Read Yupik Revelation 18 Bible Online

Revelation 18 - Yupik bible

Revelation 18

¹Mat'um-llu kinguani allamek an'gilamek tangertua qilagmek atrarluni. Piyunarqucirpauluni, nuna-llu tanqigtaa ucurnaminek.

²Qastuluni-llu qayagauq: “Piunriumauq, piunriumauq mistulria Babylon! Anernerrluut nunaksagutaat, anerneret-llu carrluulriit uitavikaat, yaqulget-llu pellernarqellriit uuminarqeqapigtellriit-llu uitavikluku.

³Wani-wa tamarmeng atanruvingqellriit mer'umariata aglumallran menuulriim wine-aanek. Nunam-llu atanrin akusrarutekumariatgu, nunam-llu kupcaari tukuurtellruut caanguarutaikun.”

⁴Allamek cali erinamek pakmaken niitua qanerluni, “Yumaa, anici tuaken, assiilnguinun ilautnayukluci, nanikuatainun pillguciutnayukluci;

⁵wani-wa assiilngui qalliryagucimiita qilak tekisngaluku, Agayutem-llu neq'akumai assiilngui.

⁶Cikirciu cikiqengellruciatun; caliari-llu akinaurluki amllertataitnek ilaluki. Saskaan imaanek avulallran tukninranek merkaanek auvuiciu.

⁷Ellminek ucurnarivkallruciatun caanguarluni-llu yuullruciatun, tuaten pitataitnek cikirciu nangtequtnek iluteqnamek-llu. Ircaqumikun qanellruan, ‘Atanrem aqumllertaani aqumgaunga, aipainrunritua, iluteqnamek-llu tangerrngaitua.’

⁸Taumek nangtequtekai ernermi ataucimi tuciiqut, cangerlak, iluteqnaq, kaigyaraq-llu, ellii-llu ekuamaarkauguq kenerkun; artuqailan Ataneq Agayun picirkirtii.”

⁹Nunam-llu atanrin, akusrarutekestain caanguarvikestain-llu, qiaciqaat qalervautekluku-llu tangerqunegteggu ekuallran aruvii,

¹⁰nangerngaciqut yaaqvaariluku, nangtequtii alikluku, qanerluteng, “Nakleng! Nakleng! Nunarpagmi mistulriami, nunarpagmi ucurnarqelriami Babylon! Sass'ami ataucimi picirkiumallren elpenun tut'uq.”

¹¹Nunam-llu kupcaarin qiatekaat ilutequtekluku-llu, akluteng kiputestekairucata;

¹²makut maa-i suulutaat, akit, tangnircautet, uqumyagngalnguut, 'lumarraqegtaaraat, qesurlit, silget, kavirlit-llu, muriit-llu tepkegcilriit, tulut-llu calinguat, murakegtaaraat-llu calinguat, punerneret-llu caviit, teggalquqegtaaraat-llu,

¹³neqnircautet, piilitsaat-llu, tepkegcautet, aruviarkat-llu, wine-at, uqut-llu, mukaat mukaarkat-llu, kuluviit qusngit-llu, horse-aat ikamrat-llu akalrialget, teguat-llu, wani-wa yuut.

¹⁴“Atsat piyuumiklerpet unitaatgen, aturyuumik'lalten, ucurnarqucin-llu tamartut, nataqumaarkaunrirluteng!”

¹⁵Makut tuneniaqestek'lallrit, tukuurrvikestekellri, nangerngaciqut yaaqvaariluku, nangtequtii alikluku, qialuteng qalervagluteng-llu,

¹⁶“Nakleng, nakleng, nunarpagmi aturiumallermi 'lumarraqegtaarnek qesurlinek, kavircetellrianek-llu, tangnircaumallermi-llu suulutaamek, kenugutnek-llu, uqumyagngalngurnek-llu!

¹⁷Sass'ami ataucimi tukuuteten cagmartut.” Tamarmeng-llu sun'at atanirturtait, imarpiliurtet-llu, naparciurtet-llu, tamarmeng-llu sun'atgun akluliulriit, nangerngaut yaaqvaariluku,

¹⁸neplirluteng tangrramegteggu ekuallran aruvii, qanerluteng, “Nunarpak una pitataitellruyugnarquq.”

¹⁹Qamiquteng-llu urr'amek nevirait, qialuteng iluteqngameng, qanerluteng-llu, “Nakleng, nakleng, uumi nunarpagmi, tukuutaikun tamarmeng imarpiliurcuutnek angyangqellriit tukuurrvikellrat! Sass'ami ataucimi piunriumauq.

²⁰Nunaniryuutekiciu, qilagmi, ellualriani-llu apostle-aani, prophet-aani-llu, wani-wa Agayutem akinaurucaci elliinun!”

²¹Tua-i-llu pinilria an'gilaq teggalqumek tegutuq miilissuutem teggalquatun angtalriamek, imarpigmun-llu eggluku, qanerluni, “Tuaten nunarpak Babylon egcimaciquq palartevkenani tangrrumanqiggngaunani-llu.

²²Ayuqenrilngurteggun-llu aturcetaalriit nepait, niicimanqiggngaitut elpeni; calitulit-llu elpeni nataqumanqiggngaitut, miilissuutem-llu nepii niicimanqiggngaituq,

²³kenurram-llu tanqia elpeni tanqigngairutuq; uikautem nulirkautem-llu eriniik niicimanqiggngaituk elpeni; nunam mistunri angutet payugcestek'laavki, tamarmeng-llu atanruvilget tuunriyararpegun iqluurumiita.

²⁴Elliini-llu prophet-aat ellualriit-llu augat nataqumauq, tamarmeng-llu nunami tuqutaullret augat.”