Read Yupik Revelation 20 Bible Online

Revelation 20 - Yupik bible

Revelation 20

¹Tua-i-llu an'gilamek tangertua qilagmek atralriamek, tegumiarluni petmiim qutailnguum kelucairissuutiinek kalivnerpagnek-llu.

²Ciissirpak-llu tegua, imna avaken piulria, Tuunrangayak Satan-aaq, qilleqluku-llu allrakuni tiissitsaani qillengqaarkauluku.

³Eggluku-llu petmigmun, patuluku-llu nepyucirluku-llu kingunra, iqluurcetenqigtarkaunrirluki atanruvilget qillerqumallran taktaciatun. Tamatum kinguani cali angicimackarciquq.

⁴Aqumllernek-llu angayuqauvigtarnek tangertua, taukuni-llu aqumgalriit taukuugut qanercetaaryaramek cikiumalriit. Imkut-llu cali tangrranka Jesus-aamek nallunairillerteng pitekluku qamiqurriumallrulriit tarnait, Agayutem-llu qaneryaraa pitekluku. Ungungssilkugmun-llu tarenraanun-llu ciktaallrunrilnguut, nallunailkutaanek-llu pingellrunrilnguut qauramegteggun unatmegteggun-llu. Taukut unguirtut, Christ-aq-llu atanruvianun pillgucirluku allrakuni tiissitsaani.

⁵Tau͡gaam ilait tuqumalriit unguinritut, allrakut tiissitsaat engelkarrluki. Maa-i ciuqliq makyun.

⁶Atawaqertuq tanqiuluni-llu makyutmun ciuqlirmun pillguciutellria! Tamakunun tuqum aipaa piningqenrilan, tau͡gaam taukut Agayutem agayulirtekciqai Christ-am-llu, atanruviani-llu pillgucirciqaat allrakuni tiissitsaani.

⁷Allrakut-llu tiissitsaat iqukliskata, Satan-aaq iterngallerminek angicimaciquq,

⁸anciquq-llu iqluuryarturluki atanruvilget nunam kangiraini cetamani uitalriit, wani-wa, taukut neglirnermiut, Gog Magog-llu, quyurrluki anguyallerkamun. Taukut amllertaut imarpiim qau͡gyaitun.

⁹Curugluteng-llu nunam qaingani iqtulriami, kassugulluku-llu agayumalriit nuniit kenkumalria nunarpak. Tau͡gaam keneq igtuq qilagmek piunrirluki-llu.

¹⁰Iqluurtiit-llu tuunrangayak egcimauq nanvamun quluurmek ekualriamun, ungungssilkuum prophet-aaruam-llu nuniignun. Nangcimaarkaugut-llu erenret tamaita unugtuumaita-llu iquklicuilngurmek.

¹¹Tua-i-llu tangertua angelriamek angayuqauviim aqumllertaanek qatellriamek, aqumgalriamek-llu qaingani. Ciuqerranek nuna qilak-llu qimagtuk, nunakaunatek-llu.

¹²Tuqullret-llu tangrranka, angelriit mikellriit-llu, angayuqauviim aqumllertaan ciuqerrani nangerngaluteng, kalikat-llu ikirtait. Alla cali kalikaq ikirtaat, wani-wa unguvam kalikaa. Tuqumalriit-llu qanercetaarumaut igausngalriatgun kalikani, caliallermegteggun.

¹³Imarpigkun-llu picurlallret taicimaut. Tuqum-llu Hades-aam-llu tuqumalriartakek taicimaut, tamarmeng-llu qanercetaarumaut caliallermegteggun.

¹⁴Tuqu-llu Hades-llu egcimauk nanvamun ekualriamun. Wani-wa tuqum aipaa, nanvaq ekualria,

¹⁵kia-llu imum atra unguvam kalikaini igausnganrilnguq, ellii egcimauq nanvamun ekualriamun.