Read Yupik Revelation 2 Bible Online

Revelation 2 - Yupik bible

Revelation 2

¹“Agayuviim an'gilaanun Ephesus-aami igaa, ‘Wani-wa tallirpilirnemni agyanek malrunlegnek tegumialgem qaneryarai, kenurrarviit-llu suulutaat akuliitni pektellriim.

²“‘Nallunritanka caliaten, cakviullren-llu, ilalciullren-llu, avirakilaucin-llu assiilngurnek yugnek, yuvrillruavki-llu apostle-aanek ellmeggnek aterpagcimalriit, tau͡gaam piciuvkenateng, iqlungauciat-llu elpekumaluku.

³Ilalciucirci nallunritaqa, cakviurucirci-llu atqa pitekluku, taqsuquavkenaci-llu.

⁴Mat'umek tau͡gaam pitengqertua elpecen̄un, kenkillerci ciuqliq pegcavciu.

⁵Taumek neq'akiciu ayuqucillerci avtellerci, umyualinqiggluci piqarraami calialci caliaqluki. Pinrilkuvci, ullagciqamci kenurrarvigci-llu au͡g'arciqaqa eniinek, umyualinqigtenrilkuvci.

⁶Tau͡gaam, Nicolaitans-aam ayuqucirtuutainek uumikillerpeciuggun elluarrluci piuci, wii-llu uumikngamki.

⁷Ciutengqellriim niilliki Anernerem qanellri agayuvignun. Cirlakilria nerevkarciqaqa unguvam napaanek Agayutem Paradise-aanelngurmek.

⁸“Agayuviim-llu an'gilaanun Smyrna-mi igaa: ‘Wani-wa Ciuqliulriim Nangneqliulriim-llu qaneryarai, tuqullrem unguillrem-llu.

⁹“‘Nallunritaqa nanikuallerci arrsaucirci-llu (amta-llu tukuuluci) piciliutekillrat-llu Jews-aarunilriit Jews-aarunrilnger'meng, tau͡gaam Satan-aamun elitnaurviuluteng.

¹⁰Alikenriciu nangcimallerkarci. Tangerrluku, ilaci tuunrangayiim itercetqatarai naspaamasqelluci, ernerni-llu qulni nanikuavkaumaciquci. Tuqullerkamun pektayiilkici, unguvam-llu nasqerrutiinek cikirciqamci.

¹¹Ciutengqellriim, niilliki Anernerem qanellri agayuvignun. Cirlakilria agtuumangaituq tuqum aipaakun.

¹²“Agayuviim-llu an'gilaanun Pergamos-aami igaa: ‘Wani-wa atunem kegginalegmek nuussirpangqellriim qaneryarai.

¹³“‘Uitavigci nallunritaqa, Satan-aam atanruviani. Atqa tegumiaqan, ukveqelqa-llu mecirautekenritan, tuaten-llu Antipas-aam nallunairtem̄a nalliini, maligtaqustem̄a akunlevcen̄i, tuqutaullrulriim Satan-aam uitaviani.

¹⁴Tau͡gaam carrarmek pitengqertua elpecen̄un; ilangqerravci Balaam-aam ayuqucirtuutainun maligtaquilrianek, taum ayuqucirtullrukii Balak Israel-aam yuin paallautekaatnek, agayutnguanun tunumalrianek neresqelluki akusrarutekevkarluki-llu.

¹⁵Tuaten elpeci-llu Nicolaitans-aam ayuqucirtuutain ciumurutestainek ilangqertuci:

¹⁶Taumek umyualinqigci, pinrilkuvci, tamaa ullagciqamci callugyarturluki qanma nuussiakun.

¹⁷Ciutengqellriim niilliki Anernerem qanellri agayuvignun. Cirlakilria cikirciqaqa kelipayagarnek iirumalrianek manna-mek, teggalqumek-llu qatellriamek, igarcirluku atermek nutaramek, yuum nallukiinek, ciuniurtiin kiimi.

¹⁸“Agayuviim-llu an'gilaanun Thyatira-mi igaa, ‘Wani-wa Agayutem Qetunraan qaneryarai, kenrem ciqinqallratun iingqellriim, it'garluni-llu punernertun qevlercaumalriatun.

¹⁹“‘Nallunritanka caliaten, kenkicin-llu, ukveren-llu, kevgiullren-llu, ilalciucin-llu, kinguqliit-llu caliaten ciuqlirni amllenruata.

²⁰Tau͡gaam mat'umek pitengqertua elpenun: avirakenrilavciu tauna arnaq Jezebel prophet-aarungualria, amta-llu pistenka ayuqucirturluki iqluurluki akusrarutekevkarluki, agayutnguanun-llu tunumalrianek nerevkarluki.

²¹Umyualinqigtellerkiurumayaaqaqa, tau͡gaam umyualinqiggngaitelliniuq caruyallerminek.

²²Tangerrluku, apqucilirciqaqa, akusrarutekestai-llu nanikuavkarciqanka umyualinqigtenrilkata assiilngirvikellranek.

²³Irniari-llu tuquvkarciqanka. Tamarmeng-llu agayuviit nallunrirciqaat yuvrirten͞guciqa umyuanek ircaqunek-llu, cikirciqamci-llu kina imna caliara cuqluku.

²⁴Tau͡gaam Thyatira-mi ilavcen̄un, tamatum ayuqucirtuutem ciumurucestekenrilkainun, yuut ilait apqiitnek tuunrangayiim nallunarqelriartainek ayuqucingeksailngurnun, elpecen̄un qanertua allamek atminritamci.

²⁵Tau͡gaam pik'ngarci tegumiaqekiciu, tekitellerkama engeliinun.

²⁶Cirlakilria caliama-llu ciumurucestii iquklitlerkamun, cikirciqaqa piyunarqucimek atanruvilegnun,

²⁷atanirarkaugai-llu ayarukun cavigkun, tuarpiaq egatet qikut kaugtuarluki ciqumtelarait, tuaten wangtun piyunarqucimek akurtullrucimtun Atamnek.

²⁸Cikirciqaqa-llu unuakum agyartaanek.

²⁹Ciutengqellriim niilliki Anernerem qanellri agayuvignun.