Read Yupik Revelation 19 Bible Online

Revelation 19 - Yupik bible

Revelation 19

¹Makut kinguatni yugugaat erinakngalkiitnek mistulriamek niitua qilagmek, qanerluteng, “Hallelujah! Anirtuun ucurnarquciq-llu, piniq-llu Agayutemta pikai,

²tua-i qanercetaarutai piciungata elluarluteng-llu. Elliin-llu picirkiraa mistulriamek akusrarutekevkalria nunam menuurtestii akusrarutmikun, pistem̄i-llu aunrallrit akinaurutai elliinun.”

³Pulenglluteng-llu qayagpagtut, “Hallelujah! Aruvii qulmurtuq akwarpak akwanun.”

⁴Taukut-llu yuinaq cetamanek cipingalriit ciulirneret, taukut-llu cetaman unguvalriit ciktut piicagvikluku-llu Agayun angayuqauviim aqumllertaani aqumgalria, qanerluteng, “Amen. Hallelujah!”

⁵Aqumllermek-llu erinatanguq qayagaluni, “Nanrarciu Agayutvut, kevgaini tamarpeci, atunem mikellriani angelriani-llu qigcikestaini.”

⁶Tua-i-llu niitua yugugaat erinakngalkiitnek, merpiit ellerrartellriaricetun ayuqluni kallirpalriim-llu qasiartellritun ayuqluni, qayagaluni, “Hallelujah! Ataneq Agayutvut Caprilnguq atanrurcan.

⁷Ataki quyalta angnirpagluta-llu ucurnarivkarluku-llu, Qusngiyagaam kassuutellerkaa tekican, nulirkautii-llu upingarian,

⁸cikiumallruuq-llu aturiumasqelluku 'lumarraqegtaarmek, qitngirnarqelriamek menuilngurmek-llu.” (Wani-wa 'lumarraqegtaar elluaruan agayumalriit caliarat.)

⁹An'gilam-llu qanrutaanga, “Igauski makut: Atawaqertut Qusngiyagaam kassuutellran nerevkaritiinun kelgumalriit.” Qanrutaanga-llu, “Makut piciugut qanellri Agayutem.”

¹⁰Ciuqerranun-llu ciktua piicagviknaluku, tau͡gaam qanrutaanga, “Tuaten pinarqenrituten! Kevgaullgutkarpenga anelgutvet-llu, Jesus-aam nallunairutainek calilriit. Agayun tau͡gaam piicagvikiu.” Wani-wa Jesus-aam nallunairutkellra prophet-aat anernerkun caliaqngatgu.

¹¹Tua-i-llu qilak tangrraqa ikingqaluni, tangerrluku-llu, tuani horse-aaq qatellria; ugingavikestii-llu aterpagingauq Ellualriamek Piciulriamek-llu. Ellualriakun-llu cuqciuq anguyagluni-llu.

¹²Iik-llu ayuquk kenertun, qamiqurrani-llu nasqerrutet amllerrluteng. Atermek-llu igarvikumaluni yuum nallukiinek, elliin tau͡gaam.

¹³Aturiumaluni-llu augmun akurcimalriamek, ateq-llu aterpagingatii waniwauguq: Agayutem Qaneryaraa.

¹⁴Qiliim-llu anguyagtai, aturiumaluteng 'lumarraqegtaarnek, qatellrianek menuilngurnek, maligtaat qatellrianek horse-aarluteng.

¹⁵Qanranek anumauq nuussirpak ipegcetellria tamatukun atanruvilget piunrirnaluki. Ataniumaciqai-llu cavigmek kaugtuutarluni; tutmarciqaa-llu wine-anek mecuirvik, Agayutem eq'uqertiin pia Caprilnguum.

¹⁶Ulikutamini qugtuqamini-llu atermek igarvikumauq waten: Angayuqat Angayuqaunrat, Atanret-llu Atanrunrat.

¹⁷Tua-i-llu an'gilamek tangertua akertem̄i nangengqaluni, qastuluni-llu qayagaurai yaqulget tamalkuita pagaani tengaulriit, “Tailuci, quyurci Agayutem nerevkaritiinun angelriamun,

¹⁸nerluki angayuqrulriit kemgit, anguyagtet-llu ciuliqagtaita kemgit, yuut-llu artuqailnguut kemgit, horse-aat-llu kemgit, ugingavikestaita-llu, yuut-llu tamarmeng kemgit, ayuqluki teguarunrilnguut teguat-llu, mikengraata angengraata-llu.”

¹⁹Ungungssilkuk-llu tangrraqa, nunam-llu atanri anguyagcetuumarmeng quyurrluteng anguyagnaluku horse-aami ugingalria anguyagtai-llu.

²⁰Ungungssilkuk-llu tegumauq, prophet-aara-llu piciunrilnguq ilakluku, takuani nallunailkucirilleq. Tamaaggun iqluurluki ukverrluki ungungssilkuum nallunailkutiinek akurtullret, tarenraanun-llu ciktaalallret. Ukuk malruk egcimauk unguvarmek nanvamun quluurmek ekualriamun.

²¹Ilait-llu tuqucimaut horse-aam qaingani ugingalriim nuussirpiikun, qanranek anumalriakun; yaqulget-llu tamarmeng aqsiut kemgitnek.