Read Yupik Revelation 6 Bible Online

Revelation 6 - Yupik bible

Revelation 6

¹Qusngiyagaq tangellruaqa takarnarqutet malrunelgen iliitnek callarcillrani, taukut-llu unguvalriit cetaman iliit niitellruaqa qastuluni qanellrani, kallilriatun, “Tailuten!”

²Tangerrluku-llu, tangertua horse-aamek qatellriamek, ugingavikestii-llu urluvengqertuq; nasqerrutmek-llu cikiumauq, ayiimi-llu cirlakiuq cirliqerkauvkenani.

³Takarnarqutem-llu aipaa callarcaku, unguvalriim aipaa niitellruaqa qanerluni, “Tailuten!”

⁴Horse-aaq-llu alla an'uq, kavircen̄ani; ugingavikestii-llu cikiumauq piyunarqucimek nepaitnaq au͡gaasgelluku nunam qainganek, yuut ellaitnek tuqurqutarkaurtelluki, nuussirpagmek-llu cikiumauq.

⁵Pingayuak-llu takarnarqun callarcaku, pingayuak cali unguvalria niitellruaqa qanerluni, “Tailuten tangerrsarturru!” Tangrraqa-llu, tangerrluku-llu horse-aaq tungulria, ugingavikestii-llu uspernek tegumiangqertuq.

⁶Erinaungalngurmek-llu niitua taukut unguvalriit cetaman akuliitnek qanelriamek, “Mukaarkat uspeq atauciq tamalkutun, suuparkat-llu usperet pingayun tamalkutun; tau͡gaam agturyaqunaku uquq wine-aq-llu.”

⁷Cetamiit-llu takarnarqun callarcaku, taukut unguvalriit cetamiit niitaqa qanertelluku, “Tailuten!”

⁸Tangerrluku-llu, tangellruaqa horse-aaq qakilria, ugingavikestii-llu Tuqumek atengqertuq, maligluni-llu Tuqumalriit Utaqalgirviatnek; piyunarqucimek-llu cikiumauq nunam avgan avganun, tuqurqisqellukek nuussirpagkun, kaigyarakun, cangerlagkun, nunam-llu ungungssiikun.

⁹Tallimiit-llu takarnarqun callarcaku, ekuaviim aciani tangertua Agayutem qaneryaraa pitekluku tuqutaullret tarneritnek, nallunairillrat-llu pitekluku.

¹⁰Qayagpagtut-llu qastuluteng qanerluteng, “Quyinrulriami Ataneq, Tanqilria piciulria-llu, qaku-mi akinauruciiqsiu augput nunam yuinun?”

¹¹Qatellrianek-llu aturanek cikiumaut mernuinerciqaasqelluki-llu, pisten͞gullgutaita anelgutaita-llu naamarillerkaatnun, tuqutaugarkat ellait tuqutaullruciicetun.

¹²Arvinelgat-llu takarnarqun callarcaku, tangerrluku, tangrraqa nuna pekterpagluni; akerta-llu tunguriuq missuullertun tungulriatun, iraluq-llu kaviriluni augcetun.

¹³Qiliim-llu agyai igtut nunamun, tuarpiaq atsangqetulim napam atsaminek igcilauciatun anuqem arulataqani uksumi.

¹⁴Qilak-llu catairtuq tuarpiaq imegluni kalikatun imegyaratun, ingrit-llu tamarmeng qikertaat-llu enemeggnek nugtarcimaluteng.

¹⁵Nunam-llu atanri, quyilriit-llu yuut, anguyagtet-llu atanrit, tukuulriit-llu, pinilriit-llu, tamarmirrluteng teguat, teguarunrilnguut-llu qerranqunun iirtut teggalqut ingrit-llu akuliitni.

¹⁶Ingrinun teggalqunun-llu qanerluteng, “Iggvikicikut capluta-llu aqumllermi aqumgalriim kegginaanek, Qusngiyagaam-llu eq'uqertiinek!

¹⁷Eq'uqertiik angelria tekican, kina-llu nangerngayunarqeciqa ciuqerrani?”