Read Yupik Revelation 3 Bible Online

Revelation 3 - Yupik bible

Revelation 3

¹“Agayuviim-llu an'gilaanun Sardis-aami igaa, ‘Wani-wa qaneryarai tegumiangqellriim Agayutem Anernerinek malrunlegnek, agyanek-llu malrunlegnek. “‘Nallunritanka caliaten; unguvalriamek aprumauten, amta-llu tuqumaluten.

²Tupii, piniriluki-llu uitauralriit tuquniaralriit, cuqtaallemni caliaten elluanrilata Agayutma takuani.

³Taumek neq'akiu akurtullren niitellren-llu: tamana atuqiu umyualinqiggluten-llu. Tupanrilkuvet, teglengalriatun tekiciiqua, nalluciqan-llu sass'aq tekitellerkaqa elpenun.

⁴Tau͡gaam cali ilangqerrsaaquci amllenrilngurnek Sardis-aami, aturameggnek menuurciksailngurnek; taukut qatellrianek aturluteng pektellgutekciqaatnga, ellualriaruameng.

⁵Cirlakilria tuaten aturiumaarkauguq qatellrianek, perrirngaitaqa-llu atra unguvam kalikartaanek; apervikuatekciqaqa-llu atra Atama ciuqerrani an'gilain-llu ciuqerratni.

⁶Ciutengqellriim niilliki Anernerem qanellri agayuvignun.

⁷“Agayuviim-llu an'gilaanun Philadelphia-mi igaa: ‘Wani-wa Ellualriim qaneryarai, piciulriim, David-aam kelucairissuutiinek avalingqellriim, ikircilriami yuum patungailkiinek, patuilriami-llu yuum ikirrngailkiinek.

⁸“‘Nallunritanka caliaten. Tangerrluku, elkarciunga ciuqerpeni amigmek ikingqalriamek, yuum palutesciigalkiinek; nallunritamken amllermek piningqenrilucin, tau͡gaam qanelqa aturan, atqa-llu mecirautekevkenaku.

⁹Tangerrluku-llu, Satan-aamun quyurciviurciiqanka, taukut Jews-aarunrilnger'meng Jews-aarunilriit iqluluteng, tangerrluku, taivkarciqanka, ciktaartelluki-llu ciuqerpecen̄un, nallunrirtelluki-llu elpecen̄ek kenkicimnek.

¹⁰Ilalciusqutka atuavciu, wii-llu qimausngaciqamci sass'amek nanikuallerkamek, nunam qainganelngurnun tut'arkamek, naspaanaluki nunam qainganelnguut.

¹¹Tekitellerkaqa ukaqsigiuq; taumek ukverci tegumiaqiciu, teguimanritnaurtuci nasqerrutevcen̄ek.

¹²Cirlakilria naparyiuciiqaqa Agayutma agayuvianun; tuaken-llu anngaituq, igauciiqaqa-llu elliinun Agayutem atra, Agayutem-llu nuniin atra Jerusalem-aaq nutaraq, Agayutmek atrararkaq qilagmek, wii-llu atqa nutaraq.

¹³Ciutengqellriim niilliki Anernerem qanellri agayuvignun.

¹⁴“Agayuviim-llu an'gilaanun Laodicea-mi igaa: ‘Wani-wa Amen-aam qaneryarai, nallunairilriim piciulriim, Agayutem-llu piurtellrin ayagnerata.

¹⁵“‘Nallunritanka caliaten; kumlatenrilavci uuqnarqevkenaci-llu. Assinruyartuq aipaagnek kumlaskuvci wall'u uuqnaqluci.

¹⁶Taumek patessngiivci kumlatevkenaci uuqnarqevkenaci-llu qeciuciiqamci.

¹⁷Qanravet, (waten) tukuugua nuuqitenritua, camek-llu piyuumirpek'nii: takumcunarqucirci nalluluku, naklegnarqucirci-llu, arrsaucirci, cikmiumacirci, matangqacirci-llu.

¹⁸Taumek alerqurnaamken suulutaamek kiputesqelluten wangnek kenerkun menuircaumalriamek, tukuunaurtuten, qatellrianek-llu aturanek at'arkarpenek matangqallren kasngunarqelria alaitesqevkenaku, mingugmek-llu iigpet minguutekaagnek, tangerrnaurtuten-llu.

¹⁹Kenkekenka inerqularanka anucimirqecetaarluki-llu, taumek tengrukina umyualinqiggluten-llu.

²⁰Tangerrluku, amigmi nangengqaunga tukriarlua-llu; yuum erinaka niiskuniu ikirullua-llu, itervikciqaqa nerellgutekluku-llu, elliin-llu wiinga.

²¹Cirlakilria aqumevkarciqaqa canimni angayuqauvima aqumllertaani, cirlakillrucimtun aqumlua-llu Atama caniani angayuqauvian aqumllertaani.

²²Ciutengqellriim niilliki Anernerem qanellri agayuvignun.’”