Read Yupik Revelation 22 Bible Online

Revelation 22 - Yupik bible

Revelation 22

¹Cali nasvitaanga kuigmek unguvam mer'anek, ecuitqapigtellriamek cikunguatun, kingunengqerrluni Agayutem angayuqauvian aqumllertaanek Qusngiyagaam-llu

²nunarpiim tumyaraan qukaakun carvanirluni; kuigem-llu avategkeni atunem napatangqertuq unguvam pianek, atsangqerrluni ayuqenrilngurnek qula malrugnek cipluku. Iralut tamaitni atsanek naugiaqluni; napam-llu cuyai anirtuutekait angayuqauvilget.

³Cali canek aniqlaamalriartairuciiquq, tau͡gaam Agayutem aqumllertaa Qusngiyagaam-llu tuanciiquk, pistain-llu ciktaarvikciqaat.

⁴Kegginaa tangerciqaat, atra-llu nallunailkutaqciqaat qauramegteggun.

⁵Unugtairuciquq-llu, kenurram akertem-llu tanqianek aturnarqenrirciqut. Tua-i Ataneq Agayun tanqiutekciqngamegteggu, atanruciqut-llu iquklicuilngurmek.

⁶Qanrutaanga-llu, “Ukut qaneryarat ukvernarqut piciuluteng-llu. Atanrem-llu prophet-aat anernerit Agayutiita, an'gilani taivkaraa, pisten̄i nasvitesqelluki tut'arkanek ukaqvaggun.

⁷Tangerrluku-llu, ukaqvaggun tekiciiqua.” Atawaqertuq kina imna ukut kalikat nallunairutaitnek qaneryaranek atulria.

⁸Wiinga, John-aaq, makunek tungaunii niitellruunga tangellrulua-llu, niicamki-llu tangerrluki-llu tauna nasvitesteka ciktaarvikqataryaaqaqa.

⁹Tau͡gaam qanrutaanga, “Tuaten pinarqenrituten! Kevgaullgutkarpenga anelgutvet-llu prophet-aat, ukut-llu kalikat qaneryarartaita aturtait ilakluki. Agayun tau͡gaam ciktaarvikiu.”

¹⁰Qanrutaanga-llu, “Ukut kalikaat nallunairutait qaneryarat patucaqunaki, pillerkaq ukaqsigian.

¹¹Assiilngurmek calilria assiilngurkun piurli, menuulria-llu menuuli, ellualria-llu ellualriamek calili, kencignarqelria-llu kencignaqli.”

¹²“Tangerrluku, ukaqvaggun tekiciiqua, nunuliutekaqa ang'aqluku, yuk tamalkuan akinaurutkaanek caliallrakun.

¹³Wii, wani-wa, Alpha Omega-llu, Ciuqliulua Nangenrulua-llu, Ayakarraarutngulua, Iquulua-llu.”

¹⁴Atawaqertut aturameggnek iqairilriit, unguvam napaanek atuyunarqarkaungameng, nunarpak-llu ityunarqarkaungamegteggu amigteggun.

¹⁵Elatiini menuulriit uitaut angalkut-llu, akusrarutekilriit-llu, tuqutarayulit-llu, agayutngualilriit-llu, tamarmeng-llu iqluyulriit.

¹⁶“Wii Jesus-aaq an'gilamkun ayagcetaqa elpecen̄un agayuviit nallunairutkaat. Wiinga David-aam Acilquqaanga Kinguveqlua-llu, tanqilria Unuakum Agyartaa.”

¹⁷Anerneq Nulirkaun-llu qanertuk, “Taici!” Niitellria-llu qanqili, “Taici!” Meqsulria-llu taili, piyuumilria-llu unguvam mer'anek merli akiinaku.

¹⁸Aarcirturanka ukut kalikat nallunairutaitnek niitellriit: yuum ilakaki, Agayutem-llu ilaciqaa imkunek nangtequatnek ukuni kalikani qanrutkumalrianek.

¹⁹Yuum-llu ukut kalikat nallunaillrit ilangareskaki, Agayutem-llu teguiciqaa atu'urkaqsallranek unguvam napaani, kenciknarqelriami-llu nunarpagmi, kalikani ukuni qanrutkumalriani.

²⁰Makunek nallunairilria qanertuq, “Piciulriamek ukaqvaggun tekiciiqua.” Amen. Taikina, Ataneq Jesus-aaq!

²¹Atanrem Jesus-aam naklekutiin nayurliki tamalkuita agayumalriit. Amen.