Read Yupik Revelation 16 Bible Online

Revelation 16 - Yupik bible

Revelation 16

¹Tua-i-llu erinamek qastulriamek niitua agayuvigmek kingunirluni taukut an'gilat malrunelgen qanrulluki, “Ayagluci nunamun kuvyarturciki qantat malrunelgen Agayutem eq'uqertiinek imalget!”

²Tuaten-llu ciuqliim an'gilam qantani kuvyarturaa nunamun, yuut-llu ungungssilkuum atranek nallunailkuciumalriit, tarenraan-llu ciktaarvikestai, qaimegteggun callarqengut nangteqnarqelrianek tepsarqellrianek.

³An'gilam-llu aipaan qantani imarpigmun kuvaa, augurrluku-llu tuqumalriim augatun ayuqliriluku, imarpigmelnguut-llu tamarmeng unguvalriit nalaut.

⁴An'gilat-llu pingayuata qantani kuvaa kuignun mer'em-llu ulvelriartainun, taukut-llu augurtut.

⁵Mer'em-llu qaunqestii an'gilaq niitaqa qanerluni, “Ataneq Tanqilria piulriami nutem-llu piullruluten, picirkiuteten ellualriaruut.

⁶Ellualriit prophet-aat-llu augatnek kuv'illruata, wani-wa augmek mercetaten. Tua-i tuaten pinarqai!”

⁷Ekuavigmek-llu qayagalriartanguq, “Ilumun, Ataneq Agayun Caprilnguq, qanercetaaruteten piciugut elluarluteng-llu!”

⁸An'gilat-llu cetamiita qantani kuvaa akertem̄un, yuut-llu elegcelluki kenerkun.

⁹Yuut-llu puqlam angelriim elegcetai, taukut-llu Agayutem atra qanerrluutekaat nangtequatet ataniumastiit, umyualinqigtenritut-llu ucurnarivkarpek'naku-llu.

¹⁰An'gilat-llu tallimiita qantani kuvaa ungungssilkuum aqumllertaanun, atanruvia-llu tan'germetuq, yuut-llu alunguteteng keggmarait nangteqem ugaani.

¹¹Qiliim-llu Agayutii qanerrluutekaat nangtequteteng callarqumalteng-llu pitekluki, umyualinqigtevkenateng-llu caliameggnek.

¹²An'gilat-llu arvinelgata qantani kuvaa Kuigpagmun Euphrates, mer'a-llu kinerluku, atanret Calaramek taigarkat tumkaatnek upyulluki.

¹³Tangertua-llu, ciissirpiim ungungssilkuum-llu, prophet-aaruam-llu qanritnek anelriit pingayun anernerrluut, peleqpel'e'rtun ayuqluteng.

¹⁴Wani-wa taukut anernerrluugut tuunrangayiim pikai, nallunailkuciaqluteng, nunam-llu tamarmi atanrinun ullaulluteng, quyurciiqait anguyaucarturtelluki Agayutem Caprilnguum ernerkaani angelriami.

¹⁵“Tangerrluku, tekiciiqua teglegyulriatun! Atawaqertuq tupaumalria, aturiumaluni matangqanritnaurtuq, nasvaumanritnaurtuq-llu kiaresngiatellerkaminek!”

¹⁶Quyurtait-llu nunamun Hebrews-aacetun aterpagcimalriamun Armageddon.

¹⁷An'gilat malrunelgata qantani kuvaa ellamun, angayuqauviim-llu aqumllertaanek agayuviim iluanek, erinatanguq qastuluni qanerluni, “Taqumariuq!”

¹⁸Tua-i-llu kenerpalla'artuq, tem'irrluni, kalliraqluni-llu, nuna-llu pekterpagluni, nuna yugtangrraanranek tuaten pitaksailngurmek, nunam pektellra anagucan.

¹⁹Nunarpak-llu avgumauq pingasuirrluni, angayuqauvillgutkenrilnguut-llu nunarpait navgumaut. Agayutem-llu neq'eraa nunarpak Babylon, mercetnaluku eq'uqrutmi saskaanek nangluku.

²⁰Qikertaat-llu tamarmeng qimagtut, ingrit-llu tamarluteng.

²¹Kavtagpiit-llu yuinarnek tallimanek (100) uspernek uqamaltalriit, qilagmek igtut yugnun tutmarluteng. Yuut-llu piciliutekaat Agayun nanikuatet pitekluki kavtagpiit, nanikuallerteng anagucan.