Read Yupik Revelation 17 Bible Online

Revelation 17 - Yupik bible

Revelation 17

¹Tua-i-llu taukut an'gilat qantanek tegumialget malrunelgen iliita ullaglua qanrutaanga, “Tailuten, nasvitnaamken mistulriamek akusrarutekevkalriim qanercetaarutiinek imarpigni amllerni aqumgalriim,

²nunam atanrin akusrarutek'lallrat, akusrarutekevkallran-llu wine-aa nunam yuin taangiqutek'lallrat.”

³Anernemkun-llu ayautaanga yuilqumun. Arnamek-llu tangertua ungungssim kavircetellriim qaingani ugingalriamek, igaumalriim atranek qacungakutnek, qamiqungqerrluni-llu malrunlegnek, cirunerluni-llu qulnek.

⁴Arnaq tauna aturiumauq qesurlimek kavircetellriamek-llu, tangnircaumaluni-llu suulutaamek, qevlercetellrianek-llu, uqumyagngalngurnek-llu. Tegumiarluni-llu saskamek suulutaamek, akusrarutekevkallermi pellernarqutainek menuulriarutainek-llu imalegmek,

⁵qauraani-llu igartangqertuq atermek ciungani nallunairumanrilngurmek: “Mistulria, Babylon, akusrarutekevkalriit nunam-llu pellernarqutain aaniit.”

⁶Tangrraqa-llu arnaq, taangiqluni ellualriit augatnek, Jesus-aaq-llu pitekluku tuqutaullret augatnek. Tangrramku-llu alangaaqapigtua.

⁷Tau͡gaam an'gilam qanrutaanga, “Ciin alangaarcit? Arnam nallunarqelriaranek qanrutnaamken, ungungssilkuum-llu malrunlegnek qamiqulgem, qulnek-llu cirunelgem ugingavikestiin, arnam nallunarqelriaranek.

⁸Ungungssilkuk tangellren piulleq, tau͡gaam catairulluni, petmigmek-llu qutailngurmek mayurtarkaq piunrillerkaminun-llu ayagluni. Nunam-llu yui unguvam kalikartaini igausnganrilnguut ellam piurteqarraallranek, alangaarciqut tangerqunegteggu ungungssilkuk, piullruan catairulluni-llu, piunqigtarkauluni-llu.

⁹Umyualgem man'a taringarkaqaa. Taukut malrunelgen qamiqut malrunelguut ingrit arnam aqumgavikekai;

¹⁰atanruluteng-llu tuatiirtut taukut malrunelgen. Talliman cirlakumallruut, atauciq cali piuguq, atauciq-llu piurteksaunani, piureskuni-llu ak'anun piungaituq.

¹¹Imna-llu ungungssilkuk piulleq tau͡gaam catairulluni, pingayunlekaat. Taukut-llu malrunelgen ilakaat, piunrillerkaminun-llu ayagciquq.

¹²Taukut-llu cirunret qulen tangelten atanruut piyunarqucimek pingeksailnguut, tau͡gaam piyunarqucimek pingciqut atanruluteng sass'ami ataucimi, ungungssilkuk ilakluku.

¹³Taukut umyuallgutkut, pinirteng piyunarqucirteng-llu ungungssilkugmun tunciqaat.

¹⁴Qusngiyagarmun-llu anguyauciiqut, Qusngiyagaam-llu cirlakciqai, ellii atanviit atanret-llu Ataneqngatni, ilangqerrluni-llu kelgumalrianek, cucukumalrianek, piciulrianek-llu.”

¹⁵Qanrutaanga-llu, “Mer'et tangelten, akusrarutekevkalriim aqumgaviani, yuguut, yugugauluteng-llu, atanruvillgutkenrilnguut, qaneryarallgutkenrilnguut-llu.

¹⁶Taukut-llu cirunret qulen tangllerpet, ellaita ungungssilkuum-llu uumikciqaat akusrarutekevkalria. Uayarciqaat matarrluku-llu, kemga-llu nerciqaat ekualuku-llu kenerkun.

¹⁷Agayutem umyuangevkaaki picirkiutni atuusqelluku, umyuallgutekluteng pinirteng ungungssilkugmun tunluku, Agayutem qaneryarain piciurtellerkaata engeliinun.

¹⁸Arnaq-llu tangellren nunarpauguq nunam atanrin atanirturtiit.”