Read Yupik Revelation 7 Bible Online

Revelation 7 - Yupik bible

Revelation 7

¹Tamatum kinguani tangertua an'gilanek cetamanek nangengqalrianek nunam kangiraini cetamani, taukut tegumiaqait nunam anuqai cetaman, anuqlircetevkenaki, nunamun imarpigmun-llu wall'u napanun.

²Kinguani cali allamek an'gilamek tangertua calaram tungiinek mayulriamek, Agayutem unguvalriim takarnarqutiinek avalingqerrluni, qastuluni-llu qayagaurai taukut cetaman an'gilat piyunarqucimek cikiumalriit nunamun imarpigmun-llu piunriryugngalukek.

³Qanerluni, “Agturyaqunaki nuna, imarpik-llu, napat-llu, Agayutem kevgainek takarnarqucirillerkamta engeliinun qauraitgun.”

⁴Takarnarquciumalriit-llu amllertaciat niitaqa 144,000. Israel-aam qetunrain kinguvrin tamaitnek ilangartaarumaluki, Judah-m kinguvri tiissitsaat qulen malrugnek cipluku 12,000, Reuben-aam-llu kinguvri tuaten, Gad-am-llu, Asher-aam-llu, Naphtali-m-llu, Manasseh-m-llu, Simeon-aam-llu, Levi-am-llu, Issachar-am-llu, Zabulun-aam-llu, Joseph-aam-llu, Benjamin-aam-llu.

⁹Tamatum-llu kinguani kiartua, tangerrluku-llu, yugugaat yuum naaqesciigalkai nunanek tamaitnek, nauvillgutkelrianek-llu tamaitnek, yugnek-llu ilakellrianek tamaitnek, qaneryarallgutkenrilngurnek-llu, aqumllerem ciuqerrani, Qusngiyagaam-llu ciuqerrani nangengqaluteng, qatellrianek aturluteng palm-at avayaitnek tegumiarluteng.

¹⁰Qastuluteng-llu qayagaluteng, “Anirtuun pikak Agayutemta aqumllermi aqumgalriim, Qusngiyagaam-llu!”

¹¹Tamarmeng-llu an'gilat nangengqaut aqumllerem avatiini, ciulirneret-llu taukut-llu unguvalriit cetaman elatiitni, palurrluteng-llu aqumllerem ciuqerrani Agayun ciktaarvikaat,

¹²qanerluteng, “Amen! Agayutemta pikliki, atawaqaasqun, ucurnarqun, umyuartuciq-llu, quyan-llu, takarnarqun-llu, piyunarquciq-llu, piniq-llu, akwarpak akwanun! Amen!”

¹³Ciulirneret-llu iliita qanrutaanga qanerluni, “Kinkut ukut, qatellrianek aturiumalriit, naken-llu tekitat?”

¹⁴Kiugaqa-llu, “Usuuq, elpet nallunritaten.” Tua-llu qanrutaanga, “Ukut imkuugut nanikuanarqellriarpagmek angtuamek anellret, erurluki-llu aturateng qat'riluki-llu Qusngiyagaam augakun.

¹⁵Taumek Agayutem aqumlleran ciuqerrani uitaut, kevgiuraat-llu ernerni unugni-llu agayuviani. Elliin-llu aqumllermi aqumgalriim murilkeciqai nayuucimikun.

¹⁶Kainqiggngaitut, meqsunqiggngaunateng-llu; akertem puqliin tayasngaitai, cam-llu puqlam agturngaunaki.

¹⁷Qaunqestekciqngatgu Qusngiyagaq aqumllermi uitalria, elliin-llu ciuliqagciiqai mernun unguvamek ulvelrianun; Agayutem-llu aluviit tamalkuita perrirciqai iingitnek.”