegumiarluni.

¹⁸Alla cali an'gilaq ekuavigmek anluni, piyunarqucingqerrluni kenermun, qastuluni-llu qayagauraa evegtarcuutmek ipegcetellriamek tegumialria, “Evegtarcuuten teguluku, kepurki nunam atsai, wine-at atsait piqainaurcata.”

¹⁹Taum-llu an'gilam evegtarcuutni kalguurutaa nunamun, nunam-llu atsai wine-at quyurrluki, mecuirvigpagmun-llu eggluki, Agayutem eq'uqertiin pianun.

²⁰Atsat-llu wine-at tutmarcetait nunat elatiitni, mecuat-llu auguluni tamaaken mecuirvigmek an'uq, horse-aat sugg'elitait engelkarrluki et'utariluni, avatmun-llu saggluni yuinaat qulen mile-at engelkarrluki.