Read Yupik Revelation 21 Bible Online

Revelation 21 - Yupik bible

Revelation 21

¹Qilak nutaraq, nuna-llu nutaraq tangrragka; qilak ciuqliq nuna-llu ciuqliq pelluagnek, imarpik-llu piunrirluni.

²Nunarpak-llu Kenciknarqelria, Jerusalem-aaq nutaraq, tangrraqa qilagmek atrarluni Agayutmek, taqumarilria nuliarkatun uikautminun aturaqegcilriatun.

³Erina-llu niitaqa qastuluni qanerluni, “Tangerciu, Agayutem uitavia yugnelnguq, uitavikciqai-llu ellait, yukluki-llu, ellaita-llu Agayun tungaunateng ilakeciqaat Agayutekluku-llu.

⁴Elliin-llu aluviit tamalkuita perrirciqai iingitnek. Tuqumek-llu pitangqenrirciquq, iluteqelriartangqenrirluni-llu, neplilriartangqenrirluni-llu, nangteqelriartangqenrirciquq, ciuqliit pelluata.”

⁵Angayuqauviim-llu aqumllertaani aqumgalria qanertuq, “Tangerrluku, cat tamalkuita nutaraurcetanka.” Wangnun-llu qanertuq, “Igaa, qaneryarat makut ukvernaqngata piciuluteng-llu.”

⁶Qanrutaanga-llu, “Taq'uq! Wiinga-wa Ayakarraarutnguunga Iquulua-llu. Meqsulria mer'em unguvalgem ulevlallranek cikirciqaqa akiinaku.

⁷Cirlakilriim tamakut piksaguciiqai, Agayutekciqaanga-llu wiinga-llu qetunraqciqaqa.

⁸Tau͡gaam alingelriit, ukvenrilnguut-llu, pellernarqelriit-llu, tuqucilriit-llu, acuniatulit-llu, angalkuut-llu, agayutngualilriit-llu, iqlungalriit-llu tamarmeng, taukut pikaqaat nanvami kenermek quluurmek-llu ekualriami uitaciqut. Tua-i wani-wa tuqum aipaa.”

⁹Tua-i-llu malrunelgen an'gilat iliit, imkut malrunlegnek qantanek tegumialriit nangtequtnek imalegnek, taiguq wangnun qanerluni, “Tailuten, nasvitnaamken nulirkautmek, Qusngiyagaam nulirranek.”

¹⁰Anernerkun-llu ayautaanga ingrimun qertulriamun, nasvillua-llu nunarpagmek kenciknarqelriamek Jerusalem-aamek qilagmek atrarluni Agayutmek,

¹¹Agayutem ucurnaanek pingqerrluni, tanqia-llu nurnarqelriatun akitulriatun uqumyagtun ayuqluni, qevlercetellriatun-llu teggalqutun ayuqluni, ecuitqapigtellriatun-llu cikunguatun.

¹²Qertulriamek-llu qacarnengqertuq, amiigluni-llu qula malrugnek cipluku, an'gilartarluteng-llu tamarmeng amiiget, amiigni-llu igausngaut Israel-aam kinguvrin atrit, qula malrugnek cipluku.

¹³Calaram tungiini amiiget pingayun, negeqvam-llu tungiini amiiget pingayun, ungalam-llu tungiini amiiget pingayun, kanavam-llu tungiini amiiget pingayun.

¹⁴Nunarpiim-llu qacarnera tusnganengqertuq qula malrugnek cipluku, taukuni-llu igausngaut Qusngiyagaam apostle-aarin atrit qula malrugnek cipluku.

¹⁵Qalarutesteka-llu cuqcissuutengqertuq suulutaamek nunarpiim angtacia cuqnaluku, amiiget-llu qacarnera-llu.

¹⁶Nunarpak kangirangqertuq, atunem pitatekluni taketmun iqtutmun-llu. Cuqcissuutmikun-llu cuqtaa nunarpak, mile-angqerrluni tiissitsaam aipaa avguluni, taktacia, iqtutacia, quyigtacia-llu pitatekluteng.

¹⁷Qacarnera-llu cali cuqtaa yaaltangqerrluni yuinaat pingayun qula malrugnek cipluki, yuum cuqciyarakun, an'gilam cuqyutiikun.

¹⁸Qacarnera pilimauq teggalquqegtaarnek, nunarpak tau͡gaam suulutaarrlainauluni ecuunani, cikunguatun.

¹⁹Nunarpiim-llu qacarneran tusnganri tangnircaumaut teggalquqegtaarnek ayuqenrilngurnek. Ciuqliat atengqertuq jasper, tunglia-llu sapphire, pingayuak-llu agate, cetamiit emerald,

²⁰tallimiit onyx, arvinelgat carnelian, malrunelgat chrysolyte, pingayunelgat beryl, qulngunritariit topaz, qulngurutiit chrysoprase, qula ataucimek cipnera jacinth, qula malrugnek cipnera amethyst.

²¹Taukut-llu amiiget qula malrugnek cipnelget uqumyagngalnguugut, tamarmeng-llu amiigit uqumyagngalngurkun atauciurneruluteng. Nunarpiim-llu tumyarai suulutaarrlainaugut cikunguatun ecuunateng.

²²Agayuvigmek-llu tangenrritua nunarpiim iluani, Ataneq Agayun Caprilnguq agayuvikngatgu, Qusngiyagaq-llu.

²³Nunarpak-llu akertem̄ek iralumek-llu tanqiutengqen̄arqenrituq, Agayutem ucurnarqucia tanqiutekngaku, Qusngiyagaq-llu kenurraqngaku.

²⁴Tanqiakun atanruvilget pekciiqut; nunam-llu atanrin ucurnarqucirteng ullauciiqaat tuavet.

²⁵Ikirtuqai-llu patumangaitut ernerpak, unugtangqerrngaituq-llu.

²⁶Atanruvilget-llu ucurnarquciat takarnarquciat-llu tuavet itruciiqaat.

²⁷Tau͡gaam menuulriim itervikngaitaa, wall'u pellernarqelrialilriim, wall'u iqluyulriim, imkut tau͡gaam nallmegteggun igausngalriit unguvam kalikaini Qusngiyagaam piini.