Read Yupik Revelation 5 Bible Online

Revelation 5 - Yupik bible

Revelation 5

¹Aqumllermi-llu aqumgalriim tallirpilirnerani unatain tangertua kalikanek imegyaranek igaumaluteng ilulirnemegteggun tunumegteggun-llu, takarnarqutnek nepesvikumaluteng malrunlegnek.

²Tangertua-llu an'gilamek pinilriamek qastuluni qanerluni, “Kina callarciyunarqeciqa kalikanek imegyaranek, takarnarqutait-llu navgurluki?”

³Yugtangenrituq qilagmi nunami-llu, nunam-llu aciani kalikanek imegyaranek callarciyugngalriamek yuvrirluki-llu,

⁴taumek qiallruunga cakneq, yugtangenrilan kalikanek imegyaranek callarciyugngalriamek yuvrirluki-llu.

⁵Ciulirneret-llu iliita qanrutaanga, “Qiavkenak; tangerrluku, Judah-m kinguvrin yugtutuliat, David-aam kinguvra, cirlakillruuq, taumek callarcugngai kalikat imegyarat takarnarqutait-llu malrunelgen.”

⁶Qukaatni-llu aqumllerem unguvalriit-llu cetaman ciulirneret-llu akuliitni, tangertua Qusngiyagarmek nangerngalriamek, tuarpiaq tuqucimallruluni, cirunerluni malrunlegnek, iingqerrluni-llu malrunlegnek, wani-wa taukut Agayutem Anerneri malrunelgen nunamun tamiinun ayagcecimalriit.

⁷Ullagaa-llu aqumllermi aqumgalria, tallirpilirnernek-llu unatainek kalikaat imegyarat tegui.

⁸Kalikat-llu teguaki, taukut cetaman unguvalriit, taukut-llu ciulirneret yuinaq cetamanek cipingalriit, Qusngiyagaam ciuqerranun palurtut, tamarmeng aturcetaanek tegumiarluteng, aruvagvignek-llu suulutaanek aruvagkanek imarluteng, wani-wa ellualriit piicautaitnek.

⁹Nutaramek-llu yuarutmek aturtut, qanerluteng, “Elpet teguyunarqan kalikaq imegyaraq takarnarqutai-llu callarrluki, tuqucimallruavet, augpegun-llu yuut akiliucavki Agayutmun naumallgutkelrianek tamaitnek qaneryarallgutkenrilngurnek atanruvingqellgutkenrilngurnek-llu.

¹⁰Atanruviurtaten-llu Agayutmun agayulirten͞gurrluki-llu, atanruciqut-llu nunam qaingani.”

¹¹Tua-i-llu kiartua, aqumllerem-llu avatiini unguvalriit ciulirneret-llu avatiitni, niitua an'gilarugaat nepiitnek naaquciilnguut tiissitsaarugaat,

¹²qastuluteng qanerluteng, “Qusngiyagaq tuqucimalleq cikiumayunarquq pinimek, tukuutnek, umyuartumek, artuqaitmek, takarnarqutmek, ucurnarqutmek-llu, atawaqaasqutmek-llu!”

¹³Niitanka-llu tamalkuita unguvangqellriit qilagmi, nunam-llu qaingani, nunam-llu aciani, imarpigmi-llu, tamatumelnguut-llu tamalkuita, qanertelluki, “Aqumllermi aqumgalriamun, Qusngiyagarmun-llu pikevkararkaugut atawaqaasqun, takarnarqun-llu, ucurnarqun-llu, pinirpak-llu, akwarpak akwanun!”

¹⁴Taukut-llu cetaman unguvalriit qanertut, “Amen!” Ciulirneret-llu taukut palurtut ciuqerranun agayuluteng-llu.